Ke Kak Ale Kapai kan Pwehki Ke Kin Lelepek oh Kanengamah

¹ “Kumwail nantihong oh kanengamahiong, pwe ih duwen amwail pahn komourala ngenomwail kan.” (Luk 21:19) Mahsen pwukat, me wia kisehn sapwellimen Sises kokohp duwen “imwin koasoandi suwed wet,” kin kasalehda me kitail anahne kolokol atail lelepek oh kaunopada atail madamadau pwe kitail pahn lelohng kasongosong oh kahpwal tohto. Ahpw, ma kitail pahn likih Siohwa, kitail kak ‘dadaurete lel ni imwi’ oh “ale komourpatail.”​—Madiu 24:​3, 13; Pilipai 4:​13.

² Kalokolok, soumwahu kan, kahpwal en mwohni, oh mehn kansensuwed kan kin kak wia mehn kasongosong en ehu ehu rahn. Ahpw, kitail en dehr manokehla me Sehdan kin songosong en kauwehla atail lelepek ong Siohwa. Ehu ehu ahnsou me kitail kin lelepek ong Samatail Siohwa, met kin sapengla Sehdan me kin kasonge atail lelepek ahnsou koaros. Ia uwen kansenamwahu en ese me “pilen masatail” sohte kin manoknokla ni ahnsoun kasongosong kin lel kitail! “Pilen masatail” kin kesempwal ong Siohwa, oh atail lelepek kin kaperenda mohngiongi!​—Melkahka 56:8; Lepin Padahk 27:11.

³ Kehlailkihda Kasongosong kan: Kasongosong kan kin kasalehong kitail duwen pein atail luwet en pwoson de luwet en atail irair kan, duwehte aklapalap oh soh-kanengamah. Kitail en peikiong kaweid en Mahsen en Koht pwe “atail kanengamah ni ahnsou apwal en unsekla” oh kitail en dehr rapahki ahl akan me uhwong Pwuhk Sarawi en kauhdi kasongosong kan me lelohng kitail. Pwekihda? Pwehki lelepek pahn kasongosong kan kin sewese kitail en “unsekla oh kanengamah ni soahng koaros.” (Seims 1:​2-4, New World Translation) Kanengamah kak sewese kitail en kakairada soangen irair kesempwal kan duwehte limpoak, mahk oh doadoahngki atail loalokong.​—⁠Rom 12:15.

⁴ Kasongepen Uwen Kehlail en Ahmw Pwoson: Ni atail kin kanengamah pahn kasongosong kan, atail pwoson kin kehlailla oh met kin inenen kesempwal mwohn silangin Koht. (1 Piter 1:​6, 7) Soangen pwoson wet kin sewese kitail en dadaurete pahn kasongosong kan me kin lelohng kitail. Oh pil, kitail kak kehn Koht ah kin kupwurperenki kitail, oh met kin kakehlailihala atail koapworopwor, oh kamehlelehiong kitail me atail koapworopwor pahn uhdahn pweida.​—Rom 5:​3-5.

⁵ Kapai me keieu laud me kohsang atail lelepek ong Siohwa mendahki kahpwal oh kasongosong me lelohng kitail me kileledi nan Seims 1:​12, me mahsanih: “Meid pai aramas me kin loalopwoatete nan apwal me kin kohieng, pwe mwurin eh pahn powehdi sosohng wet, e pahn ale nin duwen keting ehu, mour me Koht ketin inoukihong irail kan me kin poakohng ih.” Eri, kitail en kolokol atail lelepek ong Siohwa, oh kitail kak kamehlele me e uhdahn pahn kapaiada “irail me dadaurete arail lelepek ong Ih oh limpoak ong Ih.”

Pali 2: Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu

Kaunopada en Wia Onop Rehn Aramaso

¹ Padahk mwahu kin wehwehki laudsang ihte koasoi sang nan brochure de pwuhk me ke doadoahngki ong onop rehn aramas oh wadek iren Paipel kan. Kitail anahne padahk ni ahl ehu me pahn lel mohngiong en aramas akan me kin onop rehtail. Met kin wehwehki me ke anahne kaunopada en wia onop me pahn lel mohngiong en aramaso me ke onop reh.​—Lepin Padahk 15:28.

² Iaduwen Kitail Kak Kaunopada: Ke kak tepida ahmw kaunopada en onop rehn aramaso ni ahmw pahn kapakapki aramaso oh ah anahn akan. Peki rehn Siohwa en sewese iuk ken lel mohngiong en aramaso. (Kolose 1:​9, 10) Pwehn uhdahn wehwehki mouren oaralapo, tehk mwahu daidel en irelaudo de iren mehn kasukuhlo, sawaspen oaralap kan, oh kilel kan. Pein idek rehmw, ‘Ia mouren oaralap wet?’ Met pahn sewese iuk en medewehte ire kesempwal akan erein amwa onop.

³ Kousapahlih mwahu ehu ehu parakrap me kumwa pahn onopki. Rapahki pasapengpen peidek kan me kileledi nan onopo, oh kileledi ihte lepin lokaia kesempwal kan. Kasalehda iaduwen iren Paipel kan kin dokedoke mouren parakrapo, oh pilada mehnia iren Paipel kan me ke pahn wadek nan amwa onop. Ke pahn diarada me e pahn wia sawas laud en ntingihdi ire kesempwal kan duwen iren Paipel kan nan noumw brochure de pwuhk. Tohnsukuhl en Paipelo anahne wehwehki me dahme e sukuhliki kohsang Mahsen en Koht.​—1 Deselonika 2:​13.

⁴ Sewese Tohnsukuhlo en Wehwehki Iaduwen E Kak Doadoahngki Nan Ah Mour Dahme E Sukuhliki: Mwurin mwo, ke kak medemedewe iaduwen tohnsukuhlo kak doadoahngki nan ah mour dahme e pahn sukuhliki nan onopo me kumwa pahn wia. Song en medewehla peidek kan me e kakete ahneki de ire kan me e pahn apwaliki wehwehki de kamehlele. Pein idek rehmw: ‘Dahme tohnsukuhlo anahne wehwehki de kamwahuwihala pwehn kak kekeirada ni pali ngehn? Iaduwen ahi kak lel ah mohngiong?’ Mwurin mwo, wia ahmw padahk en duwehte dahme ke medewe. Ekei pak, ke anahne kaunopada karasaras kan, kawehwe kan de ekei peidek kan pwehn sewese tohnsukuhlo en koledi wehwehn ire ehu de iren Paipel ehu me kumwa pahn onopki. (Nehmaia 8:8) Ahpw, ieremen koasoia duwen soahng kan me sohte nohn kesempwal de sohte kin pidada oaralapo me kumwa koasoia. Ni imwin amwa onop, wiahda kisin kousapahl pwehn sewese tohnsukuhlo en tamataman ire kesempwal kan me mihmi nan amwa onop en rahno.

⁵ Soangen peren laud kitail kin ahneki ni ahnsou me irail me kapw kan kin kasalehda wah mwahu kan oh kapinga Siohwa! (Pilipai 1:​11) Pwehn sewese irail en lel mehn akadeio, kitail en kaunopada mwahu ehu ehu ahnsou mwohn kumwa pahn onop Paipel.