“Kumwail en Onohnop Ahnsou Koaros”

¹ Nan kokohp wet me pid imwin koasoandi suwed wet, Sises ketikihda kaweid en dehr nohn soupisengki kedirepw en sampah kan. (Madiu 24:36-​39; Luk 21:​34, 35) Pwehki kahn kamakam kowahlap kak tepida ni ahnsou keren, e pahn kesempwal en peikiong sapwellimen Sises kaweid: “Kumwail en onohnop ahnsou koaros, pwe Nein-Aramas pahn ketido ni awa me kumwail pahn sasairki.” (Madiu 24:44) Dahme kak sewese kitail en wia met?

² Powehdi Pwunod oh Soangen Kedirepw Teikan: Ehu lidip me kin kak kauwehla atail pali ngehn me kitail anahne kanahieng pwe kitail depahno lohdi pah iei “kapwunod en mour kan.” (Luk 21:34, ftn.) Nan ekei sahpw, semwehmwe, sohte itar doadoahk ong koaros, oh pil pweilaud en soahng kan me kitail anahne pwain pwehn kak mour kin kahrehda mour kin inenen apwal. Nan sahpw teikan, e kin mengei en alehdi oh ahneki kepwe tohto. Ma kitail pahn nsenohkihte alehdi kepwehn sampah kan, kitail kakete manokehla soahng ngenin kan me pid padahk mehlel kan duwen Wehin Koht. (Madiu 6:​19-​24, 31-​33) Mihding en Kristian kan kin sewese kitail en tamatamante soahng me kesempwal kan. Ke kin akadeiong iang towehda mihding kan koaros?​—Ipru 10:24, 25.

³ Sampah wet kin direkihla soangen kedirepw kan me kak kihsang atail ahnsou kesempwal kan. Doadoahngki computer kak wia lidip ehu ma kitail kin doadoahngki atail ahnsou laud ong doadoahngki Internet, wadek de kadar e-mail kan, de mwadongki computer games. Oh pil, ma kitail kin doadoahngki ahnsou laud ong kilang TV, kasdo kan, wia soangen mwadong de doadoahk me kitail perenki, wadek pwuhk en sampah de nuhs en sampah, oh mwadong​—⁠mehpwukat kak kihsang atail ahnsou laud oh sohla atail ahnsou oh kehl en wia soahng ngenin kan. Edetehn mehn kamweit oh mwadong kak kamweitkitailla, onop en Paipel nin duwen peneinei de pein atail onop kin kihong kitail kamwahupatail ong ahnsou kohkohlahte. (1 Tim. 4:​7, 8) Ke kin koasoanehdi ahmw ahnsou pwehn kak doudouloale duwen Mahsen en Koht ehu ehu rahn?​—Episos 5:​15-​17.

⁴ Kitail kak kalahnganki me sapwellimen Siohwa pwihn koasoanehdi prokram en kaweid oh mwengehn ngehn kan me kak sewese kitail en “pitsang mepwukat koaros me pahn wiawi oh pil warohng uh mwohn silangin Nein-Aramas”! (Luk 21:36) Kitail en doadoahngki mwahu koasoandi pwukat oh ‘onohnop ahnsou koaros’ pwe atail pwoson en “wia kahrepe me kitail kak alehki kaping oh lingan oh wahu ni rahn me Sises Krais pahn ketin pwarodo.”​—1 Piter 1:​7, New World Translation.

Kaping Kak Kakehlada Aramas

¹ Kisin serepein emen sengiseng mwohn e pahn meir ehu pwong oh e nda: “Ngehi serepein mwahu rahnwet?” Ah nohno inenen pwuriamweikihla nah serepein a wia soangen peidek duwehte met. Ahpw, mendahki e kilang me nah serepein nantihong wiewia dahme mwahu rahno, e manokehla kapinga ih de ndaiong ih uwen e perenki oh kalahnganki ah wiewia mwahu kan. Ahn kisin serepeino ah sengisengki met kin katamankin kitail me kitail koaros​—⁠me pwulopwul oh me laud​—anahne aramas en kapinga kitail. Kitail kin kakehlailihala meteikan ni atail kin kapinga irail ni ahnsou me irail kin wia mehkot mwahu?​—Lepin Padahk 25:11.

² Mie kahrepe mwahu tohto me kitail kak kapingahki riatail Kristian kan. Elder kan, ministerial servant kan, oh pioneer kan me kin doadoahk laud pwehn kapwaiada arail pwukoa kan. (1 Tim. 4:​10; 5:​17) Irail pahpa oh nohno kan me kin lemmwiki Koht kin wia uwen arail kak koaros en kaiahne neirail seri kan ni elen Siohwa. (Episos 6:4) Kristian pwulopwul kan kin wia uwen arail kak koaros en pelianda “ngenen sampah wet.” (1 Kor. 2:​12; Episos 2:​1-3) Pil ekei kin papah Siohwa ni lelepek mendahki irail mahlahr, soumwahu de lelohng kasongosong teikan. (2 Kor. 12:7) E konehng kitail en kapinga irail pwukat koaros. Kitail kin pohnese arail wiewia mwahu kan oh kapinga irail?

³ Kapinga Emenemen oh Kasalehda Dahme Irail Wia Me Mwahu: Emenemen kitail kin perenki rong brother kan me wia padahk e pahn kapinga tohnmwomwohdiso. Ahpw, e kin inenen kansenamwahu ma emen pahn kapinga pein ahn emen eh wiewia mwahu kan. Karasepe ehu, nan Rom irelaud 16, Pohl kapinga ekei nan mwomwohdiso me duwehte Pihpe, Persila, Akwila, Tripihna, Triposa oh Persis oh kasalehda dahme irail wia me mwahu. (Rom 16:​1-4, 12) Ia uwen sapwellime mahsen a wia mehn kansenamwahu ong irail me lelepek pwukat! Kaping pwukat kin kamehlelehiong riatail brother oh sister kan me kitail anahne irail oh e kin pil kahrehong kitail koaros en karanih emenemen. Nan rahn pwukat, mie pak me ke kapingahki emen duwen dahme e wia me mwahu?​—Episos 4:​29.

⁴ Kaping me kin Kohsang Mohngiong: Pwe kaping en wia mehkot kansenamwahu, e anahne kohsang mohngiong. Aramas kak wehwehki ma kitail kapinga irail sang mohngiongatail de ma kitail ‘kapinga likamw.’ (Lepin Padahk 28:23) Ni atail kin kaiahne emenemen kitail en kasawih irair mwahu en meteikan, mohngiongatail pahn kamwekid kitail en kapinga irail. Kitail en wia uwen atail kak koaros en kalap kapinga meteikan sang nan mohngiongatail, pwe kitail wehwehki me “meid kaperen diar mahsen pwung ni ahnsou me konehng!”​—Lepin Padahk 15:23.