Pwihn en “ladu lelepek oh loalokong” kin ahnsou koaros kangoange kitail en wia. Kaweid wet kin wiawi pwehki ma kitail men momourki inou me kitail wiahda, eri kitail anahne kaukaule kapwaiada sapwellimen Koht padahk mehlel. Ma sapwellimen Siohwa pwihn kin utungada padahk likamw akan, irail sohte pahn kaweidih Sounkadehdehn Siohwa kan oh aramas teikan en wadek Paipel.

15. (a) Dahme kitail anahne medemedewe ni ahnsou me kitail kin wiahda atail pilipil kan? (b) Dahme kahrehda doadoahk ong mwohni ong irail Kristian akan kin wia doadoahk ieu me sohte nohn kesempwal?

¹⁵ Ni ahnsou me ke pahn wiahda omw pilipil kan, ahnsou koaros medemedewe iaduwen ahmw pilipil pahn sewese iuk en kapwaiada ahmw inou ong Siohwa de soh. Met pahn kak pid duwen ahmw doadoahk en mwohni. Ke pilahn en koasoanehdi ahmw doadoahk pwe ke kak kalaudehla ahmw ansoun utungada kaudok mehlel? Pali laud en kaun en doadoahk kan kin ese me Kristian akan me inoukihda arail mour ong Koht wia aramas likilik oh kin wia mwahu arail pwukoa kan oh re pil kin kilang me Sounkadehdehn Siohwa kan sohte kin men ahneki pwukoa laud oh siaiong aramas teikan pwen alehdi pwukoa en doadoahk laud kan. Pwe mehn akadei kan en irail Sounkadehde kan kaidehn en alehdi mwohni tohto, de wiahla aramas ndand, de waunla rehn aramas akan de alehdi manaman. Ahpw, mehkot me keieu kesempwal ong irail akan me kin kapwaiada arail inou ong Koht, iei en kapwaiada kupwuren Koht. Doadoahk en mwohni kin sewese irail en alehda anahn akan en mour, ong irail, doadoahk wet kin wia doadoahk keriau en kesempwal. Duwehte wahnpoaron Pohl, sapwellime doadoahk me keieu kesempwal iei doadoahk en Kristian. (Wiewia 18:3, 4; 2 Deselonika 3:7, 8; 1 Timoty 5:8) Ke kin rapahki mahs Wehio?​—Madiu 6:25-​33.

16. Dahme kitail kak wia ma kitail kin nohn daulihla pwunodki mehkot oh met kin kahrehong kitail en apwaliki kapwaiada atail inou ong Koht?

¹⁶ Ekei kin ele direkihla pwunod akan mwohn arail sukuhliki padahk mehlel. Ahpw, arail mongiong kin dirkihla peren, kalahngan, oh limpoak ong Koht ni ahnsou irail kamehlele koapworopwor en Wehio! Medemedewe duwen kapai kan me re paiekihda sang ni ahnsowo lel met, mwein pahn kak sewese irail en kapwaiada arail inou ong Siohwa. Ni pali teio, dahme kitail pahn wia, ma pwunod akan me kin pid kahpwal nan mour nin sampah wet kin kasok kitailla oh sohte mweidong “mahsen en Koht,” en kekeirada nan loal atail, duwehte me dihpw teketek ko kin kerempwa kisin tuhke kan en dehr kekeirada oh wah? (Luk 8:7, 11, 14; Madiu 13:22; Mark 4:18, 19) Ma ke pehmada me met kin tepiada wiawiong uhk oh ahmw peneinei, mweidong Siohwa omw pwunod kan koaros oh kapakapki me e pahn ketin sewese iuk en kalaudehla ahmw limpoak oh kalahngan. Ma ke mweidong Siohwa ahmw pwunod kan, E pahn ketin sewese iuk oh ketikihong uhk kehl me anahn pwen sewese iuk en kaukaule papah Ih ni peren oh mohngiong lelepek.​—Melkahka 55:22; Pilipai 4:6, 7; Kaudiahl 2:4.

17. Iaduwen kitail pahn kak powehdi kasongosong laud kan?

¹⁷ Ken kaukaule kapakap ong Siohwa Koht, duwehte me ke wia ni ahnsou me ke inoukihong Ih ahmw mour. (Melkahka 65:2) Ni ahnsou me ke kin lelong kasongosong ieu en wiahda dahme sapwung de lelohng apwal laud ieu, rapahki sapwellimen Koht kaweid oh sawas pwen kak kapwaiada sapwellime kaweid. Medemedewe me kitail anahne ahneki pwoson, pwe tohnpadahk Seims ntingihdi met: “Ma emen rehmwail anahne erpit, a en kapakap oh peki rehn Koht, oh Koht ahpw pahn ketikihong, pwe Koht me kupwursapan oh kalahngan ong aramas koaruhsie. Ahpw kumwail uhdahn pahn kapakap ni pwoson oh sohte peikasal; pwe me kin peikasal rasehng iloak en nan madau kan me kin pwungupwungudengkiseli kisinieng. Soangen aramas menet sohte kak koasoanehdi eh lamalam, oh pil aramas kohweikohdo ni eh mwekid koaros, eri, en dehr lemehiong me e pahn kak ale mehkot sang rehn Kauno.” (Seims 1:5-8) Ma kasongosong ieu kin mwomwen nohn laud ong kitail, eri kitail kak liki met: “Pwe songosong koaros me kin lelohng kumwail, ih me kin lelohng aramas koaros. Koht me uhdahn mehlel, oh E sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.”​—1 Korint 10:13.

18. Dahme kitail kak wia ma kitail wiahda ni rir dihp laud ieu, oh e kin kaluwetala dahme kitail koasonehdi nan kapehditail kan en momourki atail inou ong Siohwa?

¹⁸ Ahpw, dahme ke kak wia ma ke wiahda ni rir dihp laud ieu me kin lidere ahmw nsen mwakelekel oh ke pehm me ke luwetala oh solahr kin wia dahme ke koasonehdi nan kapehdomw ahnsou me ke inoukihong Koht ahmw mour? Ma ke koluhkihla dipomw, ke kak likih me Siohwa ‘sohte pahn soikala koluhla mehlel oh peik en nan kapehd.’ (Melkahka 51:17) Rapahki sawas sang rehn irail Kristian elder limpoak kan, oh likih me irail kin kahlemengih Siohwa oh irail pahn nsenohki ahmw kin inengieng en men pwurehng ahneki nanpwungmwahu rehn Semomw nanleng. (Melkahka 103:10-​14; Seims 5:13-​15) Eri, ni ahnsou me ke pahn pwurehng kehlailda ni pali ngehn oh ahneki mohngiong lelepek ieu, ke pahn kak weweidwei nan ahl inen oh ke pahn kak kapwaiada ahmw inou ong Koht.​—⁠Ipru 12:12, 13.

Kaukaule Papah Siohwa ki Mohngiong Lelepek

19, 20. Dahme kahrehda e kesempwal kitail en momourki atail inou?

¹⁹ Nan ahnsou apwal pwukat, kitail anahne nantihong momourki atail inou oh kaukaule papah Koht ki mohngiong lelepek. Sises mahsanih: “Ahpw me pahn dadaurete lel ni imwi, ih me pahn mourla.” (Madiu 24:13) Pwe kitail kin momour ni “imwilahn rahn akan,” imwio pahn kak mwadang en lel sohte lipilipil ahnsou dah. (2 Timoty 3:1) Oh pil, sohte emen rehtail me pahn kak ese ma e pahn momour lakapw. (Seimis 4:13, 14) Eri, e kesempwal kitail en nantihong momourki atail inou rahnwet!

²⁰ Wahnpoaron Piter kasansalehda met nan sapwellime keriaun kisinlikou. E kasansalehda me nin duwen irail aramas suwed akan me kamakamala nan Nohliko, ih duwen sampah ni karasaras, iei pwihn en aramas suwed akan pahn pil kamakamala ni “rahnen Siohwa.” Piter eri koasoia: “A ia duwen kumwail, soangen mour dah me konehng kumwail en weweidki?” E pil kangoange irail: “Eri, kompoakepahi ko, ni amwail eseier mepuwkat, ku⁠mwail kaleke pwe kumwail dehr iangala padahk likamw en aramas suwed pwukat oh pwupwuweisang nan mour teng en amwail pwoson.” (2 Piter 3:5-​17) Ia uwen kansensuwed ma emen me papidaisla ahpw peilahsang padahk mehlel oh imwilahn eh mour e kin wiahla aramas emen me sohte kolokolte mohngiong lelepek!

21, 22. Iaduwen mahsen kan en Melkahka 57:7 kin pweida mehlel ong Depit oh irail Kristian mehlel akan?

²¹ Ahmw nannanti en momourki ahmw inou ong Koht pahn kak kehlailda ma ke pahn medemedewe rahn me ke papidaisla pwe e wia ahnsou kaperen ieu, oh ma ke pahn rapahki sawas sang rehn Koht pwe ahmw lokaia kan oh wiewia kan pahn kaperenda sapwellimen Koht mohngiong. (Lepin Padahk 27:11) Siohwa kin ahnsou koaros lelepek ong sapwellime aramas akan, oh kitail pil anahne en lelepek ong Ih. (Melkahka 94:14) Koht kin ketin kasalehda me E kin kupwurehla Depit oh Ih eri ketin kauwehla pilahn akan en irail imwintihti kan oh kadoarehla Depit. Depit inenen kalahnganki met oh e koasoia duwen uwen kehlail eh limpoak ong Sounkomouro. Sang nan kapehde e koulki: “Mongiongi me lelepek, O Maing Koht, mongiongi me lelepek.”​—Melkahka 57:7.

²² Duwehte Depit, irail Kristian mehlel akan sohte kin mweidong arail lelepek ong Koht en luwetala. Ki mongiong lelepek kan, irail kin ni pere⁠pe⁠ren koulki koul en kaping kan ong Siohwa, irail kin kapinga ih nin duwen arail sounkomour. Ma mongiongomw kin lelepek, ke pahn likih Koht, oh ki sapwellime sawas ke pahn kak kapwaiada omw inou. Ei, ke kak duwehte “aramas mwahu kan” me sounmelkahka menet koulki: “E sohte kin masak rong rohng suwed akan; eh pwoson me kehlail, oh e kin likih Kauno.” (Melkahka 112:6, 7) Ki pwoson Koht oh likih Ih ni unsek, ke pahn kak kapwaiada omw inou oh kaukaule papah Siohwa ki mohngiong lelepek.

Peidek kan Sang Sounwadawad kan

Ahn meipwon Mery ah soh-unsek mie mehkot suwed me wiahiong ipwidi en Sises?

Pwuhk Sarawi mahsanihki “ipwidi en Sises”: “Ni ahnsou me ine Mery kisinihniong Sosep, e dierekda me e liseian ki ngehn sarawi mwohn ara pwopwoudla.” (Madiu 1:18, New World Translation) Ni mehlel, sapwellimen Koht ngehn sarawi wia mehkot kesempwal ong ahn Mery liseiano.

Ahpw, ia mwomwen Mery? Ah kutohr wia mehkot kesempwal ong ah liseiano? Sang ni inou me Koht wiahiong Eipraam, Aisek, Seikop, Suda oh Nanmwarki Depit​—⁠ahn Mery pahpa kahlap oko​—serio pahn wia uhdahn kadaudokarail. (Senesis 22:18; 26:24; 28:10-14; 49:10; 2 Samuel 7:16) Eri, ia ehu ahl tohto me serio pahn kak ipwisang rehn Mery ahpw pahn wia kadaudok nin duwen inou sarawi kan? Eri, e pahn wia uhdahn nein Mery pwutak, me wahn kapede.​—Luk 3:23-34.

Tohnleng en Siohwa pwarodohng serepein Mery meipwon oh mahsanih: “Ke dehr masak, Mery, pwe ke kenikenlahr rehn Koht; oh, kilang! ke pahn liseianda oh naitikihada pwutak emen, oh ke pahn ketikihong mware Sises.” (Luk 1:30, 31) Liseian de ahpada kin anahne kutohr nan kapehd en kapwopwoudida. E sansal me Siohwa Koht me ketin wiahiong kutohr nan poahsoan en Mery en ahpada, oh E ketin wia met ni E kasauada mour en sapwellime Iehros sang nanleng ohng sampah pwehn wiahda serio nan kapehd en Mery.​—Kalesia 4:4.

Soangen seri menet me ahpada sang lih soh-unsek emen kak unsek oh sohte dipe ni ah wia paliwar ehu? Eri, iaduwen koasoandi en kosonned en mehkan me dou nan nta a pahn doadoahk ni mehkot unsek a pahn patehng mehkot soh-unsek? Tamataman me ngehn sarawi me doadoahk ni wiepen sepwildohn mour unsek en sapwellimen Koht ohl oh pil ni ahpadahn mour nan kapehden Mery. Eri, irairo kamwakele sang soh-unsek koaros me mie nan kutohr en Mery, kahrehda e wiahda koasoandi en sohsohn nta ieu me unsek sangete nin tepio.

Kahrehda, sohte lipilipil ia mwomwen met wiawi, kitail kak ese ni mehlel me mwekid en sapwellimen Koht ngehn sarawi ahnsowo kamehlelehdahr me doadoahko pahn pweida ohng sapwellimen Koht koasoandi. Tohnleng Kapriel kawehwehiong Mery oh mahsanih: “Ngehn sarawi pahn ti pohmwi oh roson en Koht pahn kipeikomwihdi, ihme kahrehda seri sarawio pahn mwarenki Sapwellimen Koht.” (Luk 1:35) Ei, sapwellimen Koht ngehn sarawi wiahdahr kehl en silasil ehu pwe sohte soh-unsek de mehn kau en kak kauwehla lalaudlahn serio nan kapehd en Mery.

E sansal me Sises pweipwandikihong Seme nanleng paliwere me unseko, ah kaidehn ong aramas akan. Siohwa ketin “kaunpadahr paliwar ehu” ong ih, oh Sises​—sang ni a ahpada kohla​—ni mehlel, “sohte saminla, ahpw kin saledek sang dihp.”​—Ipru 7:26; 10:5.