Mehn Israel ko mweselsang Nahna Sainai oh keid nan sapwtehn en Paran kolahng wasa ehu me adaneki Kades. Siohwa mahsanihong Moses: ‘Kadarala ohl 12, emen sang ehuehu kadaudok, pwehn lipoahroke Kenan, sahpw me I pahn kihong mehn Israel kan.’ Moses eri pilada ohl 12 oh ndaiong irail: ‘Kumwail kohla Kenan, oh tehkada ma sahpwo mwahuong kakairada wahnsahpw akan. Pil tehk ma aramas ako luwet de kehlail oh ma re kin mi nan ihmw likou de kahnimw.’ Lipoahrok 12 ko eri ahpw mwesellahng Kenan, riemen nanpwungarail iei Sosua oh Kalep.

Mwurin rahn 40, lipoahrok ko pwurodo oh re wahdo kreip, pwohmakraneid oh wahn pik kei. Irail eri padahkihong mehn Israel ko: ‘Sahpwo sahpw kaselel ehu, ahpw aramas ako kehlail oh mie dihd laud kei me kelehdi kahnimw ko.’ Kalep eri nda: ‘Kitail kak kaloweiraildi. Kitail mwesel met!’ Ke ese dahme kahrehda Kalep ndahki met? Pwehki ih oh Sosua likih Siohwa. Ahpw lipoahrok ehk teiko nda: ‘Soh! Aramas ako inenen reirei, duwehte kodon kei! Se duwehte mensiek limwahrail.’

Mehn Israel ko ahpw mworusala. Irail eri tepida kaulim oh ndapene nanpwungarail: ‘Kitail pilada emen tohrohr me pahn kahluwai kitail oh pwuralahng Isip. Ia kahrepen kitail en pil kolahng wasaht oh kamakamala?’ Sosua oh Kalep nda: ‘Kumwail dehpa sapeikiong Siohwa, oh dehr masepwehk. Siohwa pahn ketin perei kitail.’ Ahpw mehn Israel ko sohte men rong. Irail pil men kemehla Sosua oh Kalep!

Dahme Siohwa ketin wia? E mahsanihong Moses: ‘Ia uwen laud en ei kin sewese irail ahpw re kin sapeikiongiehte. Eri irail pahn mihmihte nan sapwtehn erein sounpar 40, oh irail pahn mehla wasahn. Neirail seri kante oh Sosua oh Kalep me pahn kousoan nan sahpwo me I inoukihong irail.’

Mwuhr, ni ahnsou me mehn Israel ko mihmihte nan sapwtehno, Kora, Dadan, Apiram, oh meh 250 uhwongada Moses. Irail ndaiong ih: ‘Se pwangahkiher rong uhk! Dahme kowe me wiahki at kaun oh Aaron me wia samworo lapalap? Siohwa kin ketin ieiang kitail koaros, kaidehn kowe oh Aaron kelehpw.’ Siohwa sohte kupwurki dahme wiawio. E ketin kilengwohng met nin duwen uhwong ehu ong ih!

Moses eri ndaiong Kora oh irail me utung ih ko: ‘Kumwail kohdo ni impwal sarawio lakapw, oh kumwail wahdo noumwail pan en kisiniei kan me audaudki warpwohmwahu. Siohwa pahn ketin kasalehiong kitail ihs me e ketin pilada.’

Mwurin rahno, Kora oh ohl 250 ko kohla ni impwal sarawio pwehn tuhwong Moses. Wasao irail isik warpwohmwahu ko duwehte irail samworo kei. Siohwa eri mahsanihong Moses oh Aaron: ‘Kumwail keiweisang rehn Kora oh nah ohl akan.’

Mendahki Kora eh kolahng tuhwong Moses ni impwal sarawio, Dadan, Apiram, oh arail peneinei kan sohte men iang kohla. Siohwa mahsanihong mehn Israel ko ren keilasang limwahn imwen Kora, Dadan, oh Apiram. Mehn Israel ko eri mwadangete mwekid sang wasao. Dadan, Apiram, oh arail peneinei kan kesihnen likin imwarail impwal kan. Ni ahnsowohte pwehlo pa pwalpeseng oh kadallehla irail koaros! Ni impwal sarawio, kisiniei ehu pa kohdihdo oh kamwasikahla Kora oh nah ohl 250 ko.

Siohwa eri mahsanihong Moses: ‘Ale ehu sokon sang kaunen ehuehu kadaudok kan, oh ntingihediong eden kaun ko ni sokon kan. Ahpw kihong eden Aaron pohn sokon me kohsang kadaudok en Lipai. Ke ahpw wahla kihdiong sokon pwukat nan impwalo, oh sokon en aramas me I pilada pahn masalpeseng.’

Mandahsang rahno, Moses wahieido sokon ko koaros oh kasalehiong kaun ako. Nein Aaron sokono mie wahnrohs kei me masamasal powe, oh kapwarehda wahn almond kei me mahier. Ni ahl wet, Siohwa ketin kasansalehda me e ketin piladahr Aaron en wia samworo lapalap.