“Papah Siohwa Ni Peren”

¹ Wahnpoaron Pohl ntingihdi: “Kumwail en pereperen ahnsou koaros nan amwail miniminiong Kauno. I pil pahn pwurehng koasoia: kumwail en pereperen!” (Pilipai 4:4) Atail pwukoah doadoahk en ehukihong meteikan Rongamwahu oh sewese aramas me rasehng sihpw en kaudokiong Siohwa kin wahdohng kitail peren laud. (Luk 10:17; Wiewia 15:3; 1 Deselonika 2:​19) Ahpw, ma ekei pak kitail kin diarada me kitail solahr ahneki peren nan atail doadoahk en kalohk, dahme kitail kak wia?

² Koht Kin Ketin Kamanahla Doadoahk Wet: Kitail en tamataman me kitail alehier kamanaman sang Siohwa en wia doadoahk en kalohk. Ei, kitail ahneki pwais kaselel en wia “iengen Koht tohndoadoahk kan” ni atail kin wia doadoahk en kalohki Rongamwahu en Wehin Koht oh katohnpadahk! (1 Kor. 3:9) Sises Krais kin ieiang kitail nan doadoahk wet me solahr pahn pwurehng wiawi. (Madiu 28:18-​20) Tohnleng kan pil kin iang pidada doadoahk wet ni arail kin ieiang kitail nan doadoahk en rahk me wiwiawi ahnsou wet. (Wiewia 8:​26; Kaudiahl 14:6) Kitail wehwehki me Siohwa kin ieiang doadoahk wet sang dahme iren Paipel kan kasalehda oh pil sang dahme wiawiong sapwellimen Koht aramas akan sangete mahs lel met. Eri, e sansal me ni atail kin kalohk, “atail padahk kin pwilisang rehn Koht, me ketin poaroneikitodo. Se kin kapahrek ni mehlel mwohn silangi, duwen ladun Krais kei.” (2 Kor. 2:​17) Met kin kasalehda duwen kahrepe mwahu kan me kitail kak ahneki peren!

³ Kapakap kin kesempwal ma kitail men kolokolete atail peren ni atail papah Koht. (Kalesia 5:​22) Pwehki kitail kak wia sapwellimen Koht doadoahk ihte ma kitail likih sapwellime kehl, kitail anahne peki sapwellime ngehn sarawi pwe Siohwa kin kihong irail me peki reh. (Luk 11:13; 2 Kor. 4:​1, 7; Episos 6:​18-​20) Ma kitail kin kapakap duwen atail doadoahk en kalohk, met pahn sewese kitail en ahneki madamadau pwung ni ahnsou me kitail kin lelohng uhwong de ahnsou me aramas kauwe kitail. E pahn sewese kitail en nantihong kalohk ni eimah oh peren.​—Wiewia 4:​29-​31; 5:​40-​42; 13:50-​52.

⁴ Kaunopada Mwahu: Ehu ahl me kitail kak kalaudehla atail peren nan kalohk iei en kaunopada mwahu. (1 Pit. 3:​15) Atail kaunopada sohte anahne ahnsou laud. Erein minit keite, kitail kak kousapahlih padahk kan ong makisihn kapw kan de padahk kan me mwahu ong dahme ke men kihla. Pwehn pilada tepin koasoi me mwahu en doadoahngki, ke kak tehk nan pwuhken Reasoning de Atail Doadoahk Ong Wehio en sounpwong samwalahr oko. Ekei sounkalohk kan kin diarada me e mwahu en ntingihdi ehu padahk mwotomwot nan doaropwe. Ekei pak, irail kin kilang doaropweo pwehn tamanda dahme irail pahn nda. Met kin sewese irail en powehdi arail saloh oh e kin sewese irail en eimah kalohk.

⁵ Peren kin wahdohng kitail kamwahu tohto. Ma emen kin maskadek oh peren ni e kin kalohk ong aramas, met kak kamwekid aramas en rong ih. Peren pil kin kakehlailihala kitail en dadaurete. (Neh. 8:​10; Ipru 12:2) Ahpw, kesempwal sang mehkoaros, atail papah Siohwa ni peren kin kapinga Ih. Ihme kahrehda, kitail en “papah Siohwa ni peren.”​—Melkahka 100:2.

Dahme Kitail Kak Koasoia Duwen Makisihn kan

Kahn Iroir October 2003

“Aramas sohte kak sapeng ekei peidek kan. Tehk duwen karasepe wet. [Wadek Sohp 21:7.] Mie pak ehu me ke medemedewe duwen peidek ehu me ke men idek rehn Koht? [Mweidohng en sapeng.] Makisihn wet kin kawehwehda iaduwen aramas wasa koaros nan sampah diarada pasapengpen peidek siluh me aramas tohto kin men ese me pid duwen Koht oh atail mour. Nin duwen me e koasoia ni pali 2 en makisihn wet, ma aramas emen men kihda arail sawas ong doadoahk en kalohk me se kin wia, se kin perenki ale.”

The Watchtower Oct. 15

“Pilipil tohto me kitail kin wia kin kamwekid laud atail mour ahnsou kohkohdo. Iaduwen kitail kak sohte wiahda pilipil sapwung kan? [Mweidohng en sapeng. Mwurin mwo, wadek Lepin Padahk 3:6.] Watchtower wet kin kasalehda duwen iren kaweid limau me kohsang nan Paipel me kin kak sewese kitail en wiahda pilipil mwahu kan.”

Awake! Oct. 22

“Ke kin tehk me nan rahnpwukat kitail kin kalapw rong duwen mwahs me kin kehlail oh kakete momour mendahki wini kin kohwong irail pwehn kemeirailla? [Mweidohng en sapeng.] Makisihn wet kin kasalehda kahrepen met kin wiawi oh e kin kasalehda dahme kitail kak wia pwehn pere kitail sang mwahs pwukat. E pil kin kasalehda duwen inou kan me mihmi nan Paipel me ehu rahn aramas solahr pahn soumwahu.” Wadek Aiseia 33:24.