Mwurin Solomon eh wiahla nanmwarki en Israel, Siohwa ketin keinemwe reh, mahsanih: ‘Dahme ke anahne ien kihong uhk?’ Solomon ahpw sapengki: ‘I me pwulopwul, oh I sehse dahme I wiewia. Menlau ketikihong ie loalokong pwe ien apwalih sapwellimomwi aramas akan.’ Siohwa eri mahsanihong: ‘Pwehki omw peki loalokong, I pahn wiahiong uhk ken wia ohl me keieu loalokong nan sampah. I pahn pil wiahiong uhk ken uhdahn kepwehpwe. Oh ma ke pahn peikiong ie, ke pahn mour werei.’

Solomon eri tepida kauwada tehnpaso. E doadoahngki kohl, silper, tuhke oh takai me keieu kaselel. Ohl oh lih koahiek kid kei iang kauwada tehnpaso. Mwurin sounpar isuh, tehnpaso onopadahngehr kasarawihong Siohwa. Mie pei sarawi ehu wasao, oh mie meirong kei powe. Solomon eri kelepwikihdi mwohn pei sarawio oh kapakap: ‘Maing Siohwa, tehnpas wet sohte lapala de kaselel me itar ong komwi, ahpw komw ketin kupwure aht kaudok oh karonge aht kapakap kan.’ Dahme Siohwa ketin medewehiong duwen tehnpaso oh en Solomon kapakapo? Ni ahnsowohte me Solomon kanekehla eh kapakapo, kisiniei ahpw kohdihsang nanleng oh isikala meirong ko pohn pei sarawio. Siohwa ketin kupwurperenkihda tehnpaso. Ni ahnsou me mehn Israel ko kilangada met, irail uhdahn perenkihda.

Nanmwarki Solomon kin ndandki eh loalokong nan wehin Israel pwon oh pil lella wasa doh kan. Aramas akan kin kohdo rehn Solomon pwehn sewesehkin irail arail kahpwal kan. Pil lih nanmwarki en Sipa kohdo reh pwehn songki Solomon peidek apwal kan. Ni ahnsou me e rong en Solomon pasapeng kan, e nda: ‘I sohte kamehlele dahme aramas akan kin ndaiong ie duwen kowe, ahpw met I kilangehr me ke uhdahn loalokong sang dahme irail kin nda. Omw Koht, Siohwa, ketin kapaiaiukada.’ Mour uhdahn mwahu ong wehin Israel, oh aramas akan uhdahn nsenamwahu. Ahpw kereniongehr soahng kan pahn wekila.

Erein Solomon eh kin kaudokiong Siohwa, e kin mie popohl nan Israel. Ahpw Solomon pwoudikihda lih tohto sang sahpw teikan, oh lih pwukat kin kaudokiong dikedik kan. Ekisekis, Solomon wekila, oh e pil tepida kaudokiong dikedik kan. Siohwa uhdahn ketin lingeringerkihda met. Ih eri mahsanihong Solomon: ‘I pahn kihsang wehin Israel rehn omw peneinei oh e pahn nehnehpeseng wiahla wehi riau. I pahn kihong pali me laudo rehn emen noumw ladu kan, a omw peneinei pahn kaunda pali me tikitiko.’

Siohwa pil ketin kasansalehda sapwellime pilipilo ni ehu ahl tohrohr. Emen nein Solomon ladu, Seropoham, wie alialu pohn ahlo oh tuhwong soukohp Ahisa. Ahisa eri tehrpeseng eh likoun likio wiahda pelien likou 12 oh ndaiong Seropoham: ‘Siohwa pahn ketikihsang wehin Israel rehn en Solomon peneinei oh nehkpeseng ni pali riau. Ale eisek en pelien likou pwukat pwehki kowe me pahn wia nanmwarki en keinek eisek ko.’ Nanmwarki Solomon ahpw rongada duwen met oh men kemehla Seropoham! Seropoham eri tang kohkohla Isip. Kedekedeo, Solomon ahpw mehla oh nah pwutak Reopoham me uhd wiahla nanmwarki. Seropoham eri medewe me e solahr keper en pwurala Israel.

Ohl mah kan nan Israel ndaiong Reopoham: ‘Ma ke pahn apwalih mwahu aramas akan, irail pahn loalopwoatohng uhk.’ Ahpw kompoakepahn Reopoham me pwulopwul kan ndaiong: ‘Ke anahne lemeiong aramas akan! Wiahda ren doadoahk laudsang mahs!’ Reopoham eri rongala kaweid en kompoakepah pwulopwul ko. E kin lemeiong aramas ako, oh irail eri uhwongada. Irail wiahiong Seropoham en wiahla nanmwarki en keinek 10 ko, me uhd adanekihla wehin Israel. Keinek riau teiko uhd adanekihla wehin Suda, oh irail kin loalopwoatohngete Reopoham. Eri met keinek 12 en Israel ko nehnehpesengier.

Seropoham sohte men nah aramas ako rehn kohla kaudok nan Serusalem, me mi nan en Reopoham wehi. Ke ese dahme kahrehda? Seropoham perki pwe irail de uhwongada ih oh uhd utung Reopoham. Eri e wiahda kouwol kohl riemen oh ndaiong nah aramas ako: ‘Serusalem nohn doh. Kumwail kak kaudokte wasaht.’ Aramas ako ahpw tepida kaudokiong kouwol kohl ko oh pwurehng manokehla Siohwa.