Mwurin Sises eh ketin kalokalohkseli erein sounpar ehu elep, e anahne wiahda pilipil kesempwal ehu. Ihs me e pahn ketin pilada pwehn iang ih doadoahk ahnsou koaros? Ihs me e pahn ketin kaiahnehda pwehn apwalih mwomwohdisohn Kristian? Pwehn wiahda pilipil pwukat, Sises kupwurki ale sapwellimen Siohwa kaweid. Eri e ketidahla ni nahna ehu wasa me e kak kelehpwla ie, oh pwohngo pwon e wie kapakap. Mandahn rahno, Sises ketin ekerpene ekei sapwellime tohnpadahk ko oh pilada sapwellime wahnpoaron 12. Eden ihs rehn wahnpoaron pwukat me ke tamataman? Adarail kan iei Piter, Andru, Seims, Sohn, Pilip, Pardolomiu, Tomas, Madiu, Seims nein Alpius, Dadeus, Saimon, oh Sudas Iskariot.

Meh ehk riemeno pahn kin iangih seiloakseli. Mwurin eh ketin kaiahneirailda, irail pekederpeseng pwehn pein kohla kalohk. Siohwa ketikihong irail manaman en kausasang ngehn suwed kan rehn aramas oh kamwahwihala aramas soumwahu kan.

Sises kin ketin ekerki meh Ehk Riemeno kompoakepah, oh e kin ketin likih irail. Parisi ko medewe me wahnpoaron ko sohte wad oh sohte iang sukuhl. Ahpw Sises ketin kaiahneirailda nan arail doadoahk. Irail pahn kin ieiang Sises nan ahnsou kesempwal kan nan eh mour, me duwehte mwohn eh ketin pwoula oh mwurin eh ketin iasada. Duwehte Sises, pali laud en meh Ehk Riemen ko mehn Kalili. Ekei irail pwopwoud.

Wahnpoaron ko wia ohl soh unsek kei me pil kin sapwungala. Ekei pak irail kin koasoi mwohn ar kin medewe oh wiahda pilipil sapwung kan. Ekei pak irail kin sohla kak kanengamah. Irail pil kin akamaiki ihs me keieu kesempwal. Ahpw irail aramas mwahu kei me kin poakohng Siohwa. Irail me pahn wia poahsoanpen mwomwohdisohn Kristian mwurin Sises eh pahn ketin kohkohlahsang irail.

Mwurin eh ketin pilada wahnpoaron 12 ko, Sises ketidihdo sang pohn dohlo oh lella wasa ehu me pokon laud ehu kohpene ie. Irail kohsang Kalili, Sudia, Dair, Saidon, Siria, oh palio Sordan. Irail wapene aramas akan me kin lokolongki soumwahu oh irail kan me ngehn suwed kan kin lidere irail. Sises ketin kamwahwihala irail koaros. Ih eri ketidiong ni keilen dohlo oh tepida padapadahk. E ketin kawehwehda dahme kitail anahne wia ma kitail men wia kompoakepahn Koht. Kitail anahne pein kasawihada me kitail anahne Siohwa oh esehla poakohng ih. Ahpw kitail sohte kak poakohng Koht ma kitail sohte poakepoake aramas teikan. Kitail anahne kadekohng oh toupahrek ong aramas koaros, pil atail imwintihti kan.

Sises mahsanih: ‘E sohte itar en poakohngete kompoakepahmw kan. Ke pil anahne poakohng omw imwintihti kan oh mahkohng aramas sang nan omw mohngiong. Ma mie me nsensuwed pahmw, kohla reh ni ahnsowohte oh peki mahk. Wiahiong meteikan dahme ke men ren wiahiong uhk.’

Sises pil ketikihong aramas ako kaweid mwahu duwen ahneki kepwe kan. E mahsanih: ‘En wia kompoakepahn Siohwa kesempwalsang en naineki mwohni tohto. Lipirap men kak pirapahsang noumw mwohni, ahpw sohte me kak pirapahsang omw nanpwungmwahu rehn Siohwa. Dehr pwunodki dahme ke pahn kang, nim, de likawih. Tehk kisin menpihr kan. Koht kin ketin ahnsou koaros ketikihong irail kenerail mwenge me itar. En pwunopwunod sohte pahn kahrehiong uhk en mour werei. Tamataman, Siohwa mwahngih dahme ke anahne.’

Saikinte pak ehu aramas ako rong emen me wia soangen mahsen ko me Sises mahsanih. Arail kaunen pelien lamalam akan sohte kin padahkihong irail soahng pwukat. Dahme kahrehda Sises ketin wia sounpadahk me keieu mwahu? Pwehki soahng koaros me e kin ketin padahngki kin kohsang rehn Siohwa.