Ehu pwohngo, Nepukadnesar ahpw ouramankihda ouraman kamasepwehk ehu. Ih eri ekerpene nah ohl loalokong ko koaros pwe ren padahkihong ih wehwehn eh ouramano. Ahpw sohte emen rehrail me kak kawehwehda wehwehn eh ouramano. Mwurin mwo, nanmwarkio ahpw koasoiong Daniel.

Nepukadnesar ndaiong Daniel: ‘Nan ei ouramano, I kilangada tuhke pwoat. E wie reireida lao lel pahnlahng. Oh aramas koaros nan sampah kak kilang. Teh ko inenen lingan oh diren wah. Mahn akan kin kommoal pahn eh mwete, oh menpihr kan kin wiahda pasarail ni rah kan. Tohnleng men pa kohdihdosang nanleng. Tohnlengo ahpw mahsanih: “Pelehdihsang tuhkehn, oh pelehsang rah kan. Ahpw paliweren tuhkehn oh kalewe kan en luhwehdi nan pwehlen, oh pirekipene mete oh prons. Mohngiong en tuhke wet pahn wekideksang ni mohngiong en aramas uhd wekidekiong ni mohngiong en mahn, lao ahnsou isuhwo pahn imwisekla. Aramas koaros pahn esehda me Koht iei me Kaun oh me e kak ketikihong wehi ehu rehn emen me e kupwurki ketikihong.”’

Siohwa ketin kasalehiong Daniel wehwehn ouramano. Ni ahnsou me Daniel wehwehkihda wehwehn ouramano, e masepwehkada. Ih eri nda: ‘Maing nanmwarki, I men ouraman wet en pid omwi imwintihti kan, ahpw e pid komwi. Lapalahn tuhke me paldio iei komwi. E pahn sohla omw wehi, oh ke pahn kin kangkang dipwen nan mohs duwehte mahn lawalo men. Ahpw pwehki tohnlengo eh mahsanih me paliweren tuhkeo oh kalewe kan en luhwehdi, ke pahn pwurehng wiahla nanmwarki.’

Sounpar ehu mwuri, Nepukadnesar wie alialu pohn palangk en tehnpeseo, kapikapinga lingan en Papilon. E nda: ‘Kilang uwen lingan en kahnimw wet me I kauwada. Kilang ia uwen ei lapalap!’ Ni eh wie lokolokaia, ngihl ehu pa kohdihdosang nanleng, oh mahsanih: ‘Nepukadnesar! Met e pahn sohla omw wehi.’

Ni ahnsowohte, Nepukadnesar ahpw sahliella oh duwehla mahn lawalo men. E anahne kohkohsang nan tehnpeseo oh kohla mihmi rehn mahn lawalo kan nan mohso. Pitenmoangen Nepukadnesar ko reireila duwehla wunen ikel men, oh kiki kan reireila duwehte kikin menpihr laud kan.

Mwurin sounpar isuhwo eh imwisekla, Nepukadnesar pwurehng mwahula oh Siohwa ketin wiahiong ih en wia nanmwarkien Papilon. Nepukadnesar eri nda: ‘I kapinga Siohwa, Nanmwarkien nanleng kan. Met I esehier me Siohwa iei me Kaun. E kak kasapwilidi me aklapalap kan, oh e kak ketikihong wehi ehu rehn emen me e kupwurki ketikihong.’

Kedekedeo, Pelsassar ahpw wiahla nanmwarki en Papilon. Ehu pwohngo, e lukepene aramas kesempwal kid kei nan sahpwo ong ni kamadipw ehu. Ih eri ndaiong nah ladu ko ren wahieido kep kohl ko me Nepukadnesar wahsang ni tehnpesen Siohwa. Pelsassar oh aramas me e lukehdo ko ahpw nim wain sang nan kep ko oh kapingahki arail koht kan. Ni ahnsowohte, pehn ohl emen pa pwarada oh tepida ntingihdi lepin lokaia kei me sohte wehwe pohn dihd en wasahn mwengeo.

Pelsassar ahpw masepwehkada. Ih eri ekerpene nah sounwunahni kan oh inoukihong irail met: ‘Ma emen rehmwail pahn kak kawehwehda lepin lokaia pwukat, I pahn wiahiong ih en kesiluhn lapalap nan Papilon.’ Irail eri song kawehwe, ahpw sohte emen rehrail me kak kawehwehda lepin lokaia ko. Lih nanmwarkio ahpw kohdo oh nda: ‘Mie ohl emen me adaneki Daniel, ih me kin kawehwehiong Nepukadnesar soahng kan. E kak kawehwehiong uhk lepin lokaia pwukat.’

Daniel eri kohdo rehn nanmwarkio. Pelsassar ahpw ndaiong ih: ‘Ma ke kak wadek oh kawehwehiong ie lepin lokaia pwukat, I pahn kihong uhk mwaramwar kohl ehu oh kowe me pahn kesiluhn lapalap nan Papilon.’ Daniel eri sapengki: ‘I sohte anahne omw kisakis kan, ahpw I pahn ndaiong uhk wehwehn lepin lokaia pwukat. Omw pahpa Nepukadnesar kin aklapalap, oh Siohwa ketin kahrehiong ih en aktikitikla. Ke ese soahng koaros me wiawihong ih, ahpw ke sohte wauneki Siohwa pwehki omw nim wain sang nan kep kohl kan me kohsang nan tehnpeseo. Eri Koht ketin ntingihedi lepin lokaia pwukat: Mene, Mene, Tekel, oh Parsin. Lepin lokaia pwukat wehwehki me mehn Media oh Persia kan pahn kalowehdi Papilon, oh ke sohla pahn wia nanmwarki.’

Nan ahnsowo, e mwomwen me sohte ehu wehi me kak kalowehdi Papilon. Lapalahn dihd kehlail kei oh pillap loal ehu me pidakihpene kahnimwo. Ahpw pwohngohte, mehn Media oh Persia kan mahweniong Papilon. Sairus, nanmwarki en Persia kakusala pillapo ekis wasa tohrohr pwe nah sounpei ko en kak kotehla pillapo oh doudahla ni kelen kahnimwo. Ni ar lella mwo, wenihmw ko wie langalang! Sounpei ko ahpw tangolongala oh kalowehdi kahnimwo, oh kemehla nanmwarkio. Sairus eri uhd wiahla kaunen Papilon.

Mwotomwot sang sounpar ehu, Sairus pakairkihda: ‘Siohwa mahsanihong ie en pwurehng kauwada tehnpas sarawio nan Serusalem. Sohte lipilipil rehn sapwellime aramas akan me men iang sawas kak kohla.’ Eri duwehte me Siohwa ketin inoukihdao, tohto mehn Suhs kan pwurala nan sapwarail sounpar 70 mwurin Serusalem eh ohla. Sairus kapwurehla kep kohl oh silper oh dipwisou kan me Nepukadnesar wahsang nan tehnpaso. Ke kak kilang duwen Siohwa eh ketin doadoahngki Sairus pwehn sewese sapwellime aramas akan?