Kisinlikou ong Pailimwon
1 Sang Pohl, me sensel+ pwehki Krais Sises, oh riatail Timoty,+ ong Pailimwon iangat tohndoadoahk kompoak, 2 oh ong riat lih Appia, oh ong Arkipus+ iangat sounpei, oh ong mwomwohdiso me kin tuhpene nan imwomwo:+
3 Samatail Koht oh Kaun Sises Krais en ketikihong kumwail kadek sapan oh popohl.
4 Ahnsou koaros I kin kalahngankihong ei Koht ni ei kin tamanuhkada nan ei kapakap kan,+ 5 ni ei kin rong duwen omw pwoson Kaun Sises oh limpoak me ke ahneki ong ih oh aramas sarawi kan koaros. 6 I kin kapakapki pwoson me kowe oh meteikan kin ehukihpene en kamwakid uhk ken pohnese soahng mwahu koaros me kitail ahneki rehn Krais. 7 Pwe I uhdahn perenda oh nsenamwahula ni ei rong duwen omw limpoak. Riei, pwehki kowe, mohngiong* en aramas sarawi kan kin kehlailda.
8 Pwehki met, mendahki mie ei saledek laud en koasoi ni mwaren Krais I en ruwesehkin uhk ken wia dahme konehng, 9 ahpw I pahn peki rehmw ken wia met pwehki omw limpoak, pwehki ngehi Pohl, I mahlahr, oh pil ahnsou wet I wie sensel pwehki Krais Sises. 10 I peki rehmw duwen nei seri Onesimus,+ pwehki I wialahr seme+ ni ei mi nan imweteng.* 11 Mahso, sohte katepen aramas menet ong uhk, ahpw met e katapan ong uhk oh pil ong ngehi. 12 I pahn kapwurehwei ih rehmw, ei, ih me wia ei mohngiong.*
13 I men en mihmihte rehi met, pwe en wilianuhkedi sewese ie ni ei wie senselki rongamwahwo.+ 14 Ahpw I sohte men wia mehkot ma ke sohte pwungki, pwe omw wiewia mwahu en pweida, sang ni pein nsenomw,+ ahpw kaidehn ni idihd. 15 Mwein ih kahrepen eh sohla mihmi rehmw erein ahnsou kis,* pwe ken pwurehng naineki ih kohkohlahte, 16 kaidehn nin duwen lidu men+ ahpw laudsang lidu, nin duwen riatail me kompoak.+ I uhdahn poakohng ih, oh ke pahn poakohng ih laudsang nin duwen lidu men oh pil nin duwen iangatail me pwoson men rehn Kauno. 17 Eri ma ke wiahkin ie kompoakepahmw, kasamwo ih ni kadek duwehte omw kin kasamwo ie. 18 Patehng met, ma e wiahiong uhk mehkot sapwung de pweipwandkihong uhk mehkot, a ke ntingihedi nan nei pwuhko. 19 Ngehi Pohl, me ntingihwei ni pein mengin pehiet: I pahn pwainwei—I sohte anahne ndawei me ke pweipwandkihong ie pein kowe. 20 Eri riei, I koapworopworki en ale sawas wet sang rehmw pwehki ata kin miniminiong Kauno; kakehlaka ei mohngiong* sang ni omw kin miniminiong Krais.
21 I kamehlele me ke pahn wia met, kahrehda I ntingwei rehmw, pwe I ese me ke pahn wia laudsang dahme I nda. 22 Oh pil kaunopadahng ie wasa me I pahn mi ie, pwe I koapworopworki me sang ni amwail kapakap kan, I pahn pwurowei rehmwail.*+
23 Epapras,+ iengei me selidi pwehki Krais Sises, kadarewei eh rahnmwahu, 24 oh pil Mark, Aristarkus,+ Demas+ oh Luk,+ iengei tohndoadoahk kan.
25 Kadek sapan en Kaun Sises Krais en kin ieiang lamalam mwahu* me kumwail kin kasalehda.