Duwehte kitail, kitail dehr manokehla uwen lauden atail kin kesempwaliki padahk mehlel ni ahnsou kitail kin tepin rong duwen me mehlel.

16. (a) Dahme pahn kak wiawi ma kitail pahn keieu akadeiong en kasikasik en naineki mwohni tohto? (b) Iaduwen kitail kak diarada peren mehlel?

¹⁶ Aramas tohto kin kemehlele me ma irail pahn naineki mwohni tohto sang dahme irail kin naineki ni ahnsouwet, irail pahn wiahla aramas peren kan. Ahpw, ma kitail pahn kasikasik en naineki mwohni oh wiahkihla met atail mehn akadai nan mour, kitail pahn kak lokolongki “pwunod tohto.” (1 Timoty 6:10, Phillips) Medemedewe duwen aramas tohto me kin pwainda neirail ticket kan en lottery, oh doadoahngki neirail mwohni kan nan wasahn pilein mwohni kan, de kasikasik mehnia stock market me mwahu, medemedewe laud duwen arail pahn wihnkihda mwohni laud. Aramas malaulau me kin koapworopworki en wiahda mwohni tohto kin pweida. Oh pali laud en ahnsou, irail akan me kin pweida en mwadangete alehdi mwohni tohto, kin ni ahnsou mwuhr diarada me mwohni pwukat sohte kin kahrehong irail en ahneki peren. Ahpw, peren mehlel kin kohsang kapwaiada kupwuren Siohwa, doadoahk rehn mwomwohdiso en Kristian ki sapwellimen Siohwa ngehn sarawi oh sawas kan sang sapwellime tohnleng kan. (Melkahka 1:1-3; 84:4, 5; 89:15) Ni atail pahn kin wia met, kitail pahn ale kapai kaselel akan me kitail sohte kasik. Padahk mehlel kin wia mehkot kesempwal pwen kak alekihdi kapai kesempwal pwukat nan ahmw mour?

17. Pwehki Piter kin pweidi rehn Saimon, sounwia kilin mahn akan, dahme met kin kasansalehda duwen ahn wahnpoaron eh madamadau?

¹⁷ Medemedewe duwen dahme wahnpoaron Piter wia. Nan pahr 36 C.E., e wia seiloak en misineri men nan sahpwen Saron. E uhdi nan kanihmw en Lida, iei wasa me e kamwahuiahla Enias me mwoator oh e pousehla kohla Sopa me mih limwahn oaroahr wasa me sohp kan kin kohla ie. Wasao, e kaiasada Dorkas. Wiewia 9:43 mahsanih: “Piter eri koukousoan nan Sopa rahn tohto rehn ohl emen me adaneki Saimon, sounwia kilin kou men.” Iren Paipel wet kin kasansalehda duwen madamadau en Piter me e sohte kin lipilipilki aramas akan ni ahnsou e kin papah aramas akan nan kanihmwo. Iaduwen e kin kasalehda met? Frederic W. Farrar, emen semen en Paipel ntingihdi: “Emen me kin poadidi ong Kosonned Pous akan en Moses me sohte mih ni nting sohte kin mweidong aramas teikan en idingkihong ih en pweidi nan imwen sounwia kilin kou men. Ong irail aramas akan me kin nohn kakos daulihla ong oaretik kan en kosonnedo, irail kin kasautki aramas akan me kin wia doadoahk kan me ni rahn koaros anahne doahke kili oh pali war kan en soangsoangen mahn akan.” Edetehn ma “imwen [Saimon] me kin mih pohn oaroahr” sohte kin mih karanih ah imwen wia kilin kou ahpw Saimon kin wia doadoahk ehu me aramas akan kin wiahki doadoahk kasaut oh kilangdiong irail kan koaros me kin wia soangen doadoahk wet duwen Farrar eh koasoia.​—Wiewia 10:⁠6.

18, 19. (a) Dahme kahrehda Piter kin mengimengloalki kaudiahlo me e kilangada? (b) Ahpw, kapai dahieu me Piter alehdi edetehn e sohte kasikasik en ale?

¹⁸ Piter me sohte kin kasaipwehki aramas alehdahr luhk wet sang rehn Saimon oh iei wasao me Piter alehier kaweid me kohsang rehn Koht ni eh sohte kasik. E ahpw kilangada kaudiahl ehu me padahkiong ih en kang mahn akan me samin nin duwen kosonned en mehn Suhs akan. Piter tepida uhwong oh nda me e saikinte “tungoale mehkot me samin.” Ahpw pak silipak e rong mahsen wet: “Ke dehr wiahki me samin mehkot me Koht mahsaniher me mwakelekel.” Kitail kak wehwehki kahrepen “Piter ahpw mengimengloalki ia wehwehn kaudiahl wet me e kilangehr.”​—Wiewia 10:5-​17; 11:7-​10.

¹⁹ Piter sohte ese me rahn ehu mwohn e kilangada kaudiahl wet, mie emen mehn liki me adaneki Kornilius nan Sesaria, mwail 30 dohsang wasa me Piter kin mie, e pil kilangada kaudiahl ieu. Sapwellimen Siohwa tohnleng emen me kaweidih Kornilius en kadarala ekei ladu kan en rapahki Piter nan imwen Saimon, me sounwia kilin mahn akan. Kornilius eri kadarala nah ladu kan en kohla ni imwen Saimon, oh Piter iang iraildong Sesaria. E tepida kalohkong Kornilius, kise kan oh kompoake kan. Imwikihla met, irail wiahla tepin mehn liki pwosonlahr akan me soh-sirkumsais oh me alehdi ngehn sarawi nin duwen aramas me pahn sohsohki Wehio. Edetehn ohl pwukat me soh-sirkumsais, irail aramas koaros me kin rongorong mahsen en Piter me papdaisla. Met kin ritingihda ahlo ong aramas akan me kin kohsang wehi kan, me mehn Suhs akan kin kilangwong nin duwen aramas samin kei, ahpw irail pahn kak wiahla tohn mwomwohdisohn Kristian. (Wiewia 10:1-​48; 11:18) Pwais kaselel ong Piter​—oh met kin pweida pwehki padahk mehlel kin wiahki mehkot kesempwal ong ih oh met kin kamwekid ih en kapwaiada kaweid kan me kin kohsang rehn Siohwa oh pwosonla!

20. Sawas dahieu me kin kohsang rehn Koht ni ahnsou kitail kin mwohneki padahk mehlel nan mouritail kan?

²⁰ Pohl kihda kangoang wet: “Ni atail pahn kin koasoiahki padahk mehlelo oh limpoak, kitail pahn keirda ni mehkoaros rehn Krais, me iei moangatail.” (Episos 4:15) Ei, padahk mehlel pahn wahdohng kitail peren ieu me siksang mehkoaros ni ahnsouwet ma kitail pahn mwohneki oh momourki mehlelo nan atail mour oh mweidong Siohwa ki sapwellime ngehn sarawi en kahre kitail. Pil, medemedewe duwen sawas kan me irail tohnleng sarawi kan kin kihong kitail nan atail doadoahk en kalohk. (Kaudiahl 14:6, 7; 22:⁠6) Kitail kin inenen paiamwahu en alehdi soangen sawas pwukat ni atail kin wia doadoahk ieu me Siohwa ketin padahkiong kitail en wia! Ma kitail pahn kolokolte atail lelepek, met pahn kamwekid kitail en kapinga Siohwa, iei Koht en padahk mehlelo, ni ahnsou kohkohlahte. Mie mehkot me kesempwal sang atail kin kapinga Siohwa?​—Sohn 17:⁠3.

Iaduwen Ahmw Pahn Kak Pitsang Imwin Sampah wet?

PAIPEL kawehwehda duwen imwin koasoandi suwed wet duwehte “rahnen engieng ehu, rahnen kahpwal oh kansensuwed, rahnen ohla oh mwomwla, rahnen rotorot oh kapahtou, rahn mahliok oh depwehkin.” (Sepanaia 1:15) Ni mehlel, met kaidehn soangen rahn me ke pahn wie kasikasik en leledo! Ahpw, wahnpoaron Piter kaweidki ienge Kristian akan en “awiawih oh kasikasik sapwellimen Siohwa Rahno​—⁠Rahno me lahng pahn roangala oh ohkihla kisiniei, oh audepen pahnlahng pahn peikipeseng karakar mwuledek. Eri, kitail koapworopwor oh awiawih lahng kapw oh sampah kapw, wasa me pwungen kalahngan en Koht pahn poadada ie poatopoat, duwen eh ketin inoukihdahr.”​—2 Piter 3:12, 13, New World Translation.

Wasaht, Piter sohte mahmahsanih ohlahn uhdahn nanleng oh sampah. “Nanleng” oh “sampah” me pahn ohla me Piter mahsanih kin karasaraski ahn aramas koasoandi en kaunda suwed en ahnsou wet oh aramas me sohte pwoson Koht. “Sapwellimen Siohwa Rahno” sohte pahn kauwehla weren sampah, ahpw, e pahn “kamwomwala aramas suwed kante.” (Aiseia 13:9) Ong irail akan me “pahtoulahr oh weiweirengki soahng suwed koaros” me kin wiawi rehn irail aramas suwed kan nan rahnwet, rahnen Siohwa pahn wia rahnen komour ehu ong irail.​—Esekiel 9:4.

Eri, iaduwen aramas emen ah pahn kak pitsang “rahn lapalap oh kamasepwehk en Siohwa”? “Mahsen en Siohwa” me kohwong emen sapwellime soukoup oko kin kihda pasapengpen peidek wet: “E pahn wiawi me sohte lipilipil aramas emen me likweriong mwaren Siohwa pahn pitila.” (Soel 1:1; 2:31, 32, NW) Sounkadehdehn Siohwa kan pahn inenen perenki sewese iuk ong ia wehwehn likweriong mwaren Siohwa.