Kitail en Kihong Siohwa Dahme Keieu Mwahu

¹ Sapwellimen Siohwa Kosonned ong wehin Israel kasalehda me mahn me irail kin meirongkihong Siohwa anahne “mwahu.” Siohwa kin ketin kupwursuwedki meirong en mahn me soumwahu de sohunsek. (Lipai 22:18-​20; Malakai 1:​6-9) Ihme kahrehda, ni ahnsou me irail kin wia meirong, irail anahne kihong Siohwa wihe koaros​—⁠pwe wihe kan me keieu mwahu. (Lipai 3:​14-​16) Siohwa kin warohng dahme keieu mwahu nin duwen Semen Israel oh Soumas Lapalap.

² Rahnwet kin duwehte kawao, Koht kin tehk ma kitail kin kihda meirong me keieu mwahu de soh. Atail doadoahk en papah Siohwa anahne kasalehda me kitail wauneki Siohwa. Ni mehlel, irair en aramas koaros kin wekpeseng. Kahrehda, kitail anahne kasawih pein kitail pwehn tehk ma kitail kin kihong Siohwa dahme keieu mwahu.​—Episos 5:​10.

³ Papah Siohwa Sang Mohngiong Unsek: Atail doadoahk en papah Siohwa sohte kin wauneki Siohwa oh sohte kin kamwekid mohngiong en irail me kin rong kitail ma kitail kin pwangahki wia doadoahk wet. Atail kin kapinga Koht oh koasoia duwen sapwellime kupwur kan anahne en kohsang mohngiongatail me dirki kalahngan. (Melkahka 145:7) Met kin kasalehda kahrepe kesempwal en idawehn atail koasoandi en wia pein atail onop Paipel.​—Lepin Padahk 15:28.

⁴ En kihong Siohwa dahme keieu mwahu kin pil wehwehki me kitail pahn kahlemengih Ih nin duwen sapwellime limpoak. (Episos 5:​1, 2) Limpoak ong aramas pahn kamwekid kitail en nantihong kalohk ong aramas koaros me kitail kin tuhwong oh ehukihong irail duwen padahk mehlel me kin komourkitailla. (Mark 6:​34) E kin pil kamwekid kitail en kasalehda me kitail nsenohki aramas akan me kitail kin koasoiong. E kin sewese kitail en medemedewe duwen irail mwurin atail tepin tuhwong irail oh e pil kin kamwekid kitail en pwurehng pwurala rehrail. E kin kamwekid kitail en wia uwen atail kak koaros en sewese irail kekeirada ni pali ngehn.​—Wiewia 20:24; 26:28, 29.

⁵ “Meirong en Kaping”: Pil ehu ahl me kitail kak kihong Siohwa dahme keieu mwahu iei atail nannanti nan kalohk. Ma kitail kin soandi mwahu oh wia uwen atail kak koaros nan atail doadoahk en kalohk, kitail pahn kak doadoahngki mwahu atail ahnsou. (1 Tim. 4:​10) Oh pil, ma kitail kin kaunopada mwahu, met pahn sewese kitail en kak koasoi ni ahl me sansal oh ngoang, oh mehpwukat pahn kak sewese mehteikan en rong oh mwekidki dahme kitail kin koasoia. (Lepin Padahk 16:21) Ni atail kin ehukihong mehteikan duwen Rongamwahu en Wehin Koht, kitail kak nda me atail koasoi kan me kin kohsang atail mohngiong kin wia “meirong en kaping.”​—Ipru 13:15.

Kumwail me Pwulopwul kan—Wadek Mahsen en Koht!

¹ Ahnsoun pwulopwul iei ahnsou me kahpwal akan oh pilipil laud kan kin wiawi. Pali laud en kumwail me pwulopwul kan kin lelohng kasongosong kan me kak kauwehla amwail tiahk mwakelekel. Ahpw, mwohn ke pahn wiahda amwail pilipil kan me pid duwen sukuhl, doadoahk, oh pwopwoud, e pahn mwahu en mahs koasoanehdi ahmw mehn akadei ngenin kan​—⁠soangen mehn akadei kan me kin kasalehda me ahmw papah Siohwa Koht me keieu kesempwal nan ahmw mour. Ma ke pahn wia met, ahmw pilipil teikan pahn imwila mwahu. Mehn akadei ngenin kan pahn sewese iuk en mour ni elen erpit oh pweida mwahu nan ahmw mour. Ni ahmw pahn wadek Mahsen en Koht kaukaule oh doudouloale duwen audepe kan, met pahn kamwekid uhk en kapwaiada kaweid me mihmi loale, oh ahmw nanti kan pahn pweida mwahu.​—Sosua 1:8; Melkahka 1:​2, 3.

² Iaduwen E Pahn Sewese Iuk? Sampah en Sehdan kin dirkihla kasongosong kan en wia dahme suwed. (1 Sohn 2:​15, 16) Mwein ke ese ekei iengomw tohnsukuhl kan de irail me pwulopwul teikan me lelohng kahpwal pwehki irail lohdi pahn kasongosong kan. E sansal me kapwaiada kaweid sang Paipel pahn kihong uhk kehl me pahn sewese iuk en liksang dihp oh kolokolete tiahk mwakelekel. Oh pil, kaweid sang Mahsen en Koht kak sewese iuk en liksang kasongosong kan sang Sehdan me sohte nohn sansal. (2 Kor. 2:​11; Ipru 5:​14) Kekeidki elen Koht pahn wahdohng uhk peren mehlel oh ke pahn nsenamwahu nan ahmw mour.​—Melkahka 119:​1, 9, 11.

³ Kaweid me kohsang Mahsen en Koht sohte wekila sangete mahs lel met oh e kin siksang erpit en aramas. (Melkahka 119:98-​100) Ma kitail sukuhliki duwen kaweid sang Paipel oh medemedewe duwen kupwuren Siohwa me sansaldahr kan iangahki kapakap sang nan mohngiong​—⁠mehpwukat pahn sewese iuk en karanih Siohwa Koht me sapwellimaniki erpit oh kupwurki Paipel en wiawihda. E inoukihda: “I pahn padahkiong uhk ahl me ke pahn weid ie. I pahn kaweid uhk oh panawihiuk.”​—Melkahka 32:8.

⁴ Koasoanehdi Ahmw Ahnsou Pwehn Wadek Paipel: Emen Kristian me pwulopwul koasoanehdi ah mehn akadei en wadek Paipel pwon, oh e wia met erein sounpahr ehu. Iaduwen e paiekihda? E tamanda: “I sukuhliki soahng tohto duwen Siohwa​—soahng kan me sewese ie en karanih Ih oh lemmwiki Ih erein ahi mour.” (Seims 4:8) Eri, iaduwen​—⁠ke wadekalahr Paipel pwon? Ma soh, ke soh wiahda ahmw mehn akadei en wia met? Siohwa pahn ketin kapaiada ahmw nannanti, oh ke pahn ale kapai tohto.