Sounnting en Paipel menet sohte kin koasoia me imwilahn mour en aramas kin koasoandier. Ahpw e kin koasoia duwen kupwuren Koht oh ia duwen e pahn kamwakid aramas. Ia duwen kitail kak ese met? Pwehki ihme iren Paipel ko pwon padahkihong kitail. Mwurin Solomon koasoia duwen soahng tohto me kin wiawi “ni ahnsou kan me Koht ketin koasoanehdi,” e ntingihdi: “I ese dahme Koht kin ketikihong kitail. E ketin koasoanehdi ahnsou kan me konehng soahng koaros.”​—Eklesiasdes 3:10, 11.

Koht ketikihong kitail soahng tohto kitail en wia oh Solomon ntingihdi ekei irail. Koht pil ketikihong kitail saledek en pilada dahme kitail men wia. Ahpw ong doadoahk koaros, mie ahnsou me konehng kitail en wia pwehn pweida mwahu. Karasepe, medewehla dahme Solomon koasoia duwen “ahnsoun padokedi oh ahnsoun wosada” nan Eklesiasdes 3:2. Soumwet kan kin ese me mie ahnsou me konehng en padokedi wahn tuhke kan. Ia duwen ma soumwet men padokedi wahn tuhke ehu ni ahnsou me sohte pwung en padokedi? E kak nda me eh doadoahk laud sohte pweida pwehki imwilahn eh doadoahko koasoandier? Soh! Eh doadoahko sohte pweida pwehki e padokedi ni ahnsou me sapwung. Eh doadoahko pahn kak pweida ma e idawehn koasoandi me Sounkapikada ketin koasoanedier.

Koht sohte ketin koasoanehdi imwilahn mour en aramas de dahme pahn wiawi ong irail. Ahpw e kin ketikihda koasoandi kan me kin kamwakid wiewiahn aramas kan pwehn pahrekiong kupwure kan. Pwe aramas kan en pweida nan arail doadoahk kan, irail anahne wehwehki oh doadoahngki kupwuren Koht oh sapwellime ahnsou. Aramas sohte kak kawekila dahme Koht kin kupwurki. Ni eh ketin doadoahngki soukohp Aiseia, Siohwa mahsanih: “Mahsen me I kin kapwilewei . . . pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.”​—Aiseia 55:11.

Wehwehki Sapwellimen Koht Ahnsou

Mwurin Solomon koasoia, “[Koht] ketin koasoanehdi ahnsou kan me konehng soahng koaros,” e doula koasoia, “E ketikihong kitail atail ineng en ese dahme pahn pweida ni ahnsou kohkohdo, ahpw e sohte mweidohng kitail en wehwehki mehlel wiepen nin lime kan.” Ehu kawehwehn Paipel mahsanih: “E ketikihong aramas ineng en mour kohkohlahte, ahpw irail sohte kak wehwehki sapwellimen Koht wiewia kan sang ni tepio lel ni imwi.”​—Eklesiasdes 3:11, The NIV Study Bible.

Aramas nda soahng tohto duwen iren Paipel wet. Ahpw mouren iren Paipel wet iei me kitail koaros kin medewe duwen kahrepen atail mour oh dahme pahn wiawihong kitail. Sangete mahs, aramas kin apwalki en pwungki me aramas kin ihte doadoahk laud ahpw soahng koaros kin imwikihla mehla. Kitail aramas weksang mahn akan pwehki kitail kin medemedewe duwen atail mour en ahnsou kohkohdo. Kitail pil kin inengieng ahneki mour soutuk. Pwekida? Nin duwen iren Paipelo kawehwehda, Koht “ketikihong aramas ineng en mour kohkohlahte.”

Pwehn kaitarala ineng wet, aramas kin kalapw pwonopwonki ma mie mour mwurin mehla. Ekei kin lemeleme me mie mehkot me mi nan loalatail me kin momour mwurin atail mehla. Pil ekei kin kamehlele me kitail pahn pwurepwurehng ipwidi nan ehu mour tohrohr mwurin atail kin mehla. Meteikan kin lemeleme me Koht ketin koasoanehdi imwilahn soahng koaros nan atail mour oh sohte mehkot me kitail kak wiahiong. Ahpw madamadau pwukat sohte kak kihda pasapeng mwahu. Met pwehki Paipel mahsanih me aramas “sohte kak wehwehki sapwellimen Koht wiewia kan sang ni tepio lel ni imwi.”

Aramas kin ahneki ineng en ese dahme pahn wiawi ahpw re sohte kak diarada pasapengpe. Sangete mahs, soun madamadau kan kin lelohng kahpwal wet. Pwehki Koht me ketikihong kitail ineng wet, e sou konehng kitail en sohpeiong ih pwehn padahkihong kitail dahme kitail anahne wia pwehn kaitarala ineng wet? Paipel mahsanihki duwen Siohwa: “Komwi kin ketikihong irail uwen me itar oh kin ketin kaitarala ar anahn akan koaros.” (Melkahka 145:16) Ni atail kin onopki Paipel, kitail kak diarada kawehwe mwahu duwen mour oh mehla oh duwen kupwuren Koht ong sampah oh aramas kan.​—Episos 3:11.

“Koht eri ketin wiahda aramas; e ahpw ketin wiahda aramas rasehng ih. E ketin wiahda ohl oh lih.”​—Senesis 1:27.

MAHSEN pwukat me mi nan Senesis kin pid me Koht “ketin koasoanehdi ahnsou kan me konehng soahng koaros” pwehki e ketin kapikada pwopwoud unsek ehu. (Eklesiasdes 3:11) Siohwa Koht eri mahsanih: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.”​—Senesis 1:28.