Iaduwen Komw Kak Pere Noumw Seri Kan?

MWURIN ah kin iang ehu sukuhl me karanih ah wasahn kousoan, Wernera tepiada kalaudehla ah sukuhl iangahki me pwulopwul 3,000 teikan nan São Paulo, Brazil. Ih ahnsouo me e tepin kilang ienge tohnsukuhl kan netiki oh doadoahngki wini suwed kan. Pwehki paliware tikitik, sohte pwand e lohdi pahn tiahk samin oh keper me tohnsukuhl laud kan kin doadoahngki pwehn kapidelong emen nan arail pwihn en tohnsukuhl kan.

Rien Werner serepeino Eva pil ahneki kahpwal akan. Pwehki e men deila nan sukuhl, e kin ngiangi onop lau e pwangada oh pingada nan ah madamadau. Duwehte seri teikan, ira koaros Werner oh Eva anahne pereper en paliwar oh palien pepehm. Soangen sawas dah me noumw seri kan anahne? Iaduwen komw kak kaunopiraildahng mour en aramas laud? Mehlel, soangen ahnsou kohkohdo dahieu me komw mwahuki noumw seri kan en ahneki?

Re Anahne Laudsangte Mwenge

Medemedewe ekis duwen kahpwal kan me pahpa oh nohno kan kin lelohng ni arail kin pere neirail seri kan nan rahnpwukat. Pwehki tikitiklahn mour mwahu en peneinei oh kekeiradahn mouren semwehmwe, nan sahpw tohto nempehn seri kan me kin tangasang imwarail oh kousoanla nanial akan wie tohtohla. Pwehki pahpa oh nohno kan sohte kin pere neirail seri kan sang wiekau, met kin imwikihla aramas kan kin doadoahngki seri kan en wia doadoahk kan. Doadoahngki wini suwed kan kin pil kauwehla mouren me pwulopwul tohto. Karasape ehu, ni ahnsou me emen me pwulopwul en Brazil wiahla emen me kin tengala pahn wini suwed, meleilei sohla kin mihmi nan imwe. Likin pwunod me ah pahpa oh nohno kin lelohng pwehki met, ira pil nannanti en pwain wiepe kan pwehn kamwahuihala en serio soumwahu en wini suwed, oh sounpwain wini suwed soh mahk kan me kin pil kohdo imwarail ngidingidkihong me pwulopwulo en pwainla wini suwed kan me re netikihong.

Ahpw, mendahki kapwunod kan en mour, pahpa oh nohno tohto kin nannanti en apwalihkihong neirail seri kan kaidehn mwengehte, likoute, oh wasahn kousoante, ahpw re kin pere neirail seri kan sang mwersuwed, wini suwed, oh kahpwal teikan. Arail nannanti me kaselel, ahpw met itar? Iaduwen irail kak pere neirail seri kan sang ohlahn palien pepehm oh ohlahn pali ngehn? Me tohto kin pohnese me epwel mwahu en pahpa oh nohno kin oarepene apwalihala kahpwal akan me kin pidada en neirail seri kan pilipil en ihs me re pahn kompoakepahnki oh soangen mehn kamweit dah kan me re kin perenki. Ahpw, iaduwen pahpa oh nohno kan arail pahn kak irehsang irail en dehr nohn lemeidihd de nohn mweidongala nsenen seri kan? Mie luhk me kohwong komwi en tehk pasepeng kan me diarek nan artikel en mwuri.

Ia Mwomwen Mour me Komw Men Noumw Seri kan en Lalaudla oh Ahneki?

KOMW kin wiahki noumw seri kan duwehte sohso pweilaud ehu? (Melkahka 127:⁠3) De komw kin kilangwong kekeirada irail nin duwen katoutou en mwohni ehu me sohte kak pweida? Apwaliada seri kan sohte kin wahdo mwohni, ahpw pahpa oh nohno kin doadoahngkihla mwohni apwalih irail lau re kak pein kamour pein irail. Duwehte omw kin anahne pilahn mwahu pwehn kak apwalki ehu sohso, e pil duwehte pahpa oh nohno ara anahne pilahn mwahu pwehn kak apwalih neirail seri kan.

Pahpa oh nohno nsenoh kan kin men mour en neirail seri kan en mwahu sangete nin tepio. Mendahki soahng suwed oh inenen kansensuwed kan me kin wiawi nan sampah wet, pahpa oh nohno kan kak wia soahng tohto pwehn pere neirail seri kan. Tehk irair en Werner oh Eva, me pwarada nan artikel en mwowe.a

Ni Ahnsou Me Pahpa Oh Nohno Kan Kin Uhdahn Nseno

Werner ripohtki me ah pahpa oh nohno sohte kin mweidohng mehkan en pein wiawi, ahpw kin kasalehda ara nsenohki mehlel dahme kin wiawi nan sukuhl. E koasoia: “I uhdahn kin kalahnganki iren sawas kan me re kihong ie, oh I pehm me re nsenohkin ie oh kin utung ie. Nin duwen pahpa oh nohno kan, ara peneu me kehlail, ahpw I ese me re wia kompoakepahi mehlel kan.” Oh ni ahnsou me Eva inenen nsensuwedkihla ah sukuhl me kahrehong en pwunod oh sohte kak meir, ah pahpa oh nohno, Francisco oh Inez, pil kin doadoahngkihla ahnsou laud koasoakoasoiong ih oh sewese ih en pwurehng toupahrekla ni pali en madamadau oh ngehn.

Iaduwen Francisco oh Inez rapahki en pere neira seri kan oh kaunopadahng ira mouren aramas laud? Eri, sangete ni ahnsou me seri ko pwelel, pahpa oh nohno limpoak wet kin ahnsou koaros koasoanehong seri ko en iang ira nan ara wiewia kan en ehuehu rahn. Francisco oh Inez sohte kin werekiongte kompoakepara laud kan, ahpw ira kin kahre seri kan wasa kan koaros me re kohla ie. Nin duwen pahpa oh nohno limpoak kan, re kin pil kihong neira pwutak oh serepein kaweid me konehng. Inez koasoia: “Se padahkiohng ira iaduwen ren apwalih nan ihmw, en kasohtik, oh en apwali pein ara likou kan. Oh se sewese emenemen ira en pilada ehu doadoahk oh en katoupahrekih ara pwukoa kan ong mehkan en palingehn.”

Ia uwen eh kesempwal en esehla noumw seri kan oh kihong irail kaweid! Kitail en kasawih wasa siluh me komw kak wia met: (1) Sewese noumw seri kan en pilada ehu doadoahk en mwohni me konehng; (2) kaunopada irail en kak powehdi kapwunod kan nan sukuhl oh nan wasahn doadoahk; (3) kasalehong irail iaduwen re kak kaitarala arail anahn en pali ngehn kan.

Sewese Irail Pilada Doadoahk Me Konehng

Pwehki en emen doadoahk en mwohni sohte ihte kin kamwekidih ah irair en mwohni ahpw pil kin kihsang pali laud en ah ahnsou, kaweid mwahu en pahpa oh nohno kin oarepene tetehk dahme emenemen seri kin perenki oh arail koahiek. Pwehki sohte aramas pwerisek kin men wia katoutou ehu ong mehteikan, pahpa oh nohno kan anahne medemedewe ni keneinei iaduwen neirail serio kak kaunopada pwehn kamourih pein ih oh ehu peneinei. Noumw pwutak de serepein anahne sukuhlkihdi ehu doadoahk en mwohni pwehn kamourih? Nin duwen pahpa de nohno men me uhdahn kin nseno, nantiong sewese noumw seri en kekeirada soahngen irair me duwehte ineng en doadoahk pwerisek, men sukuhlkihdi mehkan, oh koahiek en miniminiong mehteikan.

Tehk Nicole. E koasoia: “Ahi pahpa oh nohno kin kahre ie en iang irail doadoahk nan ara pisines en kamwakel. Re kaweidiki me I en kihda ekis