tohto me I tepiada kapwaiada dahme I sukuhliki. Mwurin mwo, I koasoanehdi nan kapehdei en idawehnla elen mour en Kristian oh papidaisla. Ahnsouwet, ngehi oh ahi pwoud kin sewese meteikan en paiekihda erpit en Koht.”

Beatriz kin kousoan nan Caracas, Venezuela oh kin iang kisehn koasoandi en pwihn en aramas kan me ilesang pwihn teikan. Ahpw, e mweisangehr eh pwoudo oh e kin nsensuwed laud. Ni eh pwunod, e kin kapakap reirei awa tohto. Mandahn rahno, pehl en eh wenihmwo sek. Ni eh lingeringerki met, e kilangweisang nan kisin pwoahr nan eh wenihmwo oh kilangada aramas riemen me weuwa ehd kei. Beatriz mwomwehda me sohte tohnihmwo, ahpw mwohn aramas riemeno mwesel, re nihdolong pahn wenihmwo kisin doaropwe ehu. Oaralap en doaropwe koasoia: “Esehla Noumw Pwuhk Sarawi.” Ara pwarek imweo kin pid kapakap pwohngo? E eker ira en pwurodo. Sohte pwand, e kin wie onohnop Paipel, oh mwuri, e papidaisla. Met Beatriz nsenamwahulahr oh e kin padahkiong meteikan iaduwen ren kak diarada nsenamwahu mehlel.

Carmen kin kapakapki eh kahpwal en semwehmwe. E naineki seri ehk oh eh pwoud, Rafael, kin wia emen sounkamamsakau. Carmen koasoia: “I song en koadoahkehda mwohni ni ahi kin lopwolopw ong meteikan.” Ahpw, en Rafael kamamsakau wie susuwedla. “E sohte mwahula lao lel se tepida onop Paipel rehn Sounkadehdehn Siohwa kan me ahi pwoudo tepiada wekila. Se sukuhliki duwen sapwellimen Siohwa inou me pid Wehin Koht​—me Siohwa pahn ahnsou keren kihsang nan sampah mouren semwehmwe oh lokolok. Ahi kapakap ong Koht eri pasapengla!” Sukuhliki duwen elen Siohwa kan sewese Rafael en uhdi sang kamamsakau, oh e pwuhriong “irair en aramas kapw.” (Episos 4:24) Ih oh eh peneinei kakehr kamwahuwihala arail elen mour. Rafael koasoia: “Se sohte kepwehpwe, oh sohte pein imwat, ahpw se ahneki anahne akan en mour oh se nsenamwahu.”

Ni Ahnsou me Kapakap Koaros Pahn Pasapengla

Mie mehkot katapan me kapakap wiahiong aramas pwukat? Ehi, uhdahn! Oh ke pil tehk me pali laud en arail kapakap kan kin pasapengla ni ahnsou me emen sang mwomwohdisohn Kristian sewese irail en karanihla Siohwa Koht ni ahr onop Paipel?​—Wiewia 9:11.

Eri, mie kahrepe mwahu kan kitail en kapakap. Ahnsou keren, kapakap me Wehin Koht en kaunda sampah oh kupwuren Koht en wiawi sampah pahn pasapengla. (Madiu 6:10) Mwurin Koht pahn kamwakelehsang sampah irail ko me kin uhwong Ih, “sampah pahn uhdahn dirkihla loalokong en Siohwa.” (Aiseia 11:9, New World Translation) Eri, irail koaros me poakohng Siohwa pahn paiekihda “saledek lingan en seri en Koht”​—oh arail kapakap kan uhdahn pahn pasapengla.​—Rom 8:18-21.

Kristian Kan Kin Diarada Peren Ni Ahr Kin Papah

“Kihwei kaperen sang ale.”​—WIEWIA 20:35.

1. Madamadau sapwung dahieu kin tohtohla nan rahnpwukat, oh dahme kahrehda e keper?

EREIN sounpahr kan ni imwin senturi me ahpwtehn neko, aramas akan kin kalapw doadoahngki lepin lokaiahn wai: “me-ism.” “Me-ism” kin wehwehki “ngehi mahs” oh kin kasansalehda irairen roporop oh noahrok iangahki irair me aramas sohte kin nsenohki aramas teikan. Oh pil, kitail kak kamehlele me nan pahr akan sang pahr 2000 kohla, irairen “me-ism” pahn wiwiawihte. Pak tohto ke kin rong peidek wet, “Iaduwen pein ngehi pahn kak paiekihda sang met?” Irair en roporop ong pein emen sohte pahn kak kahrehong ih en ahneki peren. Irair wet kin weksang dahme Sises mahsanih: “Kihwei kaperen sang ale.”​—Wiewia 20:35.

2. Karasepe dah kei kin kasansalehda me kihkihwei me kaperen sang ale?

² E mehlel me kihwei kaperen sang ale? Ei, medewehla duwen Siohwa Koht. Ih me “poahsoan en mour koaros.” (Melkahka 36:9) E ketikihong kitail soahng koaros me kitail anahne pwehn nsenamwahu oh peren. Mehlel, Ih me kin wia utupen “sapan koaros oh kisakis mwahu koaros.” (Seims 1:17) Siohwa, me iei Ih “Koht peren,” kin ahnsou koaros kihkihwei. (1 Timoty 1:11) E kin ketin loalloale aramas akan oh kin ketikihong irail soahng tohto. (Sohn 3:16) Nna, pil medewehla duwen peneinei ehu. Ma kowe pahpa men de nohno men, mwein ke kin ese ia uwen tohnmetei kan me ke kin wia pwehn kekeirada seri men. Erein sounpahr tohto, seri sohte kin ese soangen tohnmetei kan me ke kin wia. E sohte kin tehk mehpwukat koaros. Ahpw, ke kin perenki kilang noumw seri kekeirada pwehki omw kin kihda tohnmetei laud. Pwekihda? Pwehki ke kin poakohng ih.

3. Dahme kahrehda e wia mehkot kaperen en papah Siohwa oh ienge tohnkaudok akan?

³ Ni ahl duwehte met, kihda tohnmetei kan me kin poahsoankihda limpoak kin wia kilelepen kaudok mehlel. Pwehki kitail kin poakohng Siohwa oh iengatail tohn kaudok akan, kitail kin perenki papah irail oh wia tohnmetei kan ong irail. (Madiu 22:37-39) Ahpw, emen me kin wia kaudok ni e kin roporop ong pein ih sohte pahn ale peren mehlel. Ahpw, irail akan me kin papah ni soh-roporop oh kin nsenohki dahme re kak kihwei oh sohte kin medemedewe dahme re pahn ale: re pahn kak diarada peren mehlel. Kitail kak wehwehki duwen mehlelpen met ni atail pahn tehk duwen iaduwen aramas akan kin doadoahngki ekei lepin lokaia kan nan Pwuhk Sarawi me kin pid duwen atail kaudok. Kitail pahn koasoaiapene lepin lokaia siluh nan artikel wet oh artikel en mwuhr.

Sapwellimen Sises Doadoahk ong Kamwahupen Wehi Pokon

4. Ia mwomwen “doadoahk ong kamwahupen wehi pokon” nan pelien Kristendom?

⁴ Ni lokaiahn Krihk en mahs, lepin lokaia kesempwal ehu me kin pid kaudok iei lei·tour·giʹa, oh New World Translation kin kawehwehda lepin lokaia wet “doadoahk ong kamwahupen wehi pokon.” Nan pelien Kristendom, lepin lokaia wet lei·tour·giʹa kin wiahda pil ehu lepin lokaia: “liturgy.”a Ahpw, liturgy en Kristendom kan sohte kin wia doadoahk ong kamwahupen wehi pokon ni ahl me katapan.

5, 6. (a) Doadoahk ong kamwahupen wehi pokon dahieu me wiawi nan wehin Israel, oh kapai dah kan kohwong irail? (b) Mehnia doadoahk ong kamwahupen wehi pokon me wiliandi doadoahko me wiawi nan Israel, oh dahme kahrehda?

⁵ Wahnpoaron Pohl doadoahngki lepin lokaiahn Krihk ehu me kin pid lei·tour·giʹa ni ahnsou me e mahsanih duwen samworo kan en wehin Israel. E mahsanih: “Samworo en mehn Suhs koaros kin wiewia ar doadoahk [lepin lokaiahn Krihk me e doadoahngki wasaht kin pid lei·tour·giʹa] rahn koaros pwehn wia doadoahk ong kamwahupen wehi pokon oh pil wiewiahte soangen meirongkohte pak tohto.” (Ipru 10:11, New World Translation) Samworo mehn Lipai kan kin wia doadoahk kesempwal ong kamwahupen wehi pokon nan wehin Israel. Irail kin padahkiong aramas akan sapwellimen Koht Kosonnedo oh re kin pil wia meirong kan me pahn pwaindi dipen aramas akan. (2 Kronikel 15:3; Malakai 2:7) Ni ahnsou me samworo kan oh aramas akan kin idawehn sapwellimen Siohwa Kosonnedo, wehio kin inenen peren.​—Deuderonomi 16:15.

⁶ E kin wia pwais kaselel ong irail mehn Israel samworo kan ni ahr kin wia doadoahk ong kamwahupen wehi pokon, ahpw ahr doadoahk sohlahr katepe ni ahnsou me Koht soikala irail pwehki arail salelepek. (Madiu 21:43) Ahpw, Siohwa koasoanehdi mehkot me laudsang met en wiawi​—iei doadoahk ong kamwahupen wehi pokon sang rehn Sises, Samworo Lapalapo. Me kin pid ih, kitail wadek: “A Sises kin ketin ieias kohkohlahte, oh sapwellime doadoahk en samworo kin poatopoatete. Eri, e ketin kak met, oh ahnsou koaros, komourala irail kan me kin patohdo rehn Koht ni mware, pwehki eh ketin ieias kohkohlahte pwe en kin louloukin irail rehn Koht.”​—Ipru 7:24, 25.

7. Dahme kahrehda sapwellimen Sises doadoahk ong kamwahupen wehi pokon pahn wahdohng aramas akan kapai kan me siksang koaros?

⁷ Sises pahn wia doadoahk en samworo ni ahnsou kohkohlahte oh e sohte anahne emen en wiliandi ih. Ihme kahrehda, kitail wehwehki me ih kelepw pahn kak doarehla aramas akan. E kin wiahda doadoahk ong kamwahupen wehi pokon me kin siksang dahme aramas kak wia, pwe Sises sohte kin papah nan Tehnpas Sarawi me aramas wiahda, ahpw e kin papah nan sapwellimen Siohwa koasoandi lapalap en kaudok me tepida nan pahr 29 C.E. oh ni ahnsouwet Sises kin papah nan Wasa Sarawiheo, iei nanleng. Ih me “ladun wehi pokon [lei tour·gosʹ] nan Wasa Sarawihe, iei nan impwal sarawi mehlelo me wiawihkihda nin limen Koht, kaidehkin ni pehn aramas.” (Ipru 8:2; 9:11, 12) Edetehn Sises kin sapwellimaniki pwukoa laud ehu, e pil kin wia “laduhn wehi pokon.” E kin doadoahngki sapwellime manaman laud pwehn kihkihwei, kaidehn ale. Soangen kihkihwei kin kahrehong ih en sapwellimaniki peren. Met iei kisehn “peren me e kasikasik” oh met kin kakehle ih en dadaurete ni ahnsou me e ketiket sampah.​—Ipru 12:2.

8. Iaduwen Sises wia doadoahk ong kamwahupen wehi pokon pwehn wiliandi Kosonnedo?

⁸ Pil mie ehu sawas sang sapwellimen Sises doadoahk ong kamwahupen wehi pokono. Pohl ntingihdi: “Ahpw met, Sises aleier doadoahk ong kamwahupen wehi pokon me siksang mehlel doadoahk en samworo teiko, duwehte inou lap me e ketin kadokepene nanpwungen Koht oh aramas akan eh siksang mehn mahso, pwehki eh ketin poahsoanehkihda inou lapo soahng kan me mwahu kowahlahpie.” (Ipru 8:6, NW) Moses kin kadokepene nanpwungen Siohwa oh mehn Israel kan ong inou me wia poahsoanpen ehupene me mih nanpwungen Siohwa oh wehin Israel. (Eksodus 19:4, 5) Sises kin kadokepene nanpwungen Siohwa oh me keidi kan ong inou kapw ehu, oh met kin kahrehong ipwidi en wehi kapw ehu, “Israel en Koht,” me wiawihkihda irail Kristian me keidi kan oh irail me keidi kan kin kohsang wehi tohto. (Kalesia 6:16; Ipru 8:8, 13; Kaudiahl 5:9, 10) Ia uwen kaselel doadoahk ong kamwahupen wehi pokon wet! Meid pai kitail pwe kitail kin esehla Sises, ladun wehi pokon me kitail pahn kak ale sawas en papah Siohwa ni pwung!​—Sohn 14:6.

Kristian akan Pil kin Wia Doadoahk ong Kamwahupen Wehi Pokon

9, 10. Soangen doadoahk dah kei ong kamwahupen wehi pokon me Kristian akan kin wia?

⁹ Sohte aramas men pahn kak wia doadoahk ong kamwahupen wehi pokon duwehte me Sises kin wia. Ahpw, ni ahnsou me irail Kristian keidi kan pahn ale arail kisakis en kohdahla nanleng, re pahn mih limwahn Sises oh pil pahn iang ih doadoahk ong kamwahupen wehi pokon nin duwen nanmwarki kan oh samworo kan. (Kaudiahl 20:6; 22:1-5) Ahpw, Kristian akan nin sampah pil kin iang wia doadoahk ong kamwahupen wehi pokon, oh re pil kin diar peren laud ni ar kin wia doadoahk wet. Karasepe ieu, ni ahnsou lehk lapalap wiawi nan sapwen Palestine, wahnpoaron Pohl wahda sawas kan me kohsang brother kan nan Iurop pwehn sewese irail Kristian mehn Suhs akan nan Sudia. Met wia doadoahk ong kamwahupen wehi pokon. (Rom 15:27; 2 Korint 9:12) Rahnwet, Kristian akan pil kin perenki kihda soangen sawas, ni ahr kin mwadangete sewese riarail brother oh sister kan me kin lelohng kahpwal akan duwehte rerrer en sahpw, melimel kan de kahpwal teikan.​—Lepin Padahk 14:21.

¹⁰ Pohl mahsanih duwen pil ehu elen doadoahk ong kamwahupen wehi pokon ni e ntingihdi met: “Mweinele ntahi pahn pwilwei, rasehng pilen meirong ehu pohn mehn meirong me amwail pwoson pahn meirongkihong Koht. Eri, ma ih pahn duwe, I pahn perenki, oh I pahn iang kumwail koaros pereperen.” (Pilipai 2:17) Doadoahk laud me Pohl wiaiong mehn Pilipai kan kin wia doadoahk ong kamwahupen wehi pokon me kin wiawi ni elen limpoak oh nannanti. Doadoahk ong wehi pokon duwehte met pil kin wiawi nan rahnpwukat, keieu sang rehn irail Kristian me keidi kan, me kin papah nin duwen “ladu lelepek oh loalokong,” oh kin kihda mwengehn ngehn ni ahnsou me konehng. (Madiu 24:45-47) Oh pil, nin duwen pwihn ehu, irail kin wia “pwihn samworo ehu,” oh irail kin pwukoahki “patohwandahng Koht meirong kan ni mwaren Sises Krais” oh pil kin pwukoahki “kalohkiseli wiewia kapwuriamwei kan en nin limen Koht, me ketin malipei iraildo sang nan rotorot ong nan sapwellime marain lingaling.” (1 Piter 2:5, 9) Duwehte Pohl, re kin perenki pwais pwukat edetehn irail kin ni karasaras ‘rasehng pilen meirong ehu pohn mehn meirong’ ni ahr kin kapwaiada ahr pwukoa kan. Iengerail “sihpw teikan” pil kin iang utungada doadoahk en kalohkihong aramas akan duwen Siohwa oh sapwellime kupwur kan.b (Sohn 10:16; Madiu 24:14) Ia uwen kaselel oh kaperen doadoahk wet ong kamwahupen wehi pokon!​—Melkahka 107:21, 22.

Wiewia Doadoahk Sarawi

11. Iaduwen lih soukohp Ana wia mehn kahlemeng mwahu ong Kristian kan koaros?

¹¹ Pil mie lepin lokaiahn Krihk me kin pid duwen atail kaudok, la·treiʹa, oh New World Translation kin kawehwe lepin lokaia wet: “doadoahk sarawi.” Doadoahk sarawi kin pid duwen wiewia kan nan kaudok. Karasepe ieu, lih soukohp men mware Ana e liohdilahr oh sounpahrehr 84 oh “e kin kaukaule iang towehda tuhpene kan nan Tehnpas Sarawio, oh kin wiewia doadoahk sarawi [iren Paipel wet kin doadoahngki lepin lokaiahn Krihk me kin duwehte lepin lokaia la·treiʹa] nipwong nin rahn e kin kaisihsol oh kapakap.” (Luk 2:36, 37, NW) Ana kin ngidingidki kaudokiong Siohwa ahnsou koaros. E wia mehn kahlemeng mwahu ong kitail koaros​—pwulopwul oh mah, ohl oh lih. Duwehte Ana me kin wie kapakap ngidingid ong Siohwa oh rahn koaros kaudokiong Ih nan Tehnpas Sarawio, atail doadoahk sarawi pil kin oarepene kesempwalpen wie kapakap oh kaukaule iang towehda mihding kan koaros.​—Rom 12:12; Ipru 10:24, 25.

12. Ia pil ehu wiewia kesempwal en atail doadoahk sarawi, oh iaduwen doadoahk wet kin pid doadoahk ong kamwahupen wehi pokon?

¹² Wahnpoaron Pohl mahsanih duwen wiewia me keieu kesempwal en atail doadoahk sarawi ni e ntingihdi met: “Eri, Koht me I kin wia ai doadoahk sarawi sang nan mohngiongi unsek ni ei kin lohkiseli Rongamwahu duwen Sapwellime Iehros, iei ih me sounkadehde mehlel en ei koasoiet. Koht ketin mwahngih me I kin tamataman kumwail ahnsou koaros nan ei kapakap akan.” (Rom 1:9, NW) Ei, doadoahk en kalohki Rongamwahu kaidehn ihte doadoahk ong kamwahupen wehi pokon ahpw pil doadoahk me kisehn atail kaudok ong Siohwa Koht. Mendahki kitail kin tuhwong aramas akan me kin perenki rong de soh, doadoahk en kalohk kin wia doadoahk sarawi me kin kohwong Siohwa. Kitail kak ahneki peren laud ma kitail pahn nannanti padahkiong meteikan duwen sapwellimen Siohwa irair kaselel kan oh sapwellime kupwur kan.​—Melkahka 71:23.