19, 20. Dahme wia ong irail mehn Suhs akan me kin liki Siohwa?

¹⁹ Ahpw, koapworopwor en aramas akan me kin likih Siohwa pahn uhdahn pweida. Pwe Siohwa kin lelepek, E kin kapwaiada sapwellime inou kan me E ketin wia ong Eipraam oh Depit, oh E kin ketin kasalehda kadek ong aramas akan duwehte Maika, me kin poakohng Ih oh kin mwahieiki iengarail kan pwe ar kin dohsang Koht. Ahpw, ong irail aramas pwung kan, ni pein sapwellimen Koht ahnsou me E ketin kileledi, E pahn ketin pwurehng kapaiada irail.

²⁰ Met wiawi nan pahr 537 B.C.E., mwurin Papilon pwupwudi oh ni ahnsou me luhwen mehn Suhs akan pwurala uhdakarail. Ni ahnsowo, mahsen kan en Maika 2:12 tepin pweida. Siohwa mahsanih: “I pahn kapokoneikumwailpene, I pahn kihpene luhwen mehn Israel kan koaros. I pahn kapokoneikumwailpene, rasehng pelin sihpw me pwurodohng nan kehl ehu. Sapwamwailo eri pahn pwurehng direkihla aramas, rasehng mohs kaselel me diren sihpw.” Uwen laud sapwellimen Siohwa limpoak! Mwurin E ketin kaloke sapwellime aramas akan, E kin mweidong luhwen mehn Israel kan en pwurala oh papah Ih nan sahpw me E ketikihong arail pahpa kahlap kan.

22. Mehnia pwihn riau me kin koapworopworki Wehin Koht?

²² Nan 1919, Kristian keidi lelepek kan kin katohrohrsang Kristendom oh irail kin nantiong en kalohkihseli Rongamwahu en Wehio ong wehi kan koaros. (Madiu 24:14) Keieu, irail kin nantihong rapahkihda irail luwen me keidi kan en Israel ni pali ngehn. Oh mwurin met, irail tepida kihpene “sihpw teikan,” oh pwihn riau pwukat wiahla “pwihn sihpw teieu, oh sileparail pahn mehtehmen.” (Sohn 10:16) Edetehn irail kin papah Koht ni sahpw 234, tohnkaudok lelepek pwukat koaros en Siohwa kin ni mehlel “miniminpene.” Ni ahnsou wet, pelin sihpw wet “kin rasehng mohs kaselel me diren sihpw,” oh lih oh seri kan pil kin iang. Irail sohte kin koapworopworki koasoandi suwed wet, ahpw Wehin Koht, me pahn ni ahnsou keren wahdo paradais nin sampah wet.