Siohwa mahsanihong Moses: ‘Kohdahdo rehi pohn nahnaht. I pahn ntingihedi kosonned ko pohn pelien takai riapali oh kihong uhk.’ Moses doudahla pohn nahnao oh mihmihki mwo erein rahn oh pwohng 40. Erein eh mihmi mwo, Siohwa ketin ntingihediong Kosonned Eiseko pohn takai riapalio oh ketikihong takai ko rehn Moses.

Mwurin ahnsou kei, mehn Israel ko lemehier me Moses keseiraillahr. Irail eri ndaiong Aaron: ‘Se mwahuki emen en kahluwa kiht. Wiahiong kiht emen kohten!’ Aaron eri nda: ‘Kumwail kihdo noumwail kohl kan.’ Ih eri kapeipeseng kohl ko oh wiakihda sansal en kouwol men. Aramas ako eri nda: ‘Kouwol menet at Koht me kahluweikitodo sang Isip!’ Irail eri tapiada kaudokiong kouwol kohlo, oh irail wiahda kamadipw ehu. Ia duwe, met sapwung? Ei, pwehki aramas ako inoukihda me re pahn kaudokiong Siohwa kelehpw. Ahpw met irail kauwehla inowo.

Siohwa mwahngihada dahme wiewiawio, oh e mahsanihong Moses: ‘Kohdihla rehn aramas ako. Pwe irail sapeikiong ie oh kaukaudokiong koht likamw men.’ Moses eri kohdihla sang pohn nahnao, weuwa takai riapalio.

Ni eh kerendohng wasao, Moses rongada ngilen aramas kokoul. Ih eri kilangada arail kahkahlek oh pwongpwongih kouwolo. Moses uhdahn lingeringerda. Ih eri kesehdiong takai riapalio nan pwehlo, oh takai ko pwalpeseng. E ahpw poarehngete kouwolo kauwehla. Ih eri idek rehn Aaron: ‘Ia duwen aramas pwukat ar kahrehiong uhk ken wiahda soahng suwed wet?’ Aaron eri sapengki: ‘Ke dehr lingeringer. Ke esehier mwomwen aramas pwukat. Irail men ahneki emen koht, eri I kesehlong neirail kohl kan nan kisinieio oh kouwol menet pa pwarada!’ E sohte konehng Aaron en wia met. Moses eri pwuradahla pohn nahnao oh peki rehn Siohwa en ketin mahkohng aramas ako.

Siohwa kin ketin mahkohng irail kan me men peikiong ih. Ke kak kilang uwen eh kesempwal ong mehn Israel ko ren idawehn en Moses kaweid?

Ni ahnsou me Moses mihmi pohn Nahna Sainai, Siohwa mahsanihong ih en wiahda impwal tohrohr ehu, me adaneki impwal sarawi, wasa me mehn Israel kan pahn kaudokiong Ih. Irail pahn kak wahseli impwal sarawio ni arail pahn kin seiloak.

Siohwa mahsanih: ‘Padahkihong aramas akan ren kihda dahme re kak pwehn sewese kokoudahn impwal wet.’ Mehn Israel kan kihda kohl, silper, prons, takai kesempwal kan, oh mehn kapwat kan. Irail pil kihda likou me wiawihkihda wunen sihpw, likou linen, kilin mahn, oh soahng tohto teikan. Pwehki arail uhdahn kadek me kahrehiong Moses eh ndaiong irail: ‘E itarehr! Ieremenehr kumwail wahdo kepwe kan.’

Ohl oh lih koahiek tohto sewese wiahda impwal sarawio. Siohwa ketin wiahiong irail ren koahiek ong wia doadoahko. Ekei pidpene dereht, oh ingidpene likou de dehkohng mahlen kan pohn likoun impwalo. Ekei kin koasoanehdi takai kan, doadoahngki kohl, de parada tuhke kan.

Mehn Israel ko wiahda impwalo duwehte me Siohwa mahsanihong irail. Irail wiahda kahdeng kaselel kan pwehn katohrepeseng impwalo ni wasa riau, wasa Sarawi oh Wasa Sarawiheo. Kohpwahn inowo mi nan Wasa Sarawiheo, e wiawihkihda tuhke akesia oh kohl. Wasa Sarawio mie lamp kohl ehu, tehpel ehu, oh pei sarawi ehu ong isik warpwohmwahu. Loalen kehlo mie peisin prons ehu oh lapalahn pei sarawi ehu. Kohpwahn inowo kin katamankihong mehn Israel ko arail inou tohrohro me re pahn peikiong Siohwa.

Siohwa ketin pilada Aaron oh nah pwutak ko ren doadoahk nan impwal sarawio nin duwen samworo kei. Irail anahne apwalih impwal sarawio oh wiahda meirong kan ong Siohwa. Aaron kelehpw me mweimwei en pedolong nan Wasa Sarawiheo, pwehki eh wia samworo lapalap men. E kin wia met pak ehu nan pahr ehu pwehn wiahda meirong ehu ong dipe kan, dipen eh peneinei, oh dipen wehin Israel pwon.

Mehn Israel ko kanekehla impwal sarawio sounpar ehu mwurin ar kohkohlahsang Isip. Met miehier wasa me re kak kaudokiong Siohwa.

Siohwa ketin kadirehkihla sapwellime lingan nan impwal sarawio oh ketikihda depwek ehu pohnangin impwalo. Erein depweko eh kin mihmi pohnangin impwalo, mehn Israel ko kin mihmihte wasao. Ahpw ahnsou me depweko kin saradahsang pohn impwalo, re kin ese me ih ahnsou me re pahn mweselda. Irail eri kin kihpene impwalo oh idawehn depweko.