Mwurinte Sises eh ketin papidaisla, e tapiada kalohkiseli me: ‘Wehin Koht kerendohr.’ Tohnpadahk ko kin idawehnseli ih ni eh kin ketin seiloakseli nan Kalili oh Sudia. Ni ahnsou me Sises ketin pwuralahng nan eh wasahn kousoano Nasaret, e ketila nan sinakokeo, pahkpeseng pwuhken Aiseia oh ketin wadek ni ngihl laud, mahsanih: ‘Siohwa ketikihongieier sapwellime manaman pwe ien kak kalohki rongamwahwo.’ Ia wehwehn met? Met wehwehki me mendahki aramas akan kin men kilang Sises eh kin ketin wiahda manaman kan, ahpw uhdahn kahrepeo me e ketin alehkihdi sapwellimen Koht manaman iei pwehn ketin kalohki rongamwahwo. Ih eri mahsanihong irail me rongorong ko: ‘Kokohp wet pweidahr rahnwet.’

Mwurin mwo, Sises ketila ni Sehden Kalili, wasa me e ketin tuhwong sapwellime tohnpadahk pahmeno me wia sounlaid kei. E ketin luke irail, mahsanih: ‘Kumwail kohdo oh iangiehla, oh I pahn wiahkinkumwailla sounlaidih aramas.’ Ohl pwukat iei Piter, Andru, Seims, oh Sohn. Ni ahnsowohte irail pwilikihdi arail doadoahk en laid oh idawehnla Sises. Irail eri kohseli nan Kalili pwon kalokalohkiseli Wehin Siohwa. Irail kin kalohk nan sinakoke kan, wasahn netinet kan, oh nanial akan. Aramas tohto kin idawehnirailseli wasa koaros me re kin kohla ie. Rongen Sises kohpeseng wasa koaros, pil lella Siria.

Kedekedeo, Sises ketikihong ekei sapwellime tohnpadahk ko manaman en kamwahwihala en aramas akan soumwahu oh kausasang ngehn suwed kan rehn aramas. Meteikan kin iang ih ni eh kin ketin kalohkseli nan kahnimw kan oh kisin kousapw kan. Ekei lih lelepek kan, iangahki Mery Makdala, Sohanna, Susanna, oh meteikan, kin apwalih Sises oh sapwellime tohnpadahk kan.

Mwurin Sises eh ketin kaiahne sapwellime tohnpadahk kan, e ketin kadarirailpeseng pwehn kalohk. Ni ar seiloakseli nan Kalili pwon, me tohto wiahla tohnpadahk kei oh papidaisla. Me tohto men wiahla tohnpadahk, kahrehda Sises ketin karasahiong irail duwehte mwaht ehu me mwahuer en dondol. E mahsanih: ‘Kapakap oh peki rehn Siohwa en ketin kadarodo ekei tohndoadoahk pwehn iang doadoahk ni ahnsoun rahk.’ Mwuri, e ketin pilada meh 70 sang sapwellime tohnpadahk ko oh ketin kadarirailpeseng wad riemen pwehn kalohkseli nan Sudia pwon. Irail padahkihong soangsoangen aramas akan duwen Wehio. Ni ahnsou me tohnpadahk ko pwurodo, irail ngoangki padahkihong Sises dahme wiawi. Sohte mehkot me Tepilo kak wia pwehn kauhdi doadoahk en kalohk.

Sises ketin koasoanehdi mwahu me sapwellime tohnpadahk ko pahn pousehlahte wiewia doadoahk kesempwal wet mwurin eh pahn ketin pwuradahlahng nanleng. E mahsanihong irail: ‘Kumwail kalohkiseli rongamwahwo nan sampah pwon. Padahkihong aramas akan Mahsen en Koht, oh papidaisihirailla.’

Sises ketidihdo nin sampah pwehn kalohki rongamwahu en Wehin Koht. Pwehn kasalehda dahme e pahn ketin wia nin duwen Nanmwarki men, Siohwa ketikihong ih sapwellime manaman en wiahda manaman kan. Sises kak ketin kamwahwihala soumwahu koaros. Wasa koaros me e kin ketila ie, aramas soumwahu kan kin kohdo ale sawas reh, oh e kin ketin kamwahwihirailla koaros. Me maskun kan kakehr kilangada wasa, me salengepon kan kakehr rong, me mwoator akan kakehr alu, oh irail me ngehn suwed kan kin kamwakid saledeklahr. Ma irail pil doahkehte imwin eh likou, re kin mwahula. Aramas akan kin idawehn Sises wasa koaros me e kin ketila ie. Pil ni ahnsou me Sises kin kupwurki kelekelehpw, e sohte kin soikala emen me kin kohla reh.

Ehu rahno, aramas ako wahdo ohl emen me mwoator nan ihmw me Sises ketiket ie. Ahpw dir aramas nan ihmwo kahrehda irail sohte kak pedolongala. Irail eri wiahda pwoar ehu pohn ihmwo oh kadaridi ohlo rehn Sises. Sises eri mahsanihong ohlo: ‘Pwourda oh alu.’ Ni ahnsou me ohlo alu, aramas ako pwuriamweikihla.

Pil ehu ahnsowo, ni Sises eh ketila nan kisin kahnimw kis, ohl tokutok ehk ahpw kesihnenda palio oh likwerkilahng: ‘Sises, komw sewesei kiht!’ Nan ahnsou pwuko, aramas tokutok kan sohte mweimwei en kohdo karanih aramas teikan. Sises eri mahsanihong irail ren kohla ni tehnpas sarawio, nin duwen me sapwellimen Siohwa Kosonned mahsanih me irail me tokutok kan anahne wia mwurin arail mwahula. Ni ar kohkohlahng ni tehnpas sarawio, irail mwahula sang arail soumwahwo. Ni ahnsou me emen me tokutok ko kilangada me e mwahulahr, e pwurala pwehn kalahngankihong Sises oh kapinga Koht. Nanpwungen meh ehk ko, ohl menet kelehpw me kasalehda eh kalahngan ong Sises.

Lih emen me kin sosoumwahuki sounpar 12 uhdahn men mwahula sang eh soumwahu. E duwaldahdo nanpwungen pokon ehu oh keido limwahn Sises oh doahke imwin eh likowo. Ni ahnsowohte liho pa mwahula. Ni ahnsou me met wiawi, Sises mahsanih: “Ihs me doahke ie?” Liho masepwehkada, ahpw e kohdo mwowe oh ndaiong Sises dahme mehlel. Sises ketin kansenamwahwihala ni eh mahsanih: ‘Nei serepein, kohkohwei ni popohl.’

Opiser men me adaneki Sairus peki rehn Sises: ‘Kohdo ni imweo! Nei kisin serepeino uhdahn soumwahu.’ Ahpw mwohn Sises eh ketin lella ni imwen Sairuso, kisin serepeino melahr. Ni ahnsou me Sises ketin lella mwo, e mahsanihada me aramas tohto iangih peneineio wie sengiseng. Sises eri mahsanihong irail: ‘Kumwail dehr sengiseng; e wie memeir.’ Ih eri ketin kolada pehn serepeino oh mahsanih: “Serepein, pwourda!” Ni ahnsowohte serepeino pa pwourda, oh Sises mahsanihong en serepeino pahpa nohno ren kamwenge serepeino. Nna song medewehla en serepeino pahpa nohno ara pepehm!