Sawehwe me pid Soumwahu

KISIN OWMADJI KIN SOUMWAHUKI MEHNTANG. Hawa, ah nohno, kin pwunodki me pahn sohla pilen mwenge nan paliwere; e rong me nein rien ah pahpa me kin mihmi nan kisin kousapwo ahpwtehn mehla nah kisin seri pwelel pwehki sounmwahu en mehntang. En Owmadji nohno kahlap, inen en Hawa ah pwoudo, men wahla Owmadji rehn sounkosetipw. Liho koasoia: “Ngehn suwed men me kahrehda serio en soumwahuda. Ke sohte men kihong serien mware mehn silasil pwehn perehdi ih, oh met kahpwal kan tepiada wiawi!”

IRAIR wet kin kalap wiawi wasa tohto nan sampah. Aramas rar rar kei kin kamehlele me ngehn suwed kan me kin kahrehda soumwahu. Met mehlel?

Sawehwe Wet Kohsang Ia?

Ele pein komwi sohte kin kamehlele me ngehn soh sansal kan me kin kahrehda soumwahu. Ni mehlel, ele ke pahn wahpwonki ia kahrepen aramas kin kak medemedewe me met mehlel, pwe saintis kan kasalehdahr me pali tohtohn soumwahu kan kin kohsang mwahs akan. Ahpw, tamataman me, sangete mahso tohnsampah sehse duwen kisin mwahs pwukat me kin kahrehda soumwahu. Aramas sehse kisin mour tikitik kan lao lel ahnsou me Antonie van Leeuwenhoek nan senturi kaiesek isuh wiahda misihn en kilangki kisin mour tikitik kan (microscope) me kahrehda aramas kakehr kilangki mesarail kisin mour pwukat. Pil ahnsowo, ihte pwehki dahme Louis Pasteur diarada nan senturi kaiesek duwau me pelien sains tepiada wehwehkihla kadoadoahkpen nanpwungen kisin mwahs akan oh soumwahu.

Pwehki nan pali moron en poadoapoad en tohnsampah aramas sehse dahme kin kahrehda soumwahu, lamalam en ketieni tohto wiawihda, iangahki padahk me dene ngehn suwed kan me kin kahrehda soumwahu. The New Encyclopædia Britannica kasalehda duwen ehu ahl me lamalam wet wiawihda. E koasoia me sounwini kan en mahs kin song en winieki me soumwahu kan soangsoangen kaleu en tuhke kan, tehntuhke kan, oh soahng teikan me re kak diarada. Ekei pak met kin doadoahk. Eri, sounwinio kin kapataiong winio tiahk oh wiewia tohto en ketieni kan, me kin mwomwen ekihla uhdahn winio me kamwahuwihala soumwahuwo pwe aramas en sehse. Sounwinio kin wia met pwe aramas kan en pousehlahte doadoahngki ah wini. Ni ahl wet, e sohte sansal dahme kahrehda wini kan kin doadoahk ekei pak oh ekei pak soh, eri, aramas kan kin perenki rapahki sawas sang manaman kan me soh sansal.

Wiepen wini pwukat kin kadoadoahkte nan sahpw tohto. Me tohto kin kose me dene ngehnin pahpa/nohno kahlap kan en mahs akan me melahr me kin kahrehda soumwahu kan. Meteikan kin koasoia me Koht me kin kahrehda kitail en soumwahu oh met iei kalokepen dipatail. Pil ni ahnsou me irail kan me sukuhl kin wehwehki duwen karepen aramas kin soumwahuda, irail kin masakte manaman en me soh sansal kan.

Sounwunahni kan oh sounwini kan kin doadoahngki mehn kamasak wet pwehn pitihki aramas kan. Eri, dahme kitail en kamehlele? E pahn wia sawas ehu en kilangwohng ngehn soh sansal kan pwehn kamwahuwihala atail soumwahu kan? Dahme Paipel kin mahsanih?

Iaduwen​—Tepil me kin Wiaiong Kitail en Soumwahuda?

SOUMWAHU SOHTE ANAHNE EN MIE. Koht ketin kapikada kitail en mour kohkohlahte ni roson mwahu unsek. Iei ih, Sehdan, ngehn soh sansalo, me kin kahrehda soumwahu, medek, oh mehla en kaloke peneinei en aramas kan ni ahnsou me e kahrehong tepin atail pahpa oh nohno, Adam oh Ihp, nan dihp.​—SENESIS 3:1-5, 17-19; ROM 5:12.

MET kin wehwehki me soumwahu koaros kin kohsang rehn ngehn soh sansal kan? Nin duwen me kitail tehkehr nan artikel en mwowe, aramas tohto nan rahnwet kin kamehlele duwen met. En kisin Owmadji nohno kahlapo kin kamehlele duwen met. Ahpw en Owmadji mehntango​—soumwahu ehu me ekei pak kin keper ong kisin seri kan nan wasa karakar kan​—uhdahn kohsang rehn ngehn soh sansal kan?

Dahme Sehdan Wia

Paipel kin sapengla peidek wet inenen sansal. Keieu, e kasalehda me ngehnin atail pahpa/nohno kahlap akan me melahr sohte kak lidere me momour kan. Ni ahnsou me aramas mehla, “re sohte ese mehkot.” Sohte ngehnerail me kin momourte mwurin mehla. Re memeir nan sousou, wasa me “sohte pahn mie wiewia, de lamalam, de loalokong, de erpit.” (Eklesiasdes 9:5, 10) Me melahr akan sohte kak kasoumwahuwihada me momour akan!

Ahpw, Paipel kasansalehda me mie ngehn suwed kan. Meno me tepin wiahda uhwongo iei ngehn soh sansal men me adaneki Sehdan. Meteikan iangala ih oh irail uhd adanekihla ngehn saut kan de “demon” (lokaiahn wai) kan. Sehdan oh nah ngehn saut kan kak kahrehda soumwahu? Mie pak me re kahrehda ekei aramas en soumwahuda. Ekei manaman akan me Sises kin ketin doadoahngki pwehn kamwahuwihala me soumwahu kan kin pidada kausesang ngehn saut akan. (Luk 9:37-43; 13:10-16) Ahpw, pali tohtohn soumwahu kan me Sises kamwahuwihala sohte kin tepsang rehn ngehn saut kan. (Madiu 12:15; 14:14; 19:2) Rahnwet, soumwahu kan kin kohsang mwahs akan, kaidehn sang rehn ngehn soh sansal kan.

Iaduwen Sehdan Kin Doadoahk?

Kereniong nan irair koaros, en Sehdan ah kin pidada en aramas soumwahu iei sang ni ire mehlelo me Sehdan kasonge tepin pwopwoudo, oh re pwupwudi nan dihp. Sehdan oh nah ngehn saut kan sohte kin uhdahn kahrehda soumwahu koaros. Ahpw, Sehdan sohte kin uhdisang en kamwekid kitail en wiahda koasoandi kan me sapwung oh kitail en kahmahmkihla atail pwoson, me kakete pil imwikihla kauwehla atail roson mwahu. E sohte doadoahngki akmanaman, kamaramas, de kalokehki Adam oh Ihp soumwahu. E kamehleleiong Ihp en sapeik ong Koht, oh Adam idawehnla oh iangala Ihp sapeik. Imwilahn met iei soumwahu oh mehla.​—Rom 5:19.

En Owmadji nohno kahlap song en kamehleleiong Hawa en doadoahngki mwaramwar oh kapwat kan sang rehn sounwunahni kan pwehn perehdi soumwahu kan. Dahme pahn wiawi ma Hawa pahn peikiong kaweid en ah pwoud ah nohno? E pahn kasalehda me e sohte kin likih unsek Siohwa Koht, oh e solahr koapworopworki me e pahn ketin pere ih.​—Eksodus 20:5; Madiu 4:10; 1 Korint 10:21.

Medemedewe me ngehn soh sansal kan kin uhdahn kahrehda soumwahu koaros me lelohng kitail