Pil emen nanmwarki en Papilon iei Darius mehn Media. Darius tehkada me Daniel weksang meteikan. E kihong Daniel en kaunda ohl kesempwal kan nan sahpwo. Ohl pwukat kin luwangki Daniel oh kin men kemehla ih. Re ese me Daniel kin kapakapohng Siohwa pak siluh nan rahn koaros, irail eri ndaiong Darius: ‘Maing nanmwarki, e anahne en mie kosonned ehu me koaros pahn kin kapakapohng komwi kelehpw. Mehmen me pahn sapeikiong kosonnedo pahn koskoslong nan pwoar ehu me diren laion.’ Darius eri pwungki koasoandi wet oh sainihala kosonnedo.

Ni ahnsowohte me Daniel rongada duwen kosonned kapwo, e kohkohla ni imweo. Mwohn wenihmwtok ehu me langalang, e kelepwikihdi oh kapakapohng Siohwa. Ohl ako me kin luwangki Daniel ahpw tangolongala nan imweo oh kilangada eh wie kapakap. Irail eri tangala rehn Darius oh nda: ‘Daniel sapeikiong komwi. E kin kapakapohng eh Kohto pak siluh nan rahn koaros.’ Darius kin pwungki Daniel oh sohte men en mehla. Rahn ehu pwon Darius kin medemedewe dahme e kak wia pwehn kapitala Daniel. Ahpw sohte emen, de pil nanmwarki men kak wekidala kosonned ehu me nanmwarkio sainialahr. E anahne ndaiong nah ohl ako ren kesehlong Daniel nan pwoaren laion kommwad kan.

Nipwongo, Darius uhdahn pwunodkihda Daniel kahrehda e sohla kak meirla. Nimensengo, e tangala ni pwoahro oh likwerih Daniel, nda: ‘Omw Kohto doareiukala?’

Darius eri rongada ngihl ehu. Ngilen Daniel! E sapeng Darius, nda: ‘Sapwellimen Siohwa tohnleng men kihpene ewen laion kat. Irail sohte douluhl kauweiehla.’ Darius uhdahn perenkihda met! Ih eri ruwese me Daniel en kohdahsang nan pwoahro. Sohte kisin ohla kis ni paliwereo. Nanmwarkio eri pakairki: ‘Ohl koaros me kedipa Daniel en koskoslong nan pwoahro.’ Ni ahnsou me ohl ako koskoslong nan pwoahro, laion ko eri mwadangete kangirailla.

Darius eri kadarpeseng pakair wet ong nah aramas akan: ‘Aramas koaros anahne masak en Daniel Kohto. E kapitala Daniel sang laion kan.’

Ke kin kapakapohng Siohwa rahn koaros, duwehte Daniel?

Ester serepein en Suhs men me kin mihmi nan Susa, kahnimw ehu nan Persia. Sounpar tohto mahs, Nepukadnesar wahsang eh peneinei Serusalem. E tikida rehn ohl me e pahn rianiki Mordekai, emen nein Nanmwarki en Persia Ahasuerus ladu.

Nanmwarki Ahasuerus men rapahkihda emen lih nanmwarki kapw. Nah ladu kan eri wahdohng ih lih akan me keieu masamwahu nan sahpwo, iangahki Ester. Nanpwungen lih ako koaros, nanmwarkio pilada Ester en wia lih nanmwarki. Mordekai eri ndaiong Ester en dehpa ndahda me ih mehn Suhs men.

Ohl aklapalap men me adaneki Aman me wia kaunen nein nanmwarkio lapalap kan koaros. E kin men aramas koaros en poaridiong ih. Ahpw Mordekai sohte kin wia met, oh Aman lingeringerda kahrehiong eh men kemehla Mordekai. Ni ahnsou me Aman diarada me Mordekai mehn Suhs men, e koasoanehdi en kemehla mehn Suhs koaros nan sahpwo. Ih eri ndaiong nanmwarkio: ‘Mehn Suhs akan keper; ke anahne kemeirailla.’ Ahasuerus eri nda: ‘Wia soahng koaros me ke anahne wia,’ ih eri pil kihong Aman manaman en wiahda kosonned ehu. Aman wiahda kosonned ehu me padahkihong aramas akan ren kemehla mehn Suhs koaros ni kaeisek siluhn rahn en sounpwong en Adar. Siohwa ketin tetehk dahme wiewiawi.

Ester sohte ese duwen kosonnedo. Mordekai eri kadaralahng ih ehu kisinlikoun kosonnedo oh ndaiong ih: ‘Kohla oh koasoiong nanmwarkio.’ Ester eri nda: ‘Emen me pahn kohla rehn nanmwarkio ni eh sohte ale luhk pahn kamakamala. Rahner 30 nanmwarkio saikinte luke ie! Ahpw I pahn kohla. Ma nanmwarkio pahn kapadohng ie nah sokono, I pahn mourla. Ma e sohte wia met, I pahn mehla.’

Ester eri kohla nan kelen imwen nanmwarkio. Ni ahnsou me nanmwarkio kilangada ih, e kapalahng nah sokono pohn Ester. Ester eri kohla reh, oh nanmwarkio idek reh: ‘Dahme I kak wiahiong uhk, Ester?’ Ester eri nda: ‘I men luke komwi oh Aman ong kamadipw ehu.’ Ni kamadipwo, Ester pil pwurehng luke ira ong keriaun kamadipw. Erein keriaun kamadipwo, nanmwarkio eri pwurehng idek rehn Ester: ‘Dahme I kak wiahiong uhk?’ Ester eri nda: ‘Mie me pahn kemehla ngehi oh nei aramas akan. Menlau doareikitala.’ Nanmwarkio eri idek: ‘Ihs me men kemeiukala?’ Ih eri nda: ‘Ohl suwed menet Aman.’ Ahasuerus uhdahn lingeringerda kahrehda e ruwese Aman en kamakamala ni ahnsowohte.

Ahpw sohte emen me kak kauhdi en Aman kosonnedo, nanmwarkio pil sohte kak. Nanmwarkio eri wiahiong Mordekai en uhd kaunda nein nanmwarkio lapalap kan oh kihong ih manaman en wiahda ehu kosonned kapw. Mordekai eri wiahda kosonned kapw ehu me mweidohng mehn Suhs kan ren pein pere irail ni ahnsou me re pahn kin lelohng uhwong kan. Eri ni kaeisek siluhn Adar, mehn Suhs kan kalowehdi arail imwintihti kan. Sang ahnsowo kohla, irail kin kasarawih arail kana nan mahwen wet ehuehu sounpar.