Koasoandi en Peneinei​—Onop en Peneinei

¹ Kisakis me keieu kesempwal me komwi (pahpa/nohno Kristian kan) kak kihong noumw seri kan iei en sewese irail en poakohng Siohwa duwehte me ke kin wia. Met kak wiawi ni ahnsou me kumwail “mihmi nan imwamwail” oh wia amwail onop en peneinei wihk koaros. (Deud. 6:​5-7) Sohte lipilipil ma ahmw pwoud iang padahk mehlel de soh, de ma ke pil sohte pwopwoud, ke kak sewese noumw seri kan en karanih iuk oh pil karanih Siohwa ni amwail pahn kaukaule onop Paipel nin duwen peneinei.

² Tepida Onop en Peneinei: Keieun ewen kahk iei en koasoanehdi pwehn ahnla onop Paipel nin duwen peneinei ehu. Ma ke sehse mehnia rahn oh kuloak me pahn mwahu en wia onopo, ke soh koasoiong tohn ahmw peneinei koaros? (Lepin Padahk 15:22) Ma noumw seri kan tikitik, mwein e pahn mwahu ma ke pahn koasoanehdi en wia ekei onop kan me mwotomwot erein wihk ehu. Koasoanehdi soangen koasoandi me pahn keieu mwahu ong ahmw peneinei. Koasoanehdi ehu ahnsou ong onop en ahmw peneinei, oh nantihong kolokol koasoandio.

³ Dahme kumwail pahn onopki? Ekei peneinei kan kin kaunopada dahme kitail pahn onop nan Pwuhk Study en Mwomwohdiso de artikel me kitail pahn wia nan Kahn Iroir. Ekei peneinei kan kin koasoiapene pwuhk kan ong me pwulopwul kan. Emen pahpa me naineki pwutak oh serepein pwulopwul koasoia: “Dahme nei seri kan kin perenki wia nan wihk koaros iei en wiahda sipai sang poadoapoad kan en Nei Pwuhk en Poadoapoad kan en Paipel. Uwen loal en arail wehwehki oh tamataman poadoapoad en Paipel kan kin sansal sang aht wia met oh met kesempwal sang parakrap depe se kak wia nan ehu pwuhk.”

⁴ Onop Wihk Koaros: Onop en peneinei anahne wiawi kaukaule nan wihk kan koaros oh onopo en kaperen ong tohnpeneinei koaros. Ekei pak, mie soahng kan me pahn pwarada me kitail sohte kasik, eri wekideklahn koasoandi kan kak wiawi pwehn apwalihala irair me pwarada. Ekei pak, soahng kan me ahmw peneinei pahn koasoia pahn anahne wekila. Ahpw, wekidekla pwukat sohte pahn wiawi werei pwehki e pahn kak kauwehla uhdahn koasoandi en onop me koasoanehdi sang nin tepio. Emen serepein me kin mihmi nan ehu peneinei me kin wia arail onop en peneinei koasoia: “Ma kuloak en aht onop en peneinei kin wekila, pahpa kin ahnsou koaros ntingihdi kuloak me aht onop pahn wiawi pohn kisin doaropwe ehu oh langada pohn aht ais box​—⁠pwe ih wasao me kiht koaros kak kilang oh ese kuloak depe aht onop en peneinei pahn wiawi rahno.” E inenen mwahu dahme pahpa menet kin wia pwehn kolokol koasoandi en wia onop en peneinei wihk kan koaros! Ni ahmw pahn kekeirada noumw seri kan “ni kaiahn oh madamadau en Siohwa,” ke kin kasalehiong irail koaros ahmw limpoak ong irail oh ahmw limpoak ong Samatail me ketiket nanleng.​—Episos 6:​4, NW.

Koasoandi en Peneinei​—Wadek Iren Rahn

¹ Pahpa oh nohno limpoak kan kin wia uwen arail kak ehu ehu rahn en kaunopada mwenge mwahu ong neirail seri kan. En kihong irail mwengehn ngehn me kohsang Mahsen en Koht kin keieu kesempwal. (Madiu 4:4) Ehu ahl me ke kak sewese noumw seri kan en kakairada roson mwahu ni pali ngehn oh “ale komourparail” iei sang ni atail pahn koasoanehdi ahnsou ehu ehu rahn en wadek Iren Rahn nin duwen peneinei. (1 Piter 2:2) Ahnsou dah me mwahu en koasoanehdi met nan ahmw koasoandi en peneinei?

² Ahnsoun Mwenge: Tepikihda rahn kan ni amwail pahn wadek oh koasoia Iren Rahn pahn sewese ahmw peneinei tamataman Siohwa erein rahno. (Melkahka 16:8) Emen nohno koasoanehdi en wadek oh koasoia Iren Rahn oh kawehwehiong nah pwutak ni ah kin mwengehn menseng oh ira kin kapakap mwohn e kohla sukuhl. Met kakehle pwutako en kesihnenda teng oh kolokol ah lelepek mendahki e kin lelohng kasongosong kan duwehte uhki wehi, oh tiahk samin, oh e kin kihong ih kehl en kalohk ong ienge tohnsukuhl akan oh ah sounpadahk kan. Mendahki ih kelepw me wia Sounkadehde nan ah sukuhlo, e sohte kin ahneki pepehm me e kelekelepw.

³ Ma e sohte pahn mwahu ong ahmw peneinei en wadek Iren Rahn ni menseng kan, kumwail kak wia met nin duwen peneinei mwuhr, mwein ele ni ahnsou me kumwail koaros kohpene mwengehn soutik. Ekei peneinei kan pil kin koasoiapene ekspiriens kan nan kalohk oh ire kan me re perenki sang pein arail wadawad en Paipel. Tohto kin kasalehda me irail perenki tamataman ahnsou kan me arail peneinei kan kin mwohdpene oh koasoia soahng ngenin kan.

⁴ Ni Pwong kan: Ong ekei peneinei kan, ahnsou me keieu mwahu ong irail en koasoiapene Iren Rahn iei mwohnte arail meirla ni pwong kan. Met kin pil wia ahnsou mwahu en ehupene kapakap. Ni noumw seri kan pahn kin ahnsou koaros rongorong ahmw kin kapakap ong Siohwa, seri kan pahn kak kamehlele me Siohwa wia emen me uhdahn mehlel.

⁵ Siohwa en kapaiada ahmw nannanti en kakairada noumw seri kan oh sewese irail en kamehlele padahk mehlel sang mohngiongarail ni ahmw pahn doadoahngki mwahu Iren Rahn (Examining the Scriptures Daily).