States oh Prans, de irail me kisehn wehi 185 me iang United Nations, uhdahn kin paiekihda arail pwung kan ni pahrek me re ipwikihdi?

Mendahki aramas tohto men ahneki soangen lapalap tehieu, aramas koaros en ahneki pwung en “Mour, Saladek, oh Nsenamwahu” sohte kin pahrekpene nanpwungen aramas koaros. Karasepe ehu, pahrek dahieu ong pwung en mour kitail kak ndahki seri men nan Aperika ma e sohte kak kelehpw naineki emen toahkte pwe toahkteo pil kin kilang soumwahu 2,569 teikan likin serio, ahpw seri men nan Iurop ah toahkteo kin kilangte soumwahu 289 teikan likin ih? De pahrek dahieu ong pwung en saledek oh nsenamwahu me pwutak kan oh serepein kan nan India pahn ahneki ma silikis ehu en pwutak pwukat oh silikis riau en serepein pwukat pahn laudla sehse nting oh wadawad, ahpw nan wasa kan me duwehte Sapahn, Sehmen, oh Great Britain, kereniong seri koaros pahn ale kasukuhl?

Aramas kan nan sahpw akan en Central America me pweinerail nan sounpar ehu iei tala $1,380 kin paiekihda “wahu oh pwung” ohte nan mour duwehte irail ko nan Prans, me pweinerail nan sounpar ehu tala $24,990? Soahngen pahrek dahieu mie me kisin serepein pwelel kan nan Aperika ahneki ma re pahn mourkihte sounpar 56 ahpw kisin serepein pwelel kan nan North America pahn kak mour reireiki sounpar 79?

Mie irair tohto me kin pid sapahrekpeseng ong lapalap en aramas, oh koaros me suwed. Mie soahngen sapahrek tohto likin sapahrek en irair en mour oh sapahrek en kapai kan en pelien wini oh kasukuhl. Ekei pak sawehwe kan en pelien politik, keinek, de pelien lamalam kin kihsang wahu en aramas oh arail saledek. Mendahki aramas tohto kin koasoipene iaduwen aramas koaros pahn kak ahneki soangen lapalap tehieu, ni mehlel, kitail momour nan ehu sampah me sapahrekpeseng ong lapalap en aramas. E duwehte soumwahu ehu​—“me kin kahrehda kalokolok oh weirek wasa koaros,” nin duwen wehwehn lepin lokaia wet—​sapahrek kin mihla nan koasoandi kan koaros en aramas. Medek me e kin wahdo ni mwomwen semwehmwe, soumwahu, sohte sukuhl, sohte doadoahk en mwohni, oh lipilipilki aramas kin kamedek mehlel.

“Aramas koaros kapikipikda pwehn ahneki soangen lapalap tehieu.” Met wia madamadau kaselel ehu! Ahpw ia uwen dahme kin uhdahn wiawi kin weksang met!

Sapahrekpeseng Ong Lapalap En Aramas Koht Kupwurki Met?

Pasapengo ni lepin lokaia ehute iei soh. Kitail en kilang ia kahrepe.

KOHT kupwurki me aramas koaros en ahneki ahnsou mwahu kan en pwehn paiekihda mour oh nsenamwahu ni ahl ehu me pahn pahrekpene. Me pid en aramas kapikipikda, kitail wadek: “Koht eri pil ketin mahsanih, “A met kitail pahn wiahda aramas; kitail pahn wiahda aramas rasehng kitail. Re pahn ahneki manaman en kaunda mwahmw akan, menpihr kan, mahn mahnd oh lawalo, mahn laud oh tikitik koaros.” Ni ahnsou me e ketin kanekehla kapikada audepen sampah, “Koht mahsanihada mehkoaros me e ketin kapikada oh, kilang! e inenen mwahu.”​—Senesis 1:26, 31, New World Translation.

Koht kak mahsanih me irair kansensuwed en sampah wet me diren sapahrekpeseng ong lapalap en aramas “inenen mwahu”? Soh, pwehki “Koht iei limpoak.” (1 Sohn 4:8) Paipel mahsanihki duwen ih me e “sohte kin ketin lipilipilki aramas” oh “sapwellime wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.” (Deuderonomi 10:17; 32:4; pil kilang Sohp 34:19.) Oh wahnpoaron Piter koasoia: “Met I wehwehkihdar me Koht sohte ketin lipilipilki aramas. E ketin kupwurperenki mehmen me kin lemmwiki, oh pil wiewia me pwung; sohte lipilipil ih soahngen aramas dah.”​—Wiewia 10:34, 35.

Pwehki Koht me limpoak, oh sohte kin ketin lipilipilki aramas, oh kopwungpwung, oh mehlel, oh pwung, iaduwen e kak kapikihda aramas irair me ren sapahrekpeseng me pid arail pwung en paiekihda nsenamwahu? Pwehn mweidohng lipilipil nanpwungen aramas akan en wiawi oh pwilikihdiong irail nan koasoandi en sapahrekpeseng, pahn sapwung ohng sapwellime irair. E kupwurki me irail koaros en “ipwidi saledek oh arail wahu oh pwung kan en pahrekpene.” Ahpw, nan rahnwet soahng kan ni sansal sohte kin wiawi ni ahl wet. Dahme sohki

Utupen Irairen Sapahrekpeseng

Pwehki Koht kapikada aramas en pahrekpene sohte kin wehwehki me e kupwurki me irail koaros en pahrekpene nan irair koaros. Arail koahiek kan, oh mehkan me re kin perenki, oh arail irair kan kin wekpeseng. Arail pwukoah oh manaman pil kin wekpeseng. Karasepe ehu, ohl oh lih sohte pahrekpene ni irair koaros, ahpw Koht ketin kapikada lih en “kaunsekala” ohlo. (Senesis 2:18) Pahpa/nohno kan ahneki manaman me laudsang seri kan. Ahpw, mendahki wekpeseng pwukat​—koaros ohl, lih, oh seri kan—​pahn paiekihda pwung me Koht ketikihda me ren ahneki ahnsou mwahu kan me pahn pahrekpene en kaitarala arail anahn en nsenamwahu. Irail koaros pahn paiekihda wahu oh nanpwungen rehn Koht me pahn pahrekpene.

Me duwehte met, sapwellimen Koht tohnleng kan, me kapikipikada mwohn aramas akan, ahneki pwais oh pwukoah kan me wekpeseng. (Senesis 3:24; 16:7-11; Aiseia 6:6; Sud 9) Mendahki met, uwen pwais de pwukoah me re ahneki, koaros kin kak paiekihda sapwellimen Koht koasoandi en mour oh nsenamwahu ni uwe ieu me pahrekpene. Ihme ni ahl wet, re kasalehda sapwellimen Koht irair en soh lipilipil ni ahl ehu me kaselel.

Kansensuwed en nda me, emen ngehn soh sansal ko sohte kin nsenamwahuki sapwellimen Koht koasoandi. E mwahuki mehkot me laudsang dahme Koht ketikihongehr ih, e inengieng ehu pwukoah me ileile. Ni ah kin medemedewe ineng suwed wet, e wiakilahr pein ih en uhwong Siohwa, me nin duwen Sounkapikada ni pwung ahneki pwukoah ehu me lapalap sang koaros. Sapwellimen Koht ngehn soh sansal menet me kin uhwong ih mwuri kamwekidada aramas kan en pil kasik sang rehn Koht mehkan me laudsang dahme e ketikihongehr irail. (Senesis 3:1-6; pil kilang Aiseia 14:12-14.) Ihme karehda sapwellimen Siohwa koasoandi ong aramas en paiekihda mour oh nsenamwahu mwomwen sohla pahrek. Ngehn uhwong menet, me sansalda ihs ih nan Kaudial 20:2 me iei “Tepil oh Sehdan,” wiahla me suwedo me tepiada kahrehong tohnsampah en ahneki irair en sapahrek nanpwungarail.

Irair Wet Kak Wekila?

Pasapengo ni lepin lokaia ehute iei ehi!

Ahpw ihs me kak wahdo wekidekla mwahu kan? Kaun kan en aramas, ekei me kin mehlel, kin songosong erein sounpar epwiki kei en wahdo wekidekla kan. Arail pweida kan me mwotomwot, kahrehong aramas tohto en lemeleme me kitail sohte kak kasik me sapahrekpenen nanpwungen aramas kak kopwungpwungla. Ahpw, sapwellimen Koht madamadau, me kileledi nan Aiseia 55:10, 11 mahsanih: “Ei mahsen kin rasehng sinoh oh keteu me kin mweredi sang pahnlahng pwe en kalamwurih sampah. E kin kawosehda oh kakairada wahnsahpw, oh pil kin kihong aramas werentuhke mehn poad oh kisin tungoal akan mehn tungoal. Ih pil duwen mahsen me I kin kapwilwei​—e pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.”

Ia uwen kansenamwahu en ese me Siohwa Koht ketin kalohkidahr me e pahn ketin kapwaiada kupwure ni tepio en ketikihong tohnsampah koaros ahnsou mwahu en ahneki mour oh nsenamwahu ni uwe ieu me pahrekpene! Nin duwen emen Koht en mehlel, e kapwukoahki ong pein ih en kapwaiada dahme e ketin inoukihda. E kaperen pwe, e kupwurki oh sapwellimanki manaman en kapwaiada met. Iaduwen e pahn ketin wiahda met?

Pasapengo mih ni Wehio me Sises Krais padahkihong sapwellime werek kan en kapakapki: “Samat me ketiket nanleng, . . . mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:9, 10) Ehi, Siohwa pahn ketin doadoahngki Wehin Koht en “kauwehla mwehi teikan koaros [me mihmi ahnsouwet], oh pahn mihmi kohkohlahte.”​—Daniel 2:44.

Pahn kaundahn Wehin nanleng, koasoandi kapw en aramas ehu pahn miehla. Ni irair wet, wahnpoaron Sohn ntingihdi nan kaimwiseklahn pwuhk kan en Paipel, Kaudial: “Eri, I ahpw kilangada lahng kapw ehu oh sampah kapw ehu. Keieun lahngo oh keieun sampah sohla mie, oh madau pil sohla mie.” (Kaudial 21:1) Irair suwed en sapahrek kan napwungen aramas me duwehte​—semwehmwe, soumwahu, sohte sukuhl, lipilipilki meteikan, oh kansensuwed teikan en aramas pahn sohla mie.a

Erein sounpar epwiki samwa, Sounkadehdehn Siohwa kan kin kahluwa aramas akan ong Wehio. (Madiu 24:14) Sang ni arail kin doadoahngki pwuhk kan oh sang ni pein arail sawas kan, re kin nannanti en sewese aramas akan en loalokongkihla kupwuren Koht me ntingdi nan Paipel. Ahpw, arail doadoahk en kasukuhl me kin wiawi nan sampah pwon, sohte kin ihte kihong aramas akan koapworopwor en mour oh nsenamwahu ni uwe ieu me pahrekpene nan ahnsou kohkohdo ahpw pil kin pwain kamwahu kan ahnsouwet en irehdi kahpwal en sapahrek nanpwungen aramas akan. Kitail en kilang iaduwen met kin wiawi.

[Nting tikitik me mi pah]

[Blurb nan Pali 5]

Koht kupwurki me aramas koaros en ahneki ahnsou mwahu en mour oh nsenamwahu ni uwe ieu me pahrekpene.

Irehdi Kahpwal en Sapahrekpeseng Ong Lapalap En Aramas

Sounkapikadao pahn ahnsou keren wahdo irair en pahrekpene me aramas kin inengieng. Lao ahnsouwo pahn kohdo, kitail kak wiahda ewen kahk kan en irehdi kahpwal en sapahrekpeseng ong lapalap en aramas me kin lelohng kitail oh atail peneinei. Nin duwen me Nelson Mandela me mahso wia president en South Aperika koasoia, “dahme kitail kin wiahkihda dahme kitail ahneki, ahpw kaidehn dahme kohieng kitail, me kin katohrepeseng aramas akan.”

POADOAPOAD kasalehda mehlel en dahme e koasoia. Mie ohl oh lih tohto me sohte arail mehkot ni ahnsou me re ipwidi ahpw, pwehki re koadoahkehda dahme re ahnekiehr, kin pweida mwahu oh tohrohrsang iengerail kan me paiamwahu sang irail. Irail kan me kin paiamwahu sangete ahnsou me re ipwidi kin kalusala dahme re ahneki oh sohte kak pweida mwahu.

Doadoahngki Mwahu Dahme Ke Ahneki!

Sounkadehdehn Siohwa kan kin nsenohki sewese aramas akan en loalokongkihla kupwuren Koht ni en aramas pwukat pahn onopki Paipel. Ahpw, re wehwehki me