Miniminpene Ni Mehlel Nanpwungen Kristian kan​—⁠Iaduwen Met Kak Wiawi?

¹ Dahme pahn kak kaminiminpene aramas wenerar samwa nan sahpw 234 me kin lokaiahki lokaia 380 samwa? Ihte kaudok en Siohwa Koht. (Maika 2:​12; 4:​1-3) Sounkadehdehn Siohwa kan wehwehkiher sang ni pein arail ekspiriens kan me miniminpene ni mehlel nanpwungen Kristian kan kak en wiawi rahnwet. Nin duwen “pwihn sihpw teieu” me kin mihmi pahn kaweid en “silepe mehtehmen,” kitail men wia uwen atail kak koaros en pelianda ngenen sampah wet me kin uhwong miniminpene oh limpoakpene nanpwungen aramas.​—Sohn 10:16; Episos 2:2.

² Kupwuren Koht iei me sapwellime kepikipikda loalokong kan nanleng de sampah me iei me tohnleng koaros oh aramas koaros en miniminpene nan kaudok mehlel. (Kaudiahl 5:​13) Pwehki Sises wehwehki duwen kesempwalpen met iei me kahrehda Sises wiahki iren kapakap ehu duwen sapwellime kan en miniminpene oh limpoakpene nanpwungarail. (Sohn 17:20, 21) Iaduwen emen emen kitail pahn kak utungada miniminpene en mwomwohdiso en Kristian?

³ Iaduwen Miniminpene Pahn Pweida: Ma sohte kaweid en Mahsen en Koht oh ngehn sarawi, miniminpene nanpwungen Kristian kan sohte pahn kak pweida. Ma kitail kin doadoahngki kaweid me kitail wadek nan Paipel nan atail mour, met kin kahrehiong ngenen Koht en doadoahk mwahu nan atail mour. Met kin sewese kitail en “dadaurete minimin me ngehn sarawi kin ketikihong kitail sang ni sapwellime kisakis en popohl me kin kolokolkitailpene.” (Episos 4:3) E kin kamwekid kitail en mahkpene nanpwungatail ni limpoak. (Kolose 3:​13, 14; 1 Piter 4:8) Ke kin utungada miniminpene nanpwungatail sang ni ahmw kin doudouloale duwen Mahsen en Koht rahn koaros?

⁴ Pwukoah me kohwong kitail en kalohk oh katohnpadahk kin pil kaminiminih pene kitail. Ni ahnsou me kitail kin iang sounkalohk teikan nan kalohk, “miniminkihpene anahnteieu ni atail nantihong pwoson me konehng Rongamwahu,” kitail kin “wiahki ehu ni atail doadoahk en me mehlelo.” (Pilipai 1:​27; 3 Sohn 8) Ni atail kin wia met, kitail kin kakehlailihala miniminkihpene limpoak me mihmi nanpwungen tohnmwomwohdiso. Dahme ke soh luhke emen sounkalohk me ke sohte kin kalap iang pwe ken iang ih kalohk nan wihket?

⁵ Kitail inenen pai mehlel pwe kitail kisehn minimin en pirien en irail me mihmi nan padahk mehlel nan sampah pwon rahnwet! (1 Piter 5:9) Nan rahnpwukat, irail me kid kid kei pein kilang miniminpene wet me wiawi nan sampah pwon nan Kapokon en International me oaralap koasoia “Kalinganahda Koht.” E pahn mwahu ma kitail koaros pahn utungada oh sewese miniminpene kesempwal wet ni atail wadewadek Mahsen en Koht rahn koaros, kamwahuwihala nanpwung suwed akan ni elen limpoak, oh ni atail pahn “ehupene” ni atail kalohkiseli Rongamwahu.​—Rom 15:6.

Rapahki Irail me Kin Men Kasamwo Kumwail

¹ Sapwellimen Sises kaweid en ia mwomwen atail pahn wia doadoahk en kalohk kakete wia doadoahk apwal ehu. E mahsanih: “Ni amwail pahn kin lel nan kahnimw de nan kousapw ehu, kumwail pedolong oh rapahki mahs aramas emen me pahn kin men kasamwo kumwail.” (Madiu 10:11) Pwehki aramas nan rahnpwukat kin mihmi ni imwarail ahnsou tikitik sang mahs, iaduwen kitail kak rapahki irail me kin men kasamwo kitail?

² Kasawihada Ahmw Wasahn Kalohk: Keieu, ke anahne tehk mwahu ahmw wasahn kalohk. Ahnsou dah kan me aramas kin kalap mihmi ni imwarail kan? Iawasa me irail mihmi ni rahn? Mehnia rahn de ahnsou me irail kin kak kasamwo aramas me pahn kohla ni imwarail? Dahme pahn keieu sewese iuk en pweida mwahu ni ahmw pahn sewese meteikan iei met: ma ke pahn wekidala ahmw koasoandi en kalohk pwe ken kak tuhwong aramas tohto nan ahmw wasahn kalohk ni ahnsou me mwahu pwe ken kak sewese irail ni pali ngehn.​—1 Korint 9:​23, 26.

³ Sounkalohk tohto diarada me irail kin tuhwong aramas tohto ni soutik kan. Ekei tohnihmw kan kin pisek oh kin perenki rong ni soangen ahnsouwo. Doadoahngki telephone pwehn kalohk kak pil pweida mwahu ni soutik kan. Kalohk wasahn pisnis kan oh kalohk nanial de nan sidohwa kan kin pil wia wasa mwahu kan en tuhwong aramas akan pwehn kalohki Rongamwahu ong irail.

⁴ Nan sounpwong ehu me mwomwohdiso kan nan sampah pwon kin wia doadoahk tohrohr, mwomwohdiso ehu koasoanehdi koasoandi en kalohk en wiawi ni soutik kan en Rahn Kaunop, Rahn Sarawi, Ni Esil oh Ni Alim kan. Irail pil koasoanehdi kalohk ni doadoahngki telephone oh pil kalohk ni wasahn pisnis. Koasoandi pwukat kahrehong sounkalohk kan en perenki iang kalohk me kahrehda mwomwohdiso wet uhd koasoanehdi koasoandi pwukat en wiawi nan sounpwong koaros.

⁵ Nantihong Pwurehng Pwurala Rehn Aramas akan: Ma e kin apwal en diar aramas nan imwarail ni ahnsou me ke men pwurehng pwurala rehrail, ke kak song koasoanehdi ehu ahnsou rehrail pwe ken pwurehng tuhwong irail. Mwurin mwo, menlau kolokol ahmw inou me ke pahn pwurehng pwurala rehn aramaso ni ahnsou me kumwa koasoanehdi. (Madiu 5:​37) Ma konehng, ke kak idek rehn tohnihmwo ma ke kak ale nah nempehn telephone. Met pahn sewese iuk en pwurehng tuhwong aramaso.

⁶ Kitail kak kamehlele me Siohwa kin kupwurperenki atail nantihong tuhwong aramas me kin perenki rong oh pwurehng pwurala rehrail.​—Lepin Padahk 21:5.