Ehu pwohngo, Nanmwarki Nepukadnesar ouramanda. E kin pwunodki eh ouramano kahrehda e sohte kin kak meirla. Ih eri ekerpene nah sounwunahni ko oh ndaiong irail: ‘Kumwail kawehwehiong ie ei ouramanet.’ Irail eri ndaiong: ‘Ndaiong kiht dahme ke ouramankihda, Maing nanmwarki.’ Nepukadnesar ahpw ndaiong irail: ‘Soh! Kumwail ndaiong ie dahme I ouramankihdao, pwe I de kemeikumwailla.’ Irail eri pwurehng ndaiong ih: ‘Ndaiong kiht dahme ke ouramankihdao, oh se pahn kawehwehiong uhk.’ Ih eri nda: ‘Kumwail koaros songosong en pitih ie. Kumwail ndaiong ie dahme I ouramankihdao!’ Irail eri ndaiong nanmwarkio: ‘Sohte ohl emen me momour me kak wia met. Dahme ke pekipekien uhdahn sohte kak wiawi.’

Nepukadnesar uhdahn lingeringerda, kahrehda e ruwese ohl loalokong ko koaros nan sahpwo en kamakamala. Met wehwehki me Daniel, Sadrak, Mihsak, oh Apedneko pahn pil iang kamakamala. Daniel eri peki rehn nanmwarkio en kihong irail ekis ahnsou. Ih oh kompoakepah ko eri kapakapohng Siohwa oh peki en ketin sewese irail. Dahme Siohwa ketin wia?

Nan kasansal ehu, Siohwa ketin kasalehiong en Nepukadnesar ouramano rehn Daniel oh ketikihong ih wehwe. Mwurin rahno, Daniel ahpw kohla rehn nein nanmwarkio laduwo oh nda: ‘Ke dehr kemehla ohl loalokong kan. I kak kawehwehda en nanmwarkio ouramano.’ Laduwo eri kahrehla Daniel rehn Nepukadnesar. Daniel eri ndaiong nanmwarkio: ‘Koht ketin kasalehiong uhkehr dahme pahn wiawi ni ahnsou kohkohdo. Ih met wehwehn omw ouramano: Ke kilangada lapalahn sansal takai ehu me moangeo wiawihkihda kohl, mwaremwareo oh peh ko silper, kapehde oh tepin denge ko prons, neh kan mete, oh patehn neh ko mete doal pwehl. Takai ehu ahpw pwupwusang pohn nahnao, oh pwupwudiong pohn patehnehn sansalo. Sansalo eri pisetikpene wiahla pwelpar oh kisiniengo eri peukpeseng. Takaio eri wiahla lapalahn nahna ehu, oh audehda sampah.’

Daniel eri nda: ‘Ih met wehwehn omw ouramano: Omw wehi iei moahng kohlo. Silpero iei wehi me pahn kohdo mwurin omw wehi. Oh mie ehu wehi me pahn kohdo duwehte prons, me pahn kaunda sampah pwon. Wehi me pahn kohdo mwurin mwo pahn kehlail duwehte mete. Oh kaimwisekala, mie wehi ehu me pahn nehnehpeseng ekei pahn kehlail duwehte mete oh ekei pahn luwet duwehte pwehl. Takaio me wiahla nahna ehu iei Wehin Koht. E pahn kauwehla wehi pwukat koaros oh pahn mihmi kohkohlahte.’

Nepukadnesar eri poaridi mwohn Daniel. Ih eri nda: ‘Omw Kohto kasalehdahr ouraman wet ong uhk. Sohte emen Koht me duwehte ih.’ Nepukadnesar sohte kemehla Daniel ahpw e kasapwilada ih en wia kaunen ohl loalokong koaros oh kaunda sahpw koaros nan Papilon. Ke kak kilang ia duwen Siohwa eh ketin sapengala en Daniel kapakapo?

Ahnsou kis mwurin Nanmwarki Nepukadnesar ouramankihda duwen sansalo, e wiahda lapalahn sansal ehu me wiawihkihda kohl. E pwilikihdiong sansal kohlo nan patapat en Dura oh ekerodo aramas keieu kesempwal kan nan eh wehi iangahki Sadrak, Mihsak, oh Apedneko ren pokonpene mwohn sansalo. Nanmwarkio ahpw mahsanih: ‘Ni ahnsou me kumwail pahn rong ngilen sowi, arp oh keseng kan, kumwail pahn poaridiong mwohn sansalo! Mehmen me sohte pahn poaridiong mwowe pahn lekdeklahng nan kisiniei.’ Ia duwe, mehn Ipru silimeno pahn poaridiong mwohn sansalo de re pahn kaudokiong Siohwa kelehpw?

Nanmwarkio eri ruwese ren tapiada kesengo. Koaros poaridi oh pwongih sansalo, ahpw ihte Sadrak, Mihsak, oh Apedneko me sohte iang poaridi. Ekei ohl kan kilang met oh padahkihong nanmwarkio: ‘Mehn Ipru silimeno sohte men pwongih sansal me komw wiahdao.’ Nepukadnesar ahpw padahkihong ren kahrehdo irail reh. Ih eri ndaiong irail: ‘I pahn mweidohng kumwail pil ehu ahnsou en pwongih sansalo. Ma kumwail kahng, eri I pahn keseikumwaillong nan kisinieio. Sohte koht emen pahn kak doareikumwaillsang ie. A re sapengki: ‘Se sohte anahne pil ehu ahnsou. Aht Koht pahn ketin kapitkitala. Ahpw ma e sohte ketin wia met maing, se sohte pahn pil pwongih sansal wet.’

Nepukadnesar ahpw uhdahn lingeringerda. E padahkihong nah ohl ko: ‘Saunda kisinieien en pak isuh kehlailasang nin tapio!’ Ih eri padahkihong nah sounpei ko: ‘Pirehdi ohl pwukat oh kesehlong nan kisinieien!’ Uwen kehlail en kisinieio kahrehda sounpei ko me kohla limwahn kisinieio mehla ahnsowohte. Mehn Ipru silimeno pwupwulong nan kisinieio. Ahpw ni ahnsou me Nepukadnesar kilenglong nan kisinieio, e kilangada me ohl pahmen me alialuseli nan kisinieio a kaidehn meh silimen. E masepwehkada oh idek rehn nah ohl lapalap ko: ‘Kaidehn ohl silimen me kitail kesehlong nan kisinieio? I kilang meh pahmen, ahpw emen rehrail mwomwen tohnleng men!’

Nepukadnesar eri ekis keila limwahn kisinieio oh likwerih irail, nda: ‘Kumwail pedoido, kumwail me kin papah Koht Keieu Lapalahpie!’ Aramas koaros ahpw pwuriamweikihla arail kilang Sadrak, Mihsak, oh Apedneko arail aluhieisang nan kisinieio ahpw sohte rongala. Kilirail kan, pitenmoangarail kan, oh arail likou kan sohte rongala, oh pil sohte pwohn ediniei kis rehrail.

Nepukadnesar eri nda: ‘En Sadrak, Mihsak, oh Apedneko arail Kohto me keieu lapalap. E ketin kadarodo sapwellime tohnleng pwehn doareirailla. Sohte koht emen me duwehte arail Koht.’

Duwehte mehn Ipru silimen pwukat, ke koasoanehdi teng me ke pahn lelepek ong Siohwa sohte lipilipil dahme pahn wiawi?