Pwehn Kolokolete Kompoakepahmw men, Ke Anahne Wia Kompoakepah Mwahu men

Kompoakepahnki emen kin poahsoankihda limpoak. Ahmw limpoak ong Siohwa pahn kehlailla ni ahnsou me ke pahn kalaudehla ahmw sukuhliki duwen ih. Ni ahnsou me ahmw limpoak ong Koht pahn kehlailla, ahmw ineng en papah ih pil pahn kehlailla. Met pahn kamwekid uhk en wiahla emen tohnpadahk en Sises Krais. (Madiu 28:19) Sang ni ahmw pahn iangala peneinei peren ehu en Sounkadehdehn Siohwa kan, ke pahn kak kompoakepahnki Koht ni ahnsou kohkohlahte. Dahme ke anahne wia?

Ke anahne kasalehong Koht me ke poakohng ih sang ni ahmw pahn peikiong sapwellime kosonned akan. “Iet duwen wehwehn poakohng Koht: kitail en peikiong sapwellime kosonned akan; oh sapwellime kosonned akan me sohte apwal.”​—1 Sohn 5:3.

Doadoahngki dahme ke sukuhlikier. Sises wia karasaras ehu me kin kasalehda met. Emen ohl loalokong kauwada imwe pohn paip ehu. Ohl pweipwei men me kauwada imwe pohn pihk. Ni eh keteuda oh lapakehda, ihmw me kokouda pohn paipo sohte ohla, ahpw ihmw me kokouda pohn pihk pwupwudi oh ohla. Sises mahsanih me irail akan me kin rong eh padahk kan oh kapwaiada kin rasehng ohl loalokong men me kauwada imwe pohn paip ehu. Ahpw irail akan me sohte rong eh padahk kan oh kapwaiada kin rasehng ohl pweipwei men me kauwada imwe pohn pihk. Mehnia ohl me ke men alasang?​—Madiu 7:24-27.

Inoukihong Koht ahmw mour. Met wehwehki me ke pahn kapakap ong Siohwa oh inoukihong ih me ke pahn wia kupwure sang met kohkohlahte. Kapwaiada kupwuren Koht kin kasalehda me ke wiahla sapwellimen Sises tohnpadahk men.​—Madiu 11:29.

Papidais. “Uhda oh papidaisla pwe dipomw kan en wideudsang ni omw pahn likweriong mware.”​—Wiewia 22:16.

Kihong ahmw mour unsek ong papah Koht. “Sohte lipilipil soahng dah me kumwail kin wia, kumwail loalenohng duwehte ma kumwail wie doadoahk ong Siohwa, ahpw kaidehn ong aramas.”​—Kolose 3:23.