Sapwellimen Koht Ahnsou En Mweidong Lokolok En Mihmihete Kereniongehr Imwisekla

LOKOLOK kin mihmi wasa koaros. Paipel kin kamehlelehong kitail me “Koht iei limpoak.” (1 Sohn 4:8) Dahme kahrehda Koht limpoak menet kin mweidong lokolok en mihmihete erein senturi tohto?

Ni ahnsou Koht kapikada Adam oh Ihp, E ketin kapikada ira nin duwen aramas akan me saledek en wiahda pein ara pilipil kan. Oh met kin wia kisakis kaselel ieu, pwe “Koht eri inenen kupwurperenkihda wiepen nin lime pwukat koaros.” (Senesis 1:31) Kitail koaros anahne kesempwaliki oh kalahnganki kisakis en saledek en wiahda pein atail pilipil.

Ahpw, mie irepen kisakis wet. Koht ketin kapikada aramas akan en mih pahn sapwellime kosonned akan me kin pid kapikapikda kan, duwehte kosonned en gravity. Oh e pil kapikada aramas akan en mih pahn sapwellime kosonned akan me kin pid tiahk kan, me wiawihda pwen kahrehong aramas akan en miniminpene. Eri, ih kahrepe, sapwellimen Koht Mahsen kin kangoange kitail en: “Likih Kauno [“Siohwa,” New World Translation] ni mohngiongomw unsek. Dehr koapworopworki mehkan me ke pein lemeleme me ke ese.”​—Lepin Padahk 3:5.

Tepin aramas akan, Adam oh Ihp, sohte doadoahngki ara saledek en pilipil ni ahl me konehng. Ira me sapwung ni ara kin lemeleme me ara mour pahn kak pweida ma ira pahn uhtohrasang Koht. Ira pein nseneki en kauwehla sapwellime kosonned akan.​—Senesis, irelaud 3.

Irair Kesempwal Ehu​—Ihs Me Ahneki Pwung en Kaunda Aramas?

Ni ahnsou me Adam oh Ihp uhwong Koht, ira pil uhwong sapwellime kaunda, sapwellime pwung en kaunda aramas akan. Siohwa kakete kasorehla ira oh pwurehng wiahda pil ehu pwopwoud, ahpw met sohte pahn kapwungala irairen ihs kaunda me pwung oh kaunda me keieu mwahu ong aramas akan. Pwehki Koht mweidong ahnsou kan ong aramas en pein kekeirada ahr mour akan nin duwen pein arail madamadau kan, aramas akan pahn pein kasalehda ma kaunda me kin uhtohrasang Koht pahn kak pweida de soh.

Dahme poadopoad en aramas akan ni erein sounpar kid kei kin kasansalehda? Erein sounpar epwiki pwukat, mwersuwed oh lokolok kin mihmihete.

Sapwellimen Siohwa kanengamah en mweidong lokolok oh mwersuwed en mihmihete kereniongehr imwisekla. Koht pahn kereniongehr kapwungala koasoandi kan koaros en aramas akan. (Daniel 2:44) Koht pahn kauhdi lokolok ni ahl wet. E pahn kasorehla sampah suwed wet oh wiahda koasondi kapw ehu me “wasa me pwungen kalahngan en Koht pahn poadada ie poatopoat.”​—2 Piter 3:13.

Ia uwen kaperen Rongamwahu wet! Kitail anahne sampah kapw wet en pweida. Oh pil, kitail sohte men awih ni ahnsou reirei. Sang pweidahn kokohp kan en Paipel, kitail ese me, ni ahnsou keren, Koht sohlahr pahn mweidong lokolok en mihmihete.

Kapinga Siohwa Pwehki Soahng Kapwuriamwei Kan Me E Ketin Wiadahr!

“Ai mour kin kapinga Siohwa . . . pwehki soahng kapwuriamwei kan me Koht, Wasa Lapalahpie, ketin wiadahr rehi.”​—LUK 1:46-49, New World Translation.

1. Soahng kapwuriamwei dah kei kitail kin kapingahki Siohwa?

SIOHWA kin warohng ale kaping pwehki soahng kapwuriamwei kan me E ketin wiadahr. Ni ahnsou soukohp Moses koasoia ni oaretik duwen mehn Israel akan me pitsang Isip, e mahsanih: “Kumwail me kilangehr soahng kapwuriamwei pwukat koaros me Kauno [“Siohwa,” NW] ketin wiadahr.” (Deuderonomi 11:1-7) Oh pil, mwurin tohnleng Kapriel pakairki ong serepein meipwon Mery duwen ipwidien Sises, Mery mahsanih: “Ai mour kin kapinga Siohwa pwehki soahng kapwuriamwei kan me Koht, Wasa Lapalahpie, ketin wiadahr rehi.” (Luk 1:46-49) Nin duwen Sounkadehdehn Siohwa kan, kitail kin kapinga Ih pwehki soahng kapwuriamwei kan me E ketin wiadahr duwehte kapitala mehn Israel kan sang pahn kanaudok en mehn Isip kan oh wiewia kapwuriamwei me pid ipwidi en sapwellime Ohl.

2. (a) Dahme Koht “kupwurehda sang mwohn tepin kawa” kin wehwehki dah ong aramas peik kan? (b) Dahme Sohn kilangada nan deke en Padmos?

² Sapwellimen Siohwa wiewia kapwuriamwei tohto kin pid duwen “me e ketin kupwurehda sang mwohn tepin kawa” pwehn kapaiada aramas peik kan ki Mesaia oh sapwellime Wehi. (Episos 3:8-13) Dahme Koht kupwurehda sang mwohn tepin kawa kin kekeirada ni ahnsou me wahnpoaron Sohn me mahlahr aleier mweimwei en kilangada kaudiahl ehu, oh e kilangada wenihmw ehu ritida nanleng. E rongehr ngihl ehu, likamwete ngilen sowi me mahsanih: “Kohdahdo mahs met, pwe I pahn kasalehiong uhk mehkan me pahn wiawi ni ahnsou me pahn kohdo.” (Kaudiahl 4:1) Ni ahnsou me wehin Rom kalipala Sohn ong ni deke en Padmos “pwehki e kin kapahrengki mahsen en Koht oh wiewiahier doadoahk en sounkadehdehn Sises,” Sohn kilangada “kaudiahl me Sises Krais ketin kasaledahr.” Dahme wahnpoaron Sohn kilangada oh rongehr kin kasansalehda laud duwen dahme Koht kupwurehda, oh met kin kihong kitail kamarain ni pali ngehn oh kangoang ni ahnsou me konehng ong Kristian mehlel akan koaros.​—Kaudiahl 1:1, 9, 10.

3. Ihs me kin karasaiong irail elder 24 me Sohn kilangada nan kaudiahlo?

³ Sohn kilangada sang wenihmw ehu me ritida nanleng, elder 24 me mwomwohd pohn mwoalarail kan oh ahneki nihn duwehte nanmwarki kan. Re kin poaridi mwohn Koht oh kin koasoia met: “Maing at Kaun [“Siohwa,” NW] oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaudiahl 4:11) Elder pwukat kin karasaiong irail Kristian me keidi kan koaros me iasadahng pwais kaselel me Koht ketin inoukihong irail. Irail kin kapinga Siohwa pwehki sapwellime wiewia kapwuriamwei kan me E kin ketin wiaiong sapwellime kapikapikda kan. Kitail pil kin pwuriamweikihla duwen sapwellimen Siohwa “manaman me poatopoat oh ih uhdahn Koht mehlel.” (Rom 1:20) Oh ni atail pahn kalaudehla atail sukuhliki duwen Siohwa, kitail pahn ahneki kahrepe tohto en kapingahki Ih duwen sapwellime wiewia kapwuriamwei kan.

Kalohkiseli Sapwellimen Siohwa Wiewia kan me Warohng Atail Kaping!

4, 5. Kihda karasaras kan ong iaduwen Depit kin kapinga Siohwa.

⁴ Sounmelkahka Depit kin kapingahki Koht sapwellime wiewia kapwuriamwei kan. Karasepe ieu, Depit koulki: “Kumwail koulki koulen kaping ong Kauno, me kin kakaun Saion! Kumwail lohkihong wehi koaros dahme e ketin wiadahr! Maing Kaun, komw ketin kupwurkalahngan ong ie! Komw mahsanih kalokolok kan me ei imwintihti kan kin wiahiong ie! Maing Kaun, komw ketin kapitiesang mehla, pwe I en kak uh mwohn mehn Serusalem kan oh koasoia mehkoaros me I kin kapikapingahki komwi.” (Melkahka 9:11, 13, 14) Mwurin Depit kihong sapwellime ohl Solomon pilahn en kauwada Tehnpas Sarawio, Depit kapinga Koht oh mahsanih: “Kauno [“Siohwa,” NW], Koht kapingpomwi en kin wiawi met oh pil kohkohlahte. Komwi me lapalahpie oh roson, manaman, lingan, oh wahu. . . . Sapwellimomwi mehkoaros me mi pahnlahng oh nin sampah, oh komwi me nanmwarki, kaun lapalap en mehkoaros. . . . Eri, Maing at Koht, se kapingkalahngan ong komwi, oh se kapinga mwaromwi lingan.”​—1 Kronikel 29:10-13.

⁵ Pwuhk Sarawi kin kalap luhke kitail​—ei, kangoange—​kitail en kapinga Koht, duwehte me Depit kin wia. Pwuhken Melkahka kan kin audaudkihda lepin koasoi tohto me kin kapinga Koht, oh Depit ntingdi elep en koul pwukat. E kin ahnsou koaros kapinga oh kalahnganki Siohwa. (Melkahka 69:30) Oh pil sangete mahs, aramas akan kin doadoahngki nting kan en Depit oh meteikan pwehn kapinga Siohwa.

6. Iaduwen Melkahka kan me kohsang rehn Koht kin wia katapan ong kitail?

⁶ Melkahka kan kin sewese laud sapwellimen Siohwa tohnkaudok akan! Ni ahnsou me kitail men kasalehda atail kalahngankihong Koht sapwellime wiewia kapwuriamwei kan me E kin wia ong kitail, kitail kak medemedewe duwen mahsen kaselel kan me dierekda nan pwuhken Melkahka. Karasepe ieu, ni ahnsou kitail pahn pirida ni menseng, kitail men doadoahngki lepin lokaia kan me duwehte mahsen pwukat: “Maing Kaun [“Siohwa,” NW], ia uwen mwahu en ei kin patohwan wia ei kapingkalahngan ong komwi, ei kin koul oh patohwan kawauwih komwi, Koht Wasa Lapalahpie, ei kin lohkiseli nimenseng koaros sapwellimomwi limpoak poatopoat, oh nipwong sapwellimomwi loalopwoat, . . . Maing Kaun, wiepen nin limomwi manaman akan kin kansenamwahuwihiehla; pwehki sapwellimomwi wiewia kan, I patohwan koulki ei peren.” (Melkahka 92:1-4) Ni ahnsou me kitail kin powehdi mehn kerempwa kan ong atail kekeirada ni pali ngehn, kitail kak kasalehda atail peren oh kalahngan ki kapakap, nin duwen sounmelkahkao koulki: “Kumwail patohdo, kitail kapinga Kauno! Kitail ngisingiski atail peren ong Koht me kin ketin sinsilei kitail! Kitail patohwanlahng atail kapingkalahngan mwohn silangi oh pereperen kokoulki koulen kaping.”​—Melkahka 95:1, 2.

7. (a) Dahme kesempwal kitail en wehwehki duwen tohtohn koul kan me Kristian akan kin kokoulki? (b) Ia ehu kahrepe kitail anahne mwadangodo lel ni mihding kan oh mihmihte lel ni imwin mihdingo?

⁷ Kitail kalap, ni ngihl laud, wia koul kan en kapinga Siohwa nan atail mihding en mwomwohdiso kan oh atail kapokon kan. E kesempwal en wehwehki me pali laud en koul pwukat kin poahsoanda pohn pwuhken Melkahka me kin pwilsang rehn Koht. Meid pai kitail nan rahnpwukat pwe kitail kin ahneki koul en kaping tohto ong Siohwa! Koulkihong Koht koulen kaping kin wia kahrepe mwahu en mwadangdohng atail mihding kan oh mihmihte lao lel mihding kan nek, oh ni ahl wet kitail kak iang iengatail tohnkaudok akan en kapikapinga Siohwa ki koul oh kapakap.

“Kumwail Kapinga Siohwa!”

8. Ia wehwehn lepin lokaia “Hallelujah”?

⁸ Lepin lokaia wet: “Hallelujah” kin wehwehki “Kapinga Siohwa,” oh met kin kohsang lepin lokaiahn Ipru me kereniong ahnsou koaros kin wehwehki “Kumwail aramas akan, kapinga Siohwa.” Karasepe ieu, nan pwuhken Melkahka 135:1-3, kitail wadek duwen luhk wet: “Kumwail aramas akan, kapinga Siohwa! Kapinga mwaren Siohwa, kumwail sapwellimen Siohwa ladu kan, me kin iang papah nan Tehnpas en Siohwa, nan Tehnpas en atail Koht. Kumwail aramas akan, kapinga Siohwa, pwehki ih me ketin kupwur mwahu. Kumwail kapinga mware pwehki ih me ketin kupwur kadek.”

9. Dahme kin kamwekid kitail en kapinga Siohwa?

⁹ Ni ahnsou kitail kin doudouloale duwen sapwellimen Koht wiewia kapwuriamwei kan me kin pid kapikapikda kan oh sapwellime wiewia kan ong kitail, kalahngan me kin kohsang mongiongatail kan kin kamwekid kitail en kapinga Ih. Ni ahnsou me kitail kin medemedewe duwen soahng kapwuriamwei kan me Siohwa ketin wiaiong sapwellime aramas akan ni ahnsoun mahs, mohngiongatail kan kin pil kamwekid kitail en kapinga Ih. Oh pil, ni ahnsou me kitail kin doudouloale duwen sapwellimen Siohwa inou kaselel kan me E pahn ketin wia, kitail kin kapinga oh kasalehda kalahngan ong Siohwa.

10, 11. Iaduwen pein atail mour kin kihda kahrepe mwahu ehu en kapinga Koht?

¹⁰ Ma kitail kin medemedewe duwen pein atail mour, e kin kihong kitail kahrepe mwahu en kapinga Siohwa. Depit koulki: “I kin patohwan kapingahkin komwi [Siohwa] omwi lemmwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.” (Melkahka 139:14) Ei, kitail “wiawihda kaselel” oh kitail ahneki kisakis kesempwal kei duwehte kitail kak kilangki mesatail kan, rongorong, oh medemedewe duwen mehkot. E soh konehng kitail en momourki ni ahl me pahn kapinga Sounkapikpatail? Pohl pil mahsanih duwen met ni ahnsou me e ntingihdi met: “Eri, mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.”​—1 Korint 10:31.

¹¹ Ma kitail kin uhdahn poakohng Siohwa, kitail pahn wia soahng koaros pwehn kapinga Ih. Sises kasalehda duwen kosonned me keieu kesempwal: “Eri, ke uhdahn pahn poakohng Kauno [“Siohwa,” NW], amwail Koht, nan kapehdomw unsek, ngehnomw unsek, omw lamalam koaros unsek, oh omw kehl unsek.” (Mark 12:30; Deuderonomi 6:⁠5) Kitail en poakohng Siohwa oh kapinga Ih nin duwen Sounkapikpatail oh Ih me ketikiong kitail “soangen wiawi sapan koaros oh kisakis mwahu koaros.” (Seims 1:17; Aiseia 51:13; Wiewia 17:28) E konehng kitail en wia met, pwehki atail madamadau en kasawihada dahme pwung, atail kehl ni pali ngehn, oh kehl ni paliwar​—atail irair akan oh koahiek kan—​kin kohsang rehn Siohwa. Nin duwen Sounkapikpatail, e kin konehng kitail en poakohng oh kapinga Ih.

12. Ia ahmw pepehm ong sapwellimen Siohwa wiewia kapwuriamwei kan oh pil mahsen kan nan pwuhken Melkahka 40:5?

¹² Ma kitail pahn medemedewe duwen sapwellimen Siohwa wiewia kapwuriamwei kan, mie kahrepe tohto kitail en poakohng oh kapinga Siohwa! Depit koulki, “Maing Kaun [“Siohwa,” NW], at Koht, ia uwen tohtohn soahng kapwuriamwei kan me komw ketin wiahiong kiht; sohte emen mie me duwehte komwi! Ia uwen tohtohn koasoandi kan me komw ketin wiahiong kiht! Ma I pahn song en kasalehda koaros, re uhdahn pahn tohtohsang me I kak kasalehda!” (Melkahka 40:5) Depit sohte kak ni oaretik koasoia duwen sapwellimen Siohwa wiewia kapwuriamwei kan koaros, oh kitail pil sohte kak wia met. Ahpw, kitail ni ahnsou koaros kapinga Koht ni ahnsou me kitail kin sukuhliki duwen ehu sapwellime wiewia kapwuriamwei kan.

Wiewia kan me kin Utungada Dahme Koht Kupwurehda Sang Mwohn Tepin Kawa

13. Iaduwen atail koapworopwor kin pid sapwellimen Koht wiewia kapwuriamwei kan?

¹³ Atail koapworopwor ong ni ahnsou kohkohdo kin pid soahng kapwuriamwei kan me wiawiehr oh kin pid sapwellimen Koht kupwur sang mwohn