Sohn padahngkiher: ‘Emen me lapalapasang ie kohkohdo.’ Ni Sises eh kereniong sounpar 30, e kohdohsang Kalili kodohng Pillap Sordan, wasa me Sohn kin papidaisihala aramas akan. Sises kupwurki Sohn en papidaisihala, ahpw Sohn nda: ‘I sohte warohng papidaisih komwi. Komwi me kak papidaisih ie.’ Sises ahpw mahsanihong Sohn: ‘Siohwa kupwurki ken papidaisih ie.’ Ira eri kohdihla ni Pillap Sordan, oh Sohn eri kaduhdi paliweren Siseso pwon nan pihlo.

Mwurin Sises eh ketidahsang nan pihlo, e ketin kapakap. Ni ahnsowohte, nanleng pa ritpeseng, oh sapwellimen Koht manaman kohdiong pohn Sises ni mwomwen mwuroi men. Siohwa eri ketin mahsendihdo sang nanleng, mahsanih: “Kowe me iei nei pwutak kompoake, me I kin kupwurperenki.”

Ni ahnsou me sapwellimen Siohwa manaman kohdiong pohn Sises, e wiahla Krais de Mesaia. Met e pahn tapihadahr doadoahk me Siohwa ketin kadarkidohng ih pohn sampah pwehn wia.

Ni ahnsowohte mwurin eh papidaisla, Sises ketila nan sapwtehno oh mihmihki mwo rahn 40. Ni ahnsou me e pwurodo, e kohla tuhwong Sohn. Ni Sises eh kerendohng ih, Sohn nda: ‘Iet Sihmpwul en Kohto me pahn ketikihsang dipen sampah.’ Ni eh ndinda met, Sohn padahkihong aramas akan me Sises iei me Mesaiao. Ke ese dahme wiawihong Sises ni eh mihmi nan sapwtehno? Kitail pahn kilang.

Mwurin Sises eh ketin papidaisla, sapwellimen Koht manaman kahluwalahng ih nan sapwtehno. E sohte tungoale mehkot ong rahn 40, oh e uhdahn men mwengehda. Tepilo eri kohdo pwehn kasonge Sises oh ndaiong ih: ‘Ma mehlel kowe nein Koht Ohl, a ke ndaiong takai pwukat ren wiahla lopwon en pilawa.’ Sises ahpw sapeng ni eh doadoahngki iren Paipel kan oh mahsanih: ‘E ntingdier me kaidehkin mwengehte me ke kak mourki. Ke anahne rong mahsen koaros me Siohwa mahsanih.’

Mwuri, Tepilo pil kasonge Sises oh nda: ‘Ma mehlel kowe nein Koht Ohl, a ke lusdihsang pohn koadoken tehnpaso. Pwe e ntingdier me Koht pahn kadarodo nah tohnleng kan pwe ren daperuhkedi.’ Ahpw Sises pil ketin pwurehng doadoahngki iren Paipel oh mahsanih: ‘E ntingdier me ke sohte pahn kasongosonge Siohwa.’

Sehdan eri kasalehiong Sises wehin sampah koaros, uwen arail kepwehpwe oh lingan oh nda: ‘I pahn kihong uhk wehi pwukat koaros oh ar lingan ma ke pahn pwongih ie pak ehute.’ Ahpw Sises ketin sapeng, mahsanih: ‘Kohkohla, Sehdan! E ntingdier me Siohwa kelehpw me ke pahn pwongih.’

Tepilo eri kohkohla, oh tohnleng kei ahpw kohdo oh kihong Sises mwenge pwehn tungoale. Sang ahnsowo kohla, Sises kin ketin kalokalohki rongamwahu en Wehio. Ih doadoahk wet me e ketidihdohki sampah pwehn ketin wia. Aramas akan kin uhdahn perenki dahme Sises kin ketin padahkihong irail, oh irail kin idawehnseli ih wasa koaros me e kin ketila ie.