Nan kahnimw en Asiria me adaneki Ninipe, aramas akan uhdahn suwed. Siohwa mahsanihong sapwellime soukohp Sona en kohla Ninipe oh padahkihong aramas ako me irail anahne wekidala arail wiewia kan. Ahpw Sona tang kohkohla ehu wasa tohrohr. E iangada sohp pwoat me kohkohlahng Tarsis.

Ni ahnsou me sohpo mihmiher nan madauo, lapalahn melimel ehu ahpw wiawi, oh tohn sohpo uhdahn masepwehkada. Irail eri kapakapohng arail koht kan oh idek: ‘Dahme met wiewiawihki?’ Sona, eri ndaiong irail: ‘Ngehi me kahrehda. I tangasang dahme Siohwa ketin mahsanihong ie ien wia. Kumwail keseieilahng nansedo, oh kisinieng wet ahpw pahn uhdi.’ Tohn sohpo sohte men kesehla Sona nansedo, ahpw Sona ngihtehtehki. Eri ni ahnsou me irail keselahng Sona nansedo, kisiniengo pa uhdi.

Sona medewehier me e pahn mehla. Ni eh wie kikihrdi nansedo, e kapakapohng Siohwa. Siohwa eri ketin kadarala lapalahn mwahmw men. Mwahmwo eri kadallehla Sona, ahpw Sona sohte mehla. Nan kapehden mwahmwo, Sona kapakap, nda: ‘I inoukihda me I pahn ahnsou koaros peikiong komwi.’ Siohwa ketin kahrehiong Sona en momour nan kapehden mwahmwo ong rahn siluh oh ketin wiahiong mwahmwo en mwuskihiei Sona pohn sahpw ehu.

Pwehki Siohwa ketin kapitalahr Sona, met wehwehki me Sona solahr pahn anahne kohla Ninipe? Soh. Siohwa pil pwurehng mahsanihong en kohla Ninipe. Ni ahnsou wet Sona peikiong Siohwa. E kohla wasao oh ndaiong aramas suwed ko: ‘Mwurin rahn 40, Ninipe pahn ohla.’ Mwuri, mehkot me e sohte kasik wiawi, mehn Ninipe ko rong ih oh wekidala arail wiewia kan. Nanmwarki en Ninipe ahpw ndaiong nah aramas akan: ‘Kumwail kapakapohng Koht, oh koluhla. Ele mwein e sohte pahn kauweikitailla.’ Ni Siohwa eh ketin kilangada me aramas ako koluhla, e sohte kauwehla Ninipe.

Sona uhdahn lingeringerkihda kahnimwo eh sohte ohla. Nna song medewehla: Siohwa ketin kanengamah oh mahkohng Sona, ahpw Sona sohte mahkohng aramas en Ninipe ko. E ahpw mwohndiong likin kahnimwo pahn mwetehn kisin tuhke pwoat. Kisin tuhkeo eri mehla, oh Sona lingeringerkihda. Siohwa eri mahsanihong ih: ‘Ke nsenohki tuhke wet laudsang omw nsenohki mehn Ninipe kan. I kasalehiong irail mahk, oh irail mourla.’ Dahme kesempwal wasaht? Aramas en Ninipe kan kesempwalsang tuhke sohte lipilipil.

Wehin Asiria kalowedier kadaudok eisek en wehin Israel ko. Met Senakerip, nanmwarki en Asiriao, men kalowehdi kadaudok riau en wehin Suda. Ih eri tepida kalowehdi ehuehu kahnimw en Suda. Ahpw kahnimw me e keieu men alehdi iei Serusalem. Ahpw Senakerip sehse me Siohwa kin ketin pere Serusalem.

Esekaia, nanmwarki en Suda, pwainohng Senakerip mwohni tohto pwe en dehr mahweniong Serusalem. Mendahki Senakerip alehdier mwohni ko, e kadaralahte nah pwihnen sounpei kehlail kan ren mahweniong Serusalem. Aramas akan nan kahnimwo uhdahn masepwehkada pwehki mehn Asiria kan wie kerekerendohng irail. Esekaia eri ndaiong irail: ‘Kumwail dehr masepwehk. Mehn Asiria kan kehlail, ahpw Siohwa pahn ketin wiahiong kitail en kehlail sang irail.’

Senakerip eri kadarala Rabshakeh nah meninkedero ong Serusalem pwehn kauwe irail. Meninkedero ahpw kesihnenda likin kahnimwo oh werkilahng irail: ‘Siohwa sohte kak sewese kumwail. Kumwail dehr mweidohng Esekaia en pitih kumwail. Sohte koht emen me kak doareikumwailla sang kiht.’

Esekaia eri patohwan peki rehn Siohwa dahme e pahn wia. Siohwa ketin sapeng, mahsanih: ‘Ke dehr masak dahme Rabshakeh nda. Senakerip sohte pahn alehdi Serusalem.’ Mwurin mwo, Esekaia alehdi kisinlikou kei sang Senakerip. Kisinlikou ko koasoia: ‘Kumwail uhdihsang uhwong kiht. Siohwa sohte kak kapitkumwailla.’ Esekaia eri kapakap, nda: ‘Maing Siohwa, komw menlau doareikitala, pwe koaros en ese me komwi kelehpw me Koht mehlel.’ Siohwa eri mahsanihong: ‘Nanmwarki en Asiria sohte pahn kohdo pedolong nan Serusalem. I pahn doarehla ei kahnimwet.’

Senakerip uhdahn kamehlele me e pahn uhd ahnekihla Serusalem. Ahpw ehu pwohngo, Siohwa ketin kadarala tohnleng men wasa me sounpei ko pweidi ie likin kahnimwo. Tohnlengo eri kemehla sounpei 185,000! Nein Nanmwarki Senakerip sounpei keieu kommwad kan mehla. Sohla mehkot me e kak wia ahpw pwurala eh wasa pwehki eh sohte pweida. Siohwa ketin doarehla Esekaia oh Serusalem, duwehte dahme e ketin inoukihdahro. Ma ke mihmi wasao nan Serusalem, ke pahn likih Siohwa?