Esekiel

47 Ih eri kapwureielahng ni wasahn pedolong en tehnpas sarawio,+ oh wasao I kilangada pihl me pwilipwillahng palimese sang pahn taht en wasahn pedolong en tehnpas sarawio,+ pwe mwohn tehnpas sarawio sallahng palimese. Pihlo pwilipwilsang pahnangin palimaun en tehnpas sarawio, palieir en pei sarawio.

2 Ih eri kahreiehla likio ni ewen kehl en paliepeng+ oh waiehla likio ni ewen kehl en maslikio me sallahng palimese,+ oh I kilangada pihl eh pwilipwilsang ni palimaun.

3 Ni ohlo eh kohieila ni palimese wa sahl en sosohng ehu,+ e sohngala kiupid* 1,000 oh ndaiong ie I en kotehla pihlo; pihlo lel ni keimwen nehi kat.

4 Ih eri pil sohngala kiupid 1,000 oh ndaiong ie I en kotehla pihlo, oh pihlo lel ni pwukieiet.

E pil sohngala kiupid 1,000 oh ndaiong ie I en kotehla, oh pihlo lel ni lukopeiet.

5 Ni eh pil sohngala kiupid 1,000, pihlo ahpw wiahla pillap pwoat, kahrehda I sohla kak alu kotehla, pwe pihlo inenen loal, aramas pahn anahne pap. Pillap pwoat me sohte emen kak alu kotehla.

6 E idek rehi: “Nein-aramas, ke kilangehr met?”

Ih eri ndaiong ie I en alu pwurala ni keilen pillapo. 7 Ni ei pwurala, I kilangada me uhdahn diren tuhke pali koaros ni keilen pillapo.+ 8 Ih eri ndaiong ie: “Pihl wet kin pwilipwillahng sahpw me mi palimese oh douluhldihla Arapa*+ oh kolahng sehdo. Ni eh kin lella nansedo,+ pilen sehdo kin memla. 9 Mwuten menmour* kan pahn kak momour wasa koaros me pihlo* pwillahng ie. E pahn mie mwahmw tohto, pwehki pihl wet pahn pwillahng wasao. Pilen sehdo pahn memla oh mehkoaros pahn momour wasa koaros me pillapo pwillahng ie.

10 “Soused kan pahn kesihnen limwahn sehdo sang Engkedi+ kohla lel Eneklaim, wasa me pahn mie wasahn palang uhk kan. E pahn mie soangsoangen mwahmw tohto, duwehte mwahmw kan en Sehd Laud.*+

11 “E pahn mie peden pihl kan oh lehpwel kan, oh mepwukat sohte pahn wekila. Wasa pwuko pahn direkihla soahl.+

12 “Soangen tuhke koaros ong mwenge pahn keirda pohn keilen pillapo ni pali koaros. Tehrail kan sohte pahn mengila; de pil wahrail kan sohte pahn tokedihsang wa. Sounpwong koaros re pahn kin kapwarehda wah kapw, pwehki pihl me kin kalamwurih tuhke pwukat kin pwilipwilsang nan tehnpas sarawio.+ Wahrail kan pahn wia mwenge oh tehrail kan ong kamwahwihala aramas.”+

13 Iet me Kaun Wasa Lapalahpie Siohwa ketin mahsanih: “Iet sahpw me kumwail pahn nehkpeseng nin duwen sapwen sohso ong keinek 12 en Israel, oh kadaudok en Sosep pahn ale pelien sahpw riau.+ 14 Kumwail pahn sohsohki met oh alehdi soangen uwe tehieu.* I kahukihla I en kihong samamwail mehn mahs ako sahpwet,+ oh met sahpwet kileldiong* kumwail nin duwen sohso ehu.

15 “Ih irepen sahpwo met ni paliepeng: E kohsang ni Sehd Laud ni ahl me kolahng Edlon+ kohla Sedad,+ 16 Amad,+ Peroda+ oh Sipraim, me mi nanpwungen sapwen Damaskus oh sapwen Amad, lel Aser-adikon, me mi limwahn irepen Auran.+ 17 Eri irepeo pahn tangasang ni sehdo kolahng Asar-enon,+ tang limwahn irepen Damaskus kohla paliepeng, oh irepen Amad.+ Ih met me irepen paliepeng.

18 “Irepen palimese tang nanpwungen Auran oh Damaskus oh tang limwahn Sordan nanpwungen Kilead+ oh sapwen Israel. Kumwail pahn sohngedi sang ni irepen paliepeng kolahng ni palimesehn sehdo.* Ih met me irepen palimese.

19 “Irepen palieir pahn sang Damar kolahng ni pihl en Meripa-kades,+ oh uhd kolahng ni Wahwo* oh kolahng Sehd Laud.+ Ih met me irepen palieir.

20 “Sehd Laud mi ni palikapi, sang ni irepen palieir kohdahla lel wasa ehu me mi palilahsang Lepo-amad.*+ Ih met me irepen palikapi.”

21 “Kumwail pahn nehkpeseng sahpw wet nanpwungamwail, nanpwungen keinek 12 en Israel. 22 Kumwail pahn kihpeseng sahpwo ong sohso nanpwungamwail oh ong mehn liki kan me kin kousoan rehmwail me nainekihda seri kan ni ar koukousoan nanpwungamwail; oh re pahn duwehla pwilidak en Israel kei ong kumwail. Re pahn iang kumwail alehdi sohso ehu nanpwungen keinek en Israel kan. 23 Kumwail pahn kihong mehn liki me kin koukousoan rehmwail sohso ehu nan sahpw en keineko wasa me e kin koukousoan ie,” Kaun Wasa Lapalahpie Siohwa me ketin mahmahsen.