Kaunen Wehin Rom, Sihsar Akustus, ruwese me mehn Suhs koaros en pwurala arail wasa kan pwe ren kileldi. Eri Sosep oh Mery kohla Pedleem, wasa me en Sosep peneinei kohsang ie. Ahnsowo Mery kereniongehr pahn neitik.

Ni ahnsou me ira lella Pedleem, ihte wasa me ira kak diar pwe ira en pweidi iei wasa me mahn akan kin mi ie. Ih wasao me Mery neitikiehdi nah pwutak Sises. E ahpw kidimkipene serio likou mwuterek oh kaunehdi nan dewen kamwenge mahn ehu.

Limwahn Pedleem, silepen sihpw kei mihmi likin ihmw oh apwahpwalih neirail pelin sihpw kan. Tohnleng men pa kesihnenda mwohrail oh marain en Siohwa ahpw kapilirailpene. Silepen sihpw ko masepwehkada, ahpw tohnlengo koasoia: ‘Kumwail dehr masepwehk. I wahdo rohng kaperen. Mesaia ipwidier rahnwet nan Pedleem.’ Ni ahnsowohte tohnleng tohto pa pwarada pahnlahng ndinda: ‘Kaping ong Koht nanleng oh popohl nin sampah.’ Tohnleng ko eri sohla mie. Ia duwen silepen sihpw ko ar mwekidki met?

Silepen sihpw ko eri ndapene nanpwungarail: ‘Kitail kohla Pedleem met.’ Irail eri mwadang kohkohla oh diarada Sosep oh Mery nan wasa me mahn ko kin mihmi ie iangahki neira seri pwelelo.

Koaros me rongada dahme tohnlengo ndaiong silepen sihpw ko pwuriamweila. Mery madamadau laudki duwen dahme tohnlengo koasoia oh e sohte manokehla. Silepen sihpw ko pwurala rehn neirail pelin sihpw ko, kalakalahngankihong Siohwa soahng koaros me re kilang oh rong.

Nan ehu sahpw palimese en Israel, aramas kan kin kamehlele me usu kan kak kaweid irail. Ehu pwohngo, ohl ekei sang Palimese kilangada mehkot me mwomwen usu lingan ehu mwekimwekid pahnlahng, oh irail eri idawehn. “Usuwo” kahluwairaillahng Serusalem. Ohl oko eri tepida idihdekseli rehn aramas ako: ‘Ia serio me pahn wia nanmwarki en mehn Suhs kan? Se kohdo pwe sen pwongih.’

Ni Erod, nanmwarki en Serusalem, eh rongada duwen nanmwarki kapw menet, e uhdahn pwunodkihda. E idek rehn kaunen samworo kan: ‘Ia wasa nanmwarki menet pahn ipwidi ie?’ Irail eri ndaiong ih: ‘Soukohp kan nda me e pahn ipwidi nan Pedleem.’ Erod eri ekerodo ohl oko sang Palimese oh ndaiong irail: ‘Kumwail kohla Pedleem oh rapahkihda serio. Kumwail pwurodo oh ndaiong ie ia wasa e mihmi ie, pwe I pil men iang pwongih.’ Ahpw met likamw pwoat.

“Usuwo” eri tepida pwurehng mwekid. Ohl oko idawehnla “usuwo” Pedleem. “Usuwo” uhdi kainene ihmw ehu oh ohl oko pedolongala. Irail diarada Sises rehn eh nohno Mery. Irail pwongih serio oh kihong kisakis en kohl, warpwohmwahu pwetepwet oh mir. Ia duwe, Siohwa uhdahn ketin kadarala ohl pwukat pwe ren diarada Sises? Soh.

Ni pwohngo, Siohwa mahsanihong Sosep nan ouraman ehu: ‘Erod men kemehla Sises. Wahda omw pwoud oh noumw pwutaken kohkohla Isip. Mihmi mwo lao I pahn padahkihong uhk ma e sohla keper en pwurala.’ Sosep oh eh peneinei mwadangete kohkohla Isip.

Siohwa mahsanihong ohl oko sang Palimese me irail en dehr pwurala rehn Erod. Ni Erod eh diarada me irail sohte pwurala reh, e uhdahn lingeringerda. Pwehki Erod sohte kak diarada Sises, e koasoanehdi me kisin pwutak koaros nan Pedleem me arail sounpar uwehte Sises ren kamakamala. Ahpw Sises sohte kamakamala pwehki e mi wasa doh nan Isip.

Mwurin ahnsoukis Erod mehla. Siohwa eri mahsanihong Sosep: ‘Met solahr keper ong kumwail en pwurala Israel.’ Sosep, Mery oh Sises pwurala Israel oh wiahda imwarail nan kahnimw en Nasaret.