Dauliher sounpar 400 mwurin dihd en Serusalem eh pwurehng wiawihda, samworo men me adaneki Sekaraia oh eh pwoud Elisapet, kin mihmi limwahn kahnimwo. Ira pwopwoudkier sounpar tohto ahpw sohte neira seri. Ehu rahno ni Sekaraia eh wiewia meirong en warpwohmwahu nan tehnpas sarawio, tohnleng Kapriel pwarehng ih. Sekaraia masepwehkada, ahpw Kapriel nda: ‘Ke dehr masepwehk. I wahdohng uhk rongamwahu sang rehn Siohwa. Omw pwoudo Elisapet, pahn neitikiehdi pwutak emen oh e pahn adaneki Sohn. Siohwa ketin pilada Sohn ong doadoahk tohrohr ehu.’ Sekaraia eri idek: ‘Ia duwen ei kak kamehlele iuk? Ei pwoudo oh ngehi mahlahr, se sohte kak naineki seri.’ Kapriel eri nda: ‘I pekederdohsang rehn Koht pwehn padahkihong uhk rohng wet. Ahpw pwehki ke sohte kamehlele ie, ke sohte pahn kak lokaia lao lel mwurin serio eh pahn ipwidi.’

Sekaraia pwand en pedoisang nan tehnpaso. Eri ni eh pedoila, aramas ako me awiawih likio men ese dahme wiawi. Sekaraia sohte kak lokaia. Ihte me e kak wia kamwakid peh kan. Aramaso ako eri tehkada me Sekaraia alehdi rohng ehu sang rehn Koht.

Kedekedeo, Elisapet eri liseianda oh neitikiehdi kisin pwutak men, duwehte dahme tohnlengo ndao. Kompoakepah kan oh kiseh kan ahpw kohdo pwe ren kilang serio. Irail uhdahn perenkihda. Elisapet eri nda: ‘E pahn adaneki Sohn.’ Irail eri nda: ‘Sohte emen nan omw peneinei me adaneki Sohn. Kihong ede Sekaraia, eden eh pahpao.’ Ahpw Sekaraia ntingihedi nting pwukat: ‘E pahn adaneki Sohn.’ Ni ahnsowohte, Sekaraia kakehr pwurehng lokaia! Rohng me pid duwen serio ahpw kohpeseng nan Sudia pwon, oh aramas ako kin medemedewe: ‘Dahme kisin seri menet pahn keirda wia?’

Sekaraia eri direkihla sapwellimen Koht manaman. E kohpada: ‘Kitail kapinga Siohwa. E ketin inoukihong Eipraam me E pahn ketin kadarodo sounkomour men, iei Mesaia, pwehn kapitkitailla. Sohn pahn wia soukohp men, oh e pahn kaunopada ahl ong Mesaia.’

Mie pil ehu mehkot tohrohr me pil wiawihong Mery, emen kisehn Elisapet. Kitail pahn sukuhlki nan irelaud en mwurin met.

Mie kisehn Elisapet men me pwulopwul me adaneki Mery. E kin mihmi nan kahnimw en Nasaret nan Kalili. Mery inoun pwopwoud ong kapinte men me adaneki Sosep. Ni ahnsou me Elisapet liseianki sounpwong weneu, tohnleng Kapriel pwarehng Mery. E nda: ‘Rahn kaselel ong kowe Mery. Siohwa ketin kupwure iuk.’ E sohte wehwehki dahme Kapriel ndinda. Kapriel eri ndaiong ih: ‘Ke pahn liseianda oh neitikiehdi pwutak emen, oh ke pahn kihong ede Sises. E pahn wia Nanmwarki men. Eh Wehi pahn mihmi kohkohlahte.’

Ahpw Mery nda: ‘Ahpw I meipwon. Ia duwen ei kak naineki seri?’ Kapriel eri nda: ‘Sohte mehkot me sohte kak pweida rehn Siohwa. Sapwellime manaman pahn kohdiong pohmw, oh ke pahn nainekihda pwutak emen. Kisehmw Elisapet pil liseiandahr.’ Mery eri nda: ‘Ngehi sapwellimen Siohwa ladu serepein men. Dahme komw mahsanihier en pweida rehi.’

Mery eri kohla nan kahnimw ehu me mi pohn kumwukumw ko pwehn mwemweit rehn Elisapet. Ni ahnsou me Mery rahnmwahwih, Elisapet kehnda serio eh lus nan kapehdeo. Elisapet ahpw direkihla sapwellimen Siohwa manaman, oh nda: ‘Mery, Siohwa ketin kapaiukadahr. I uhdahn perenki nohno en ei Kaun eh mihmi nan imweiet.’ Mery eri nda: ‘I uhdahn kapingahki Siohwa nan ei mohngiong unsek.’ Mery eri mihmi rehn Elisapet erein sounpwong siluh, mwurin mwo e pwurala ni imweo Nasaret.

Ni ahnsou me Sosep esehda me Mery liseian, e sohla men pwoudiki. Ahpw tohnleng men pwarehng ih nan eh ouraman oh nda: ‘Ke dehr kahng pwoudikihda Mery. E sohte wiahda mehkot sapwung.’ Sosep ahpw pwoudikihda Mery oh wahla ih ni imweo.