Nanmwarki en Siria, Penadad, kin pousehlahte mahmahweniong Israel. Ahpw soukohp Elisa kin padahkihong nanmwarki en Israel dahme pahn wiawi ehuehu ahnsou, kahrehda e kak pitila. Eri Penadad ahpw koasoanehdi en kawaisang Elisa. E diarada me Elisa mihmi nan kahnimw en Dodan, oh e kadarala sounpei en Siria ko ren parokedi ih.

Mehn Siria ko ahpw kohla Dodan nipwongo. Nimenseng en mandahn rahno, nein Elisa laduwo ahpw kohieila likio oh kilangada sounpei ko ar kapilpenehr kahnimwo. E uhdahn masepwehkada oh wer, nda: ‘Elisa, dahme kita pahn wia?’ Elisa ahpw sapengki: ‘Iangata kan tohtohsang irail.’ Ni ahnsowohte, Siohwa ketin wiahiong nein Elisa laduwo en kilangada nahna kan me kapilpene kahnimwo pwon eh direkihla oahs kan oh werennansapw kisiniei kan.

Ni ahnsou me sounpei en Siria ko song en koledi Elisa, e kapakap, nda: ‘Maing Siohwa, komw ketin karotongehla mesen sounpei pwukat.’ Mendahki sounpei ko kakete kilang wasa, ahpw irail sehse ia wasa irail mihmi ie ni ahnsowo. Elisa ahpw ndaiong irail: ‘Kaidehkin kahnimw wet me kumwail kohkohdohng ie. Kumwail idawehn ie, I pahn kahreikumwaillahng ohl me kumwail raparapahki.’ Irail eri idawehnla Elisa nan Sameria, wasa me nanmwarki en Israel kin mihmi ie.

Mehn Siria ko ahpw tehkada wasa me re mihmi ieo. Nanmwarki en Israelo ahpw idek rehn Elisa: ‘Ien kemeirailla?’ Ia duwe, Elisa doadoahngki ahnsou mwahu wet en dupukohng aramas pwukat me song en kamedekihala ih? Soh. Elisa nda: ‘Ke dehr kemeirailla. Kihong irail kanarail mwenge, oh kadarirailla.’ Nanmwarkio eri wiahda lapalahn kamadipw ehu ong irail oh kadariraillahng ni imwarail ko.

Sesepel naineki serepein men me adaneki Adalaia, me uhdahn suwed duwehte eh nohno. Adalaia pwoudiki nanmwarki en Suda. Ni ahnsou me eh pwoudo mehla, nah pwutako me uhd kaunda. Ahpw ni ahnsou me nah pwutako mehla, Adalaia pein wiahiong ih en kaunda wehin Suda. Ih eri kin song en kauwehla keinek en nanmwarkio, e kin kemehla emen me pahn wiahla kaun likin ih, pil nein nah seri kan pwutak kan. Koaros kin masak ih.

Samworo Lapalap Sehoiada oh eh pwoud, Sehosihpa, ese me dahme Adalaia kin wiewiao uhdahn suwed. Ira tounmeteikihla ara mour pwehn ekihla emen nein Adalaia seri nah pwutak, me adaneki Sohas. Ira apwalihada kisin pwutako nan tehnpas sarawio.

Ni ahnsou me Sohas sounpar isuh, Sehoiada kapokonepene lapalap akan koaros oh mehn Lipai kan oh ndaiong irail: ‘Kumwail silehdi wenihmwen tehnpas sarawi wet, oh kumwail dehr mweidohng emen en pedolong.’ Sehoiada eri wiahiong Sohas en wiahla nanmwarki en Suda oh kihdiong lisoarop en nanmwarki pohn moange. Aramas en Suda ko ahpw weriwerki: ‘Nanmwarki en mour werei!’

Lih nanmwarki Adalaia ahpw rongada aramas ako ar wie weriwer, ih eri mwadangete tangala ni tehnpas sarawio. Ni ahnsou me e kilangada nanmwarki kapwo, e weriwer oh ndinda: “Pangala! Pangala!” Lapalap ako ahpw koledi lih nanmwarki suwedo oh wahieila kemehla. A ia duwen soahng suwed kan me e wiahdahng wehio?

Sehoiada sewese wehio en wiahda inou ong Siohwa, irail inoukihda me re pahn kaudokiong Ih kelehpw. Sehoiada eri ndaiong irail ren kauwehla imwen Paal oh sukpeseng dikedik kan. E pilada samworo kan oh mehn Lipai kan en doadoahk nan tehnpaso pwe aramas akan en kak pwurehng kaudok wasao. E pilada sounsile kehl kan en silehdi tehnpas sarawio pwe sohte aramas samin en kak pedolong. Sehoiada oh lapalap akan eri wahla Sohas nan tehnpas en nanmwarki oh kihdiong nan sehr en nanmwarki. Aramas en Suda ko ahpw perenda. Irail kakehr papah Siohwa, oh saledeksang lih suwed Adalaia oh kaudok en Paal. Ke kilang ia duwen en Sehoiada eimah eh sewesehda aramas tohto?