Mehn Suda kan kin pwurepwurehng sohpeisang Siohwa oh kaudokiong koht likamw akan. Erein sounpar tohto, Siohwa kin ketin songosong en sewese irail. E ketin kadarala soukohp tohto pwehn padahkih irail ahpw irail sohte kin rong. Irail kin kouruhrki soukohp ko. Ia duwen Siohwa eh ketin kauhdi arail kin kaudokiong dikedik kan?

Nanmwarki en Papilon, Nepukadnesar, kin kalkalowehdi ehu wehi mwurinte ehu. Keieun eh kalowehdi Serusalem, e koledi Nanmwarki Sehoiakin, nah lapalap kan, sounpei kan, oh nah tohndoadoahk koahiek kan, oh wahla irail koaros nan Papilon. E pil wahsang dipwisou kesempwal koaros nan tehnpas en Siohwa. Nepukadnesar eri kasapwilada Sedekaia en wiahla nanmwarki en Suda.

Nin tapio, Sedekaia kin peikiong Nepukadnesar. Ahpw wehi kan me karanih ih oh soukohp likamw kan kaweidki Sedekaia en uhwong Papilon. Seremaia padahkihong ih: ‘Ma ke pahn uhwong, e pahn mie kamaramas, lehk lapalap, oh soumwahu nan Suda.’

Mwurin eh kakaunki sounpar waluh, Sedekaia koasoanehdi en uhwongada Papilon. E peki rehn sounpei en Isip kan ren sewese ih. Nepukadnesar eri kadarala nah sounpei ko ren mahweniong Serusalem. Irail eri kohla oh mihmi kapilpene kahnimwo. Seremaia eri ndaiong Sedekaia: ‘Siohwa mahsanih ma ke pahn peki mahk rehn mehn Papilon kan, kowe oh kahnimw wet pahn mourla. Ahpw ma ke sohte pahn, mehn Papilon kan pahn isikada Serusalem oh salihiukedi.’ Sedekaia eri sapengki: ‘I sohte pahn peki mahk!’

Mwurin sounpar ehu elep, sounpei en Papilon kan kauwehla kelen Serusalem oh pedolong isikada kahnimwo. Irail isikada tehnpas sarawio, kemehla aramas tohto, oh salihedi aramas kid kei.

Sedekaia tangasang Serusalem, ahpw mehn Papilon kan pwakihala mwuri. Irail eri koledi ih limwahn Seriko oh wahla rehn Nepukadnesar. Nanmwarki en Papilon ahpw kemehla nein Sedekaia pwutak kan mwohn meseo. Nepukadnesar eri kamaskunihala Sedekaia oh kesehlong nan imweteng, wasa me e mihmi ie lao ih mehla. Ahpw Siohwa ketin inoukihong mehn Suda kan: ‘Mwurin sounpar 70, I pahn kapwureikumwaillahng Serusalem.’

Dahme pahn wiawihong irail me pwulopwul kan me iang selidi nan Papilon? Irail pahn loalopwoatohngete Siohwa?

Ni ahnsou me Nepukadnesar wahsang nein lapalap en Suda pwutak kan wahla Papilon, e kihong emen nah lapalap me adaneki Aspenas en apwalih irail. Nepukadnesar eri ndaiong Aspenas en rapahkihda me keieu kehlail oh loalokong nanpwungen pwutak ko. Irail pahn ale kasukuhl erein sounpar siluh. Kasukuhl wet pahn kaunopiraillda ong wia tohndoadoahk kesempwal kei nan tehnpas en nanmwarki en Papilon. Pwutak ko anahne sukuhlki wadawad, nting, oh lokaiahki lokaiahn Akkadian en Papilon. Irail pil anahne iang kang soangen mwenge kan me nanmwarkio oh nah lapalap akan kin kang. Meh pahmen nanpwungen pwutak ko iei Daniel, Ananaia, Misael, oh Asaraia. Aspenas kihong irail ahd en Papilon kapw kei: Peldesasar, Sadrak, Mihsak, oh Apedneko. Ia duwe, kasukuhl wet pahn kahrehiong irail ren uhdihsang papah Siohwa?

Pwutak pahmen pwukat koasoanehdi teng ren peikiong Siohwa. Irail ese me re sohte pahn kang kenen nanmwarki mwenge pwehki sapwellimen Siohwa Kosonnedo koasoia me ekei mwenge pwukat samin. Irail eri ndaiong Aspenas: ‘Menlau ke dehr kihong kiht sen iang kang kenen nanmwarkio mwenge kan.’ Aspenas eri ndaiong irail: ‘Ma kumwail sohte pahn mwenge oh nanmwarkio kilangada me kumwail mwomwen soumwahu, e pahn kemeiehla!’

Daniel ahpw medewehda ehu soahng tohrohr. Ih eri ndaiong sounsileparailo: ‘Menlau kihongkihtte wahntuhke kan oh pihl ong rahn eisek. Kowe eri kapahrekihong kiht ong pwutak teiko me kin iang kang kenen nanmwarkio mwenge kan.’ Sounsilasilo eri pwungkihda met.

Mwurin rahn eiseko, Daniel oh kompoakepah silimeno mesen kehlailasang pwutak teiko. Siohwa uhdahn kupwurperenkihda arail peikiong ih. E pil ketikihong Daniel loalokong en wehwehki kasansal kan oh ouraman kan.

Ni ahnsou me arail kasukuhlo nek, Aspenas kahrehla pwutak ko rehn Nepukadnesar. Nanmwarkio eri koasoiong irail oh diarada me Daniel, Ananaia, Misael, oh Asaraia loalokong oh dehdehki mwahu soahng kan laudsang pwutak teiko. Ih eri pilada meh pahmen pwukat ren doadoahk nan tehnpeseo. Nanmwarkio kin kalapw peki kaweid rehrail ong soahng kesempwal kan. Siohwa ketin wiahiong irail ren loalokong sang nein nanmwarkio ohl loalokong kan oh nah sounwunahni kan.

Mendahki irail mihmi nan sahpw ehu me kaidehn sapwarail, Daniel, Ananaia, Misael, oh Asaraia sohte manokehla me irail sapwellimen Siohwa aramas kei. Ke pahn pil kin ahnsou koaros tamataman Siohwa, mehnda ma ahmw pahpa nohno sohte mi rehmw?