Sonadan, nein Nanmwarki Sohl pwutak keieu laudo, kin wia emen sounpei kommwad. Depit nda me Sonadan uhdahn marahrahsang ikel oh kehlailasang laion. Ehu rahno Sonadan kilangada sounpei en Pilisdia 20 pohn dohl ehu. E ndalahng nah sounwa kepwehn mahwen ko: ‘Kita pahn mahweniong irail ihte ma Siohwa ketikihong kita kilel ehu. Ma mehn Pilisdia kan nda kita en kohdahla, eri kita ese me kita pahn peiong irail.’ Mehn Pilisdia ko ahpw werkilahng ira: ‘Kumwa kohdahdo oh peiong kiht!’ Ira eri doudahla pohn dohlo oh kalowehdi sounpei ko.

Pwehki ih nein Sohl pwutak me keieu laud, Sonadan me pahn wiahla nanmwarki mwurin eh pahpao. Ahpw Sonadan ese me Siohwa ketin piladahr Depit en uhd wiahla nanmwarki en Israel; e ahpw sohte luwangki met. Sonadan oh Depit wiahla kompoakepah mehlel ong emenemen. Ira inoukihda me ira pahn pere oh sewese emenemen. Sonadan eri kihong Depit pein eh likoun likio, nah kedlahso, nah arepo, oh eh katengo pwehn kasalehda me e men wia kompoakepahn Depit.

Ni ahnsou me Depit tangatangasang Sohl, Sonadan kohla reh oh ndaiong: ‘Kehlail, oh kommwad. Siohwa ketin piluhkadahr en uhd wiahla nanmwarki. Pil ei pahpao ese duwen met.’ Ia duwe, ke men kompoakepahnki soangen aramas me duwehte Sonadan?

Tohtohsang pak ehu, Sonadan kin tounmeteikihla eh mour pwehn sewese kompoakepaho. E ese me Nanmwarki Sohl kin men kemehla Depit, eri e ndaiong eh pahpao: ‘E pahn wia dihp ehu ma ke kemehla Depit; sohte mehkot suwed ehu e wiahda.’ Sohl uhdahn lingeringerda pahn Sonadan. Sounpar kei mwuri, Sohl oh Sonadan koaros mehla nan ehu mahwen.

Mwurin Sonadan eh mehla, Depit rapahki Mepiposed nein Sonadan pwutako. Ni ahnsou me Depit kilangada, e ndaiong Mepiposed: ‘Pwehki omw pahpao wia kompoakepahi mwahu men, I pahn apwalih iuk erein omw mour. Ke pahn mihmi nan tehnpesei oh kin iang mwenge ni ei tehpel.’ Depit sohte manokehla kompoakepaho Sonadan.

Ni ahnsou me Sohl mehla, Depit uhd wiahla nanmwarki. Ni ahnsowo e sounpar 30. Mwurin sounpar kei me e wiewiahki nanmwarki, ehu pwohngo sang pohn tehnpeseo, e kilangada lih kaselel men. Depit ahpw esehda me eden liho Padsipa oh e pwoudiki sounpei men me adaneki Uraia. Depit eri ileklahng Padsipa en kohdo ni imweo. Ira wia nsenen pwopwoud, oh liho liseianda. Depit song en ekihla dahme e wiahdao. Ih eri ndaiong nah kaunen sounpeio en kihdiong Uraia mwohn karis en sounpeio oh pweiekla mwuri. Mwurin Uraia eh kamakamala nan mahweno, Depit uhd pwoudkihla Padsipa.

Ahpw Siohwa ketin mwahngih soahng suwed koaros me wiawiher. Dahme e pahn ketin wia? Siohwa ketin kadarala soukohp Nadan rehn Depit. Nadan ahpw ndaiong: ‘Ohl kepwehpwe men naineki sihpw tohto, oh ohl semwehmwe men naineki sihmpwul emente me e uhdahn kin kesempwalki. Ohl kepwehpweo ahpw kihsang nein ohl semwehmweo sihmpwul tehmeno.’ Depit uhdahn lingeringerkihda met oh nda: ‘Ohl kepwehpwe menet konehngete en mehla!’ Nadan eri ndaiong Depit: ‘Kowe me ohl kepwehpweo!’ Depit uhdahn nsensuwedkihla, oh ndaiong Nadan: ‘I dipadahr ong Siohwa.’ Dihp wet kahrehda kahpwal tohto ong Depit oh eh peneinei. Siohwa ketin kaloke Depit ahpw e ketin mweidohng en momourte pwehki e kin mehlel oh aktikitik.

Depit men kauwada tehnpas en Siohwa, ahpw Siohwa ketin pilada nein Depit pwutak Solomon en kauwada tehnpaso. Depit ahpw tepida kaunopada dipwisou kan ong Solomon oh nda: ‘Tehnpas en Siohwa uhdahn pahn kaselel. Solomon wie pwulopwulte, ahpw I pahn sewese ih kaunopada dipwisou kan.’ Depit sawaskihda pein nah mwohni laud ong doadoahk en kauwada tehnpaso. E rapahkihda tohndoadoahk koahiek kei. E kihpene kohl oh silper, oh wahdo tuhke sidar kan sang Dair oh Saidon. Kerekerenlahng eh pahn mehla, Depit kihong Solomon koasoandi kan ong doadoahk en kauwada tehnpaso. Ih eri ndaiong: ‘Siohwa ketikihong ie pwe ien ntingihedi soahng pwukat koaros ong uhk. Siohwa pahn ketin seweseiuk. Ke dehr masak. Kehlail oh tapiada doadoahko.’