soi en mehn Papilon oh pil lelohng kaudok en mehn Suda kan kawao, oh sang wasao leledohr nan Kadehde Kapw.”​—On Being a Christian.

Ahpw, Paipel kaidehn ahn aramas koasoi; e uhdahn wia Mahsen en Koht. Kitail pahn loalokong ma kitail kamehlele dahme e koasoiahki duwen Tepil.​—2 Timoty 3:14-​17; 2 Piter 1:20, 21.

Dahme Sises kin Kamehlele?

Sises Krais kin kamehlele me Tepil uhdahn mie. Sises sohte ale kasongepe sang lamalam suwed ieu me mih loale. Aramas tohrohr men me uhwongada ih me mwuhr e kahdaneki “kaunen sampah.” (Sohn 14:30; Madiu 4:1-​11) Sises pil kamehlele me mie ngehn teikan me kin sewesehda Sehdan nan eh wiewia mwersuwed akan. E pil kin kausasang ngehn saut akan sang rehn aramas akan. (Madiu 12:22-​28) Ni ahnsou me Sises koasoia duwen Tepil oh nah ngehn saut akan, e sohte kin alasang padahk likamw en mehn Papilon kan. E uhdahn kamehlele me irail uhdahn mie.

Nin duwen Sohn 8:⁠44 kin kasalehda, Tepil, me wehwehki “sounlikamw,” iei ih “sounlikamw men oh semen soangen likamw koaros.” Ih me tepin ngehn me wiahda likamw me pid Koht oh e wia met nan mwetuwel en Ihden. Siohwa mahsanih me tepin atail pahpa oh nohno pahn “uhdahn mehla” ma ira kang wahn tuhkehn kehsehki aramas dahme mwahu oh dahme suwed. Sehdan doadoahngki ewen serpent (sineik) men oh ndaiong Ihp me mahsen pwuko me likamw. (Senesis 2:17; 3:⁠4) Kahrehda, e konehng en adaneki “serpent en mahso, me adaneki Tepil de Sehdan.”​—Kaudiahl 12:⁠9.

Nan Sohn 8:44, Sises pil mahsanih me Tepil “sounkam aramas emen [sangete nin tepio]” oh “e sohte kin miniminiong me mehlelo.” Met sohte wehwehki me Siohwa wiahdahte Tepil nin tepio pwehn wia “sounkam aramas emen.” E sohte wiawihda en wia mehkot kamasepwehk oh emen kin apwahpwalih wasahn kisiniei oh kin kaloke aramas akan me kin pelianda Koht.

Nin tepio, Tepil kin “mih nan padahk mehlel.” E wia emen kisehn sapwellimen Siohwa peneinei en nanleng oh ih unsek. Ahpw, e sohte “tengedi nan padahk mehlel.” E pein pilada ah elen mour oh ah elen wiahda likamw. “E tepida wiahla Tepil,” kaidehn ahnsou me e kepikpikda wia emen sapwellimen Koht tohnleng, ahpw ahnsou me pein ih pein medewehda en pelianda Siohwa oh ih eri wiahda likamw ong Adam oh Ihp. Sehdan eri wiahla “sounkam aramas emen” ni ahnsou me e uhwongada oh kahrehong Adam oh Ihp en mehla, oh pil iangahki mehlahn tohn sampah.​—Rom 5:⁠12.

Tepil​—⁠Imwintihti Kehlail men

Tepil kin wia imwintihti kehlail men. E kin “kohkohseli duwehte laion emen me kin weriwer, raparapahki ihs me e pahn kadallehla.” (1 Piter 5:⁠8) Tepil kaidehn madamadau suwed ieu me mih loalen aramas soh unsek kan. Mehlel, ehu ehu rahn, kitail kin pil nannanti pwehn powehdi atail luwet en uduk kan. (Rom 7:18-​20) Ahpw, dahme keieu apwal iei en “pelian ngehn suwed akan nan wehwe.”​—Episos 6:12.

Ia uwen laud en ahn Tepil kehl? Wahnpoaron Sohn mahsanih: “Sampah unsek mi pahn manaman en Me Suwedo.” (1 Sohn 5:19) Mehlel, kitail sohte men lemmwiki Tepil de pil mweidohng masak ih en kauwekitailla. Ahpw, e kin wia elen loalokong ma kitail pahn pepehd ong kasongosong kan me Sehdan kin wia oh dehr mweidohng ih en karotongehla atail madamadau ong padahk mehlel oh pil dehr mweidohng ih en kauwehla atail lelepek ong Koht.​—Sohp 2:3-5; 2 Korint 4:3, 4.

Dehr mweidohng Sehdan en pitih kitailedi sang atail kin pwupwudi ong soahng kan me pid wunahni. (Deuderonomi 18:10-​12) Ken wia tohnsukuhl mwahu en Mahsen en Koht, oh tamataman me Sises Krais kin kalap doadoahngki Mahsen en Koht ni ah kin ale kasongosong kan sang Tepil. (Madiu 4:4, 7, 10) Oh pil, kaukaule kapakap ong Siohwa ma ke kehn me ke mihla pahn kasongosong en Tepil oh nah ngehn saut akan.​—Pilipai 4:6, 7.

Kitail sohte anahne masak Tepil. Siohwa inoukihda me e pahn uhdahn sinsile kitail sang dahme Sehdan kak wia. (Melkahka 91:1-4; Lepin Padahk 18:10; Seims 4:⁠7, 8) Wahnpoaron Pohl mahsanih: “Kumwail kehlailkihda amwail miniminiong Kauno oh manaman en sapwellime roson.” Kahpw pahn “kak pelianda kehlail Tepil eh widing suwed kan.”​—Episos 6:10, 11.

“Rapahki Meleilei Oh Kolokol Kaukaule”

“Kumwail wia uwen amwail kak pwe kumwail en kolokol meleilei rehn aramas koaros.”​—ROM 12:18, New World Translation.

1, 2. Ia ekei kahrepe kan me kahrehda meleilei me kohsang rehn aramas akan sohte kak poatopoatki?

MEDEWEHLA ma ihmw ehu me poahsoankihda poahsoan luwet ehu, ndape me mwosodala, oh oahs mete kan matoudi. Ke men koasoan nan soangen ihmwo? Mwein soh. Litepw kapw pil sohte kak kakehlahda ihmwo. Ehu rahn, e pahn ohla douluhl.

² Meleilei me kin kohsang sampah wet kin rasehng ihmwo. E kin poasoankihda poahsoan luwet ehu​—iei inou kan oh pilahn kan en aramas akan, “pwe sohte aramas emen kak komourkumwailla.” (Melkahka 146:3) Poadoapoad en aramas kin kasalehda me mahwen tohto kin wiawi nanpwungen wehi kan oh keinek kan. Mehlel, ekei ahnsou, mie meleilei me kin wiawi ni ahnsou mwotomwot, ahpw soangen meleilei dahieu met? Ma wehi riau mahwenda oh ira uhdi pwehki ehu rehra luhs de pwehki ira solahr kilang katepen ara pahn mahmahwen eri dahme ke pahn kadaneki soangen meleilei wet? Irair akan me tepiada mahwen wet me duwehte kailok, sohlikilik, oh peirin kin mihmihete nan mohngiong en aramas akan. Meleilei wet kin rasehng tuhke me ohla ahpw aramas ‘pwainkihla litepw kapw’ eri met kaidehn meleilei mehlel ieu.​—Esekiel 13:10.

3. Dahme kahrehda meleilei me sapwellimen Koht aramas akan kin ahneki kin weksang meleilei me kin kohsang rehn aramas akan?

³ Ahpw, meleilei mehlel kin wiawi mendahki sampah wet kin dirkihla mahwen. Iawasa? Nanpwungen irail akan me kin idawehnla Sises Krais, irail Kristian mehlel akan me kin kapwaiada mahsen en Sises oh nantihong kahlemengih ih. (1 Korint 11:1; 1 Piter 2:21) Soangen meleilei me mih rehn Kristian mehlel akan me kohsang soangsoangen keinek kan, soangsoangen pelien doadoahk kan oh soangsoangen wehi kan, kin wia soangen meleilei me uhdahn mehlel pwehki e kin poahsoankihda ehupenehn meleilei me irail kin ahneki ong Koht me kin poahsoankihda arail pwoson tomw meirong en Sises Krais. Meleilei me kin wiawi rehrail kin wia kisakis me kin kohsang rehn Koht, kaidehn mehkot me kin kohsang rehn aramas akan. (Rom 15:33; Episos 6:23, 24) Irail kin ahneki meleilei pwehki re kin uhpaiong “Soupeidi en Popohl,” Sises Krais, oh kaudokiong Siohwa, “Koht en limpoak oh popohl.”​—Aiseia 9:6; 2 Korint 13:⁠11.

4. Iaduwen emen Kristian pahn kak “rapahki” meleilei?

⁴ Ahpw, meleilei sohte kin pein miehla rehn aramas soh unsek kan. Ihme kahrehda, Piter kasalehda me emen emen Kristian en “rapahki meleilei oh kolokol kaukaule.” (1 Piter 3:11) Iaduwen kitail kak wia met? Pasapengpen peidek wet kin dierekda nan kokohp ehu me wiawi mahs. Siohwa doadoahngki Aiseia en mahsanih: “Pein ngehi pahn padahkihong noumw aramas akan, oh ketikihong irail paiamwahu oh meleilei.” (Aiseia 54:13; Pilipai 4:9) Ei, aramas akan kin ahneki meleilei mehlel ma re kin kapwaiada sapwellimen Siohwa padahk kan. Oh pil, meleilei (popohl) iangahki irair pwukat “limpoak, peren, . . . kanengamah, kadek, loalopwoat, pwoson, opampap, oh liksang me suwed,” kin wia wahn akan en sapwellimen Koht ngehn sarawi. (Kalesia 5:22, 23) Aramas emen me sohte kin limpoak oh peren, sohte kanengamah, sohte kadek, mwersuwed, sohte lelepek, lemei, oh sohte kin liksang me suwed, sohte pahn kak ahneki meleilei oh popohl.

“Kolokol Meleilei Rehn Aramas Koaros”

5, 6. (a) Ia wehwehn “kolokol meleilei” nan Pwuhk Sarawi? (b) Kristian akan kin rapahki meleilei rehn ihs?

⁵ Meleilei kin wehwehki “irair en sohte katairong.” Soangen kawehwe wet pahn kipe soangen irair tohto kan me kin kasalehda me sohte irair en pingiping mie. Pil irail me melahr akan kin miehr ni irair en meleilei! Eri, ma aramas emen pahn ahneki meleilei mehlel, met wehwehki me e anahne rapahkidohng ih irair en meleilei. Nan sapwellime Kapahrek en Pohn Dohl, Sises mahsanih: “Meid pai me kin wia doadoahk en kamwahu nanpwungen aramas akan; pwe Koht pahn ketin wiahkinirailla uhdahn sapwellime! ” (Madiu 5:9) Sises kin mahsan ong aramas akan me, ni ahnsou mwuhr, pahn wiahla sapwellimen Koht seri ngenen kan oh ale mour soutuk nanleng. (Sohn 1:12; Rom 8:14-​17) Ehu rahn, aramas lelepek kan koaros me sohte kin ahneki koapworopwor en mih nanleng pahn paiekihda “saledek lingan en sapwellimen Koht seri kan.” (Rom 8:21) Ihte irail akan me kin kolokol meleilei pahn kak ahneki koapworopwor wet. Lepin lokaiahn Krihk me kin kawehwehiong “kolokol meleilei” kin wehwehki “soun rapahki meleilei.” Wehwehn “kolokol meleilei” nan Pwuhk Sarawi kin wehwehki rapahki ahl me pahn wahdo meleilei, ekei pak, wahdo meleilei ong wasakis me sohte meleilei kin mie mahs.

⁶ Tehk dahme wahnpoaron Pohl kaweidih mehn Rom akan: “Kumwail wia uwen amwail kak pwe kumwail en kolokol meleilei rehn aramas koaros.” (Rom 12:18, NW) Pohl sohte kin ihte padahkiong mehn Rom akan en ahneki meleilei. Ahpw, e kangoange irail en rapahki irairen meleilei rehn aramas teikan. Rehn ihs? Rehn “aramas koaros”​—tohn peneinei kan, iengarail Kristian akan, oh pil rehn aramas akan me sohte kin iang arail pwoson. E kangoange mehn Rom akan en ‘wia uwen arail kak’ en kolokol meleilei rehn aramas teikan. E sohte men irail en meirongkihla arail pwoson pwe dene en kolokol meleilei rehn aramas teikan. E men irail en dehr kalingeringerih mwahl aramas teikan, ahpw irail en koasoi ong irail ki ngenen men kolokol meleilei. Kristian akan en kin wiewia met sohte lipilipil ma nan mwomwohdiso de pil likin mwomwohdiso. (Kalesia 6:10) Pohl ntingihdi duwen met: “Kumwail nantihong wia me mwahu nanpwungamwail oh pil ong aramas teikan koaros.”​—1 Deselonika 5:15.

7, 8. Iaduwen oh dahme kahrehda Kristian akan anahne kolokol meleilei rehn irail akan me sohte kin kamehlele arail padahk kan?

⁷ Iaduwen kitail kak kolokol meleilei rehn aramas akan me sohte kin iang atail pwoson oh mwein kin uhwong atail padahk kan? Ehu, kitail en dehr ahneki madamadau ehu me kitail mwahu sang irail. Karasepe ehu, e pahn apwal en kolokol meleilei ni emen a pahn koasoiahki emen oh doadoahngki lokaiahn kauwe meteikan. Siohwa kin ketin kasalehda me E pahn kadeikada pwihn en aramas akan, eri kitail sohte ahneki pwung en kadeikada aramas akan. Ni mehlel, kitail sohte kak kadeikada aramas akan mendahki re kin uhwong kitail. Mwurin Pohl padahkiong Taitus en kaweidih Kristian akan me kin mihmi nan Krihd duwen arail wiewia kan ong irail kaunen aramas akan, Pohl pousehla oh katamankin irail en “dehr kauwe emen, ahpw re en kin meleilei oh kadek, oh ahnsou koaros re en kin kasalehda saramwahu ong aramas koaros.”​—Taitus 3:1, 2.

⁸ Ma kitail pahn kolokol meleilei rehn aramas akan me sohte kin iang atail pwoson, met kin kak sewese irail en kasawihada oh mwekidki padahk mehlel. Ahpw, kitail sohte kin nohn karanih aramas pwukat pwe re kak “kauwehla tiahk mwahu kan.” (1 Korint 15:33) Ahpw, kitail en kadek ong irail, oh kasalehda wahu oh limpoak ong aramas koaros. Piter ntingihdi: “Amwail tiahk kan nanpwungen me rotorot akan en kin mwahu, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.”​—1 Piter 2:12.

Kolokol Meleilei Rehn Aramas akan me Kitail kin Tuhwong Nan Kalohk

9, 10. Dahme wahnpoaron Pohl kin wia pwehn kasalehda me e men kolokol meleilei rehn aramas soh-pwoson akan me e kin koasoi ong?

⁹ Aramas tohto kin ese me Kristian akan nan keieun senturi kin wia arail doadoahk en kalohk ni eimah. Ni ahnsou me irail kin lelohng kalokolok kan, re sohte kin wia mehkot en kauwehla Mahsen en Koht me re kin padapadahkiseli, pwe re kin wia uwen arail kak en peikiong Koht a kaidehn aramas. (Wiewia 4:29; 5:29) Oh pil, re wehwehki me mie wekpeseng en eimah oh soh-kadek. Medemedewe ni ahl