Me Mah kan—Kumwail Kesempwal ong Mwomwohdiso

Mwein ke pil sohla kak wia soahng tohto duwehte me ke kin wia ni omw pwulopwul. Mendahki ke ese me ke kin papah Siohwa ni lelepek erein sounpar tohto, ni omw kin kapahrekiong dahme ke kin wia ong Siohwa mahso ong ni ahnsou wet, mwein ke kakete mworuskihla. Ma ih duwen met, dahme kak seweseiuk en ahneki peren?

DAHME SIOHWA KETIN KUPWURKI KEN WIA

Pein idek rehmw, ‘Dahme Siohwa ketin kupwurki ien wia?’ Ke kak diar mahsen kansenamwahu kan nan Deuderonomi 6:​5, (NW) me mahsanih: “Ke anahne poakohng Siohwa omw Koht ni omw mohngiong unsek oh omw mour unsek oh omw kehl unsek.”

Iretikitik wet kasalehda me Siohwa ketin kupwurki ken papah ih ni uwen omw kak koaros me pahn pwungiong omw irairo. Met kak seweseiuk en dehr kapahrekihpene dahme ke kin wia ong dahme meteikan kin wia, de dahme ke kin wia ni omw pwulopwulo.

Ele ni omw pwulopwulo, ke kin patohwanohng Siohwa uwen omw kak koaros me pwungiong omw irair en ahnsowo. Ahpw met pwehki omw irairo wekila, ele ke kin wiahte uwen omw kak me pwungiong omw irair en ahnsou wet. Ma ke kin ahneki soangen madamadau wet, ke pahn kilang me ke kin patohwanohngete Siohwa duwehte me ke kin wia mahso. Ke kin patohwanohng ih uwen omw kak mahso oh ke kin patohwanohng ih uwen omw kak ni ahnsou wet.

DAHME KE ESEHLA NAN MOUR KAK SEWESE METEIKAN

Iet pil ehu mehkot me ke kak wia: Dehr medemedewehte soahng kan me ke solahr kak wia, ahpw medewe soahng kan me ke kak wia pwehn sewese meteikan ni omw mahla. Ahpw met pwehki ke mahla, ke pil kak wia soahng kei me ke sohte kak wia ni omw pwulopwulo. Karasepe, ke kak wia soahng pwukat:

Ehukihong meteikan dahme ke esehla nan mour. Medewe dahme Paipel mahsanih nan iretikitik pwukat:

Nanmwarki Depit: “Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.”—Mel. 37:25.

Sosua: “Eri, met ahnsoun ei mehla leledohr. Emenemen kumwail patohwan ese nan mohngiongimwail oh ngenomwail me KAUN-O amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.”—Sos. 23:14.

Mwein ke pil ndahier soahng pwukat ni omw pwulopwul pwehn kangoange meteikan. Ahpw pwehki Depit oh Sosua lelohngehr soahng pwukat pak tohto nan erein sounpar tohto, dahme ira koasoia ko uhdahn kangoang laud.

Ma ke kin papah Siohwa erein sounpar tohto, ke pil kak koasoia soahng kan me ke kilangehr Siohwa ketin wiahiong uhk de ong meteikan. Ke tamanda ahnsou me ke kilang Siohwa ketin kapaia sapwellime aramas akan? Ma ei, ehukihong meteikan duwen met. Met kak kansenamwahwih irail. Ke kak kangoange laud riomw Kristian kan ni omw ehukihong irail soahng kan me ke esehla nan mour.—Rom 1:​11, 12.

Ke pil kak kangoange meteikan sang ni omw iang towehda mihting nan Wasahn Kaudok ni uwen me ke kak. Ni omw wia met, ke kak kangoange irail oh irail pil kak kangoange iuk. Connie, me kitail koasoiapene mwoweo, koasoia: “Ni ei kin iang towehda mihting kan, met kin sewese ien dehr mworusala. Ia duwen ei pahn mworusala ni ei kin alehdi limpoak sang riei Kristian kan nan Wasahn Kaudok? I kin nantihong kasalehda ei kalahngan ong meteikan sang ni ei kin kihong irail kisin kisakis kan. I kin nantihong pousehlahte iang riei Kristian kan nan doadoahk en papah Siohwa.”

SIOHWA KETIN KESEMPWALKI OMW KIN LELEPEK ONG IH

Mie mehn kahlemeng en aramas tohto nan Paipel me Siohwa ketin poakohng mendahki re solahr kak wia soahng kan me re kin wia mahso. Medewehla Simion, ohl mah en Israel men me momour ni ahnsou me Sises ketin ipwidi. Ni ahnsou me Simion mwemweitla ni tehnpas sarawio, ele e kilang mwahnakapw kan ar wiewia doadoahk kesempwal kan nan tehnpas sarawio. Ahpw ia duwen Simion? Mwein ele Simion medewe me e sohla katapan ong Siohwa pwehki e sohla kak papah Siohwa duwehte me pwulopwul ko. Ahpw Siohwa sohte ketin medewe met. Ong Siohwa, Simion wia ohl “pwung oh poadidi” men, oh e ketikihong pai kaselel en kilang seri pwelelo Sises. Siohwa pil ketin doadoahngki Simion en kohpada me Sises pahn wia Mesaia ni ahnsou kohkohdo. (Luk 2:​25-35) Siohwa sohte ketin kilangwohngete en Simion kehlail. Ahpw Siohwa ketin kilangwohngete Simion nin duwen aramas emen me ahneki pwoson kehlail oh “sapwellimen Koht manaman kin kaukaweid ih.”

Ke pil kak kamehlele me Siohwa uhdahn ketin kesempwalki omw kin lelepek papah ih mendahki omw sou itar akan. Ong Siohwa, meirong ehu “me pahn keieu konehng iei emenemen en kin kihwei nin duwen dahme e ahneki, a kaidehn dahme e sohte ahneki.”—2 Kor. 8:12.

Eri, medemedewehte soahng kan me ke kak wia. Karasepe, medewe soangen wiepen kalohk kan me ke kak wia, mehnda ma ong ahnsoutehkis. Oh pil, ke kak kangoange riomw Kristian kan ni omw call irail de ntinglahng irail. Soangen wiewiahn limpoak pwukat uhdahn kak kangoange riomw Kristian kan, ahpw mehlel ma met kohsang emen me kin papah Siohwa erein sounpar tohto duwehte kowe.

Ekei kin ahneki kahpwal en paliwar. Tehk dahme wiawihong emen sang Palimesehn Aperika nan koakon me koasoia “E Doarehla Eh Mour.”

Tamataman me omw kahlemeng en lelepek oh loalopwoat erein sounpar tohto kak uhdahn kangoange meteikan. Ke wia mehn kahlemeng mwahu en kin dadaurete oh ke kak kamehlele me ‘Koht me pwung oh e sohte pahn ketin meliehla omw doadoahk oh duwen omw kin poakohng mware sang ni omw kin papah aramas sarawi kan leledo ahnsou wet.’—Ipru 6:10.

SOUPISENGKI SEWESE METEIKAN

Roporop kasalehda me ohl oh lih mah tohto me kin sewese meteikan kin ahneki roson mwahu, arail madamadau kin mwahute, oh re kin kak mour werei.

Ei mehlel, wiewia mwahu kan sohte pahn kihsang kahpwal koaros me kohsang mahmahla. Wehin Koht kelehpw me pahn kapwaiada met ni eh pahn kihsang dahme kin kahrehda mahla oh mehla, me iei dihp me kitail sohsohki sang Adam.—Rom 5:12.

Ahpw, ni omw kin wia dahme Siohwa ketin kupwurki ken wia, me duwehte en sewese meteikan en esehla ih, met kin kakehlaka omw koapworopwor oh pil kak mwahu ong omw roson. Me mah kan, kumwail en ese me Siohwa kin uhdahn ketin kesempwalki amwail kin papah ih oh me mwomwohdiso kin kesempwalki amwail mehn kahlemeng en pwoson.