Sosep, Mery, iangahki Sises oh neira pwutak oh serepein teikan kin koukousoan Nasaret. Sosep kin apwalih eh peneinei sang ni eh kin wia doadoahk en kapinte, oh e kin padahkihong irail duwen Siohwa oh sapwellime Kosonned kan. Peneineio kin kaukaule kohla nan sinakoke pwe ren wia arail kaudok oh re kin kohla Serusalem pwe ren iang Pahsohpa ehuehu pahr.

Ni Sises eh sounpar 12, eh peneinei wia seiloak reirei kohla Serusalem duwehte me re kin wia nan sounpar koaros. Kahnimwo direkihla aramas tohto me kohdo iang kasarawi Pahsohpa. Mwurin mwo, Sosep oh Mery tepida pwuralahng imwarailo oh ira medemedewe me Sises iang arail pwihn wie seiseiloak. Ahpw ni ara rapahki ih nanpwungen ara peneinei ko, ira sohte kak diarada ih.

Ira pwurala Serusalem oh rapahkiseli neira pwutako erein rahn siluh. Ira ahpw kohla nan tehnpas sarawio. Wasao, Sises mwomwohd nanpwungen sounpadahk kan, rongorong kanahieng oh idihdek peidek mwahu kan. Sounpadahk ko uhdahn pwuriamweikihla Sises kahrehda irail tepida idek reh peidek kan. Oh irail pil pwuriamweikihla eh pasapeng kan. Irail kak kilang me e wehwehki sapwellimen Siohwa Kosonned kan.

Sosep oh Mery uhdahn pwunodada. Mery eri nda: ‘Seri, se raparapahkin uhk wasa koaros! Ke mihmihte ia?’ Sises eri sapeng mahsanih: ‘Ke sohte ese me I uhdahn pahn mi wasaht nan tehnpas en Semei?’

Sises eri iangada eh pahpa nohno pwurala imwarailo Nasaret. Sosep padahkihong Sises ia duwen eh pahn wia doadoahk en kapinte men. Ke medewe soangen aramas dah Sises ni eh wia pwutak pwulopwul men? Ni Sises eh laudla, eh loalokong pil lalaudla oh e kin kaperenda Koht oh aramas.

Sohn, nein Sekaraia oh Elisapet pwutak, wiahla soukohp men ni eh laudla. Siohwa ketin doadoahngki Sohn pwehn padahkihong aramas akan me Mesaiao pahn kohdo. Ahpw e sohte kin padahk nan sinakoke kan de nan kahnimw kan. Sohn kin padahkseli nan sapwtehn kan. Aramas akan kin kohdohsang Serusalem oh wasa koaros nan Sudia pwehn sukuhlsang rehn Sohn. E padahkihong irail me en kaperenda Koht, irail anahne uhdihsang wia wiewia suwed kan. Mwurin arail rongorong Sohn, me tohto koluhkihla diparail kan, oh Sohn papidaisihirailla nan Pillap Sordan.

Sohn kin mourki mouren aramas me sohte kepwehpwe. E kin likawih likou me wiawihdahsang wunen kamel oh kin kang loukust oh sukehn loangalap en nanwel. Aramas akan kin men ese ihs Sohn. Pil Parisi oh Sadusi aklapalap akan kin kohdo pwe ren kilang ih. Sohn eri ndaiong irail: ‘Kumwail anahne wekidala amwail wiewia kan oh koluhla. Kumwail dehr medewe me kumwail wia aramas tohrohr kei pwehki amwail kin nda me kumwail seri en Eipraam kei. Met sohte wehwehki me kumwail seri en Koht kei.’

Me tohto kohdo rehn Sohn oh idek: ‘Dahme se anahne wia pwe sen kaperenda Koht?’ Sohn eri ndaiong mehn Suhs ako: ‘Ma mie ahmw sekid riau, a ke kihong ehu rehn emen me anahne.’ Ke ese dahme kahrehda Sohn ndahki met? E men nah tohnpadahk ko ren ese me en kaperenda Koht, irail anahne poakohng aramas akan.

Sohn ndaiong sounrik daksis ko: ‘Kumwail en kin mehlel oh dehr kin pitih aramas sohte lipilipil.’ E ndahiong sounpei ko: ‘Dehr perenki adihasang nein emen nah mwohni de lokaia likamw.’

Samworo kei oh mehn Lipai kei pil kohdo rehn Sohn oh idek reh: ‘Ihs kowe? Aramas koaros men ese.’ Sohn eri sapeng: ‘Ngehi ngihl ehu me likilikwerseli nan sapwtehn, kakahluwahlahng aramas akan rehn Siohwa, duwehte me Aiseia kohpadahro.’

Aramas akan kin pwungki dahme Sohn kin padapadahkihong irail. Me tohto kin medewe ma Sohn iei me Mesaiao. Ahpw e ndaiong irail: ‘Emen me uhdahn lapalapsang ie kohkohdo. I sohte warohng en lapwahda selin eh suht kan. I kin papidaiski pihl, ahpw ih e pahn papidaiski sapwellimen Koht manaman.’