Números
27 Chantá Zelofehadpa warmi wawasnin+ qayllaykamorqanku. Sutisninkoqa karqa Mahlá, Noá, Hoglá, Milcá, Tirzá ima. Zelofehadqa Heferpa wawan karqa, Manasesmanta miraj familiasmanta. Hefertaj Galaadpa wawan karqa, Galaadtaj Makirpa wawan karqa, Makirtaj Manasespa wawan karqa, Manasestaj Josejpa wawan karqa. 2 Ajinata Zelofehadpa warmi wawasnenqa qayllaykorqanku Moisesman, sacerdote Eleazarman, kurajkunaman,+ tukuy israelitasmanwan Dioswan tinkukuna toldo punkupi, nerqankutaj: 3 “Tataykoqa chʼin jallpʼapi wañuporqa. Chaywanpis mana Coré parte kajkunawan+ khuskachu karqa Jehová Diospa contranpi oqharikushajtinku. Payqa kikin juchanrayku wañuporqa, nitaj qhari wawasnin kaporqachu. 4 ¿Imaraykutaj tataykoj sutin chinkachisqa kanman familian ukhumanta mana qhari wawan kasqanraykullari? Noqaykumanpis jallpʼata qowayku ari, tataykoj hermanosnin ukhupi”, nispa. 5 Moisestaj chay warmispa mañakusqankuta Jehová Diosman willarqa.+
6 Jehová Diostaj Moisesman nerqa: 7 “Zelofehadpa warmi wawasnenqa cheqallanta parlashanku. Paykunaman jallpʼata qollay, ajinamanta tatankoj hermanosnin ukhupi herencianku kananpaj. Tatanku japʼinan karqa chay jallpʼata paykunaman qoy herenciankupaj.+ 8 Chantapis israelitasman niy: ‘Sichus uj runa mana qhari wawasniyoj wañupun chayqa, paypa herenciantaqa pasachinkichej warmi wawasninman. 9 Sichus warmi wawasninpis mana kanchu chayqa, herenciantaqa hermanosninman qopunkichej. 10 Sichus hermanosninpis mana kanchu chayqa, herenciantaqa tatanpa hermanosninman qopunkichej. 11 Sichus tatanpa hermanosninpis manallataj kanchu chayqa, herenciantaqa qopunkichej familianmanta aswan qaylla parientenman, paytaj chay herenciata japʼikaponqa. Kay kamachisqaqa uj ley kanqa israelitaspaj, Jehová Dios Moisesman kamachisqanman jina’, nispa”.
12 Chantá Jehová Diosqa Moisesta nillarqataj: “Wichariy Abarim orqoman,+ chaymanta rikunki israelitasman qosaj chay jallpʼata.+ 13 Chayta rikuytawan, qanpis hermanoyki Aarón jina wañupunki.+ 14 Israelitas Zin nisqa chʼin jallpʼapi noqawan siminakushajtinku, qankunaqa mana kamachisqayta kasuwarqankichejchu, nitaj israelitaspa ñaupaqenkupi jatunchawarqankichejchu, maypachachus yakuta phullchichimorqani chaypacha.+ Chayqa kashan Cadespi+ Meribá yakus,+ Zin nisqa chʼin jallpʼapi”,+ nispa.
15 Chantá Moisesqa Jehová Diosman nerqa: 16 “Jehová Diosníy, tukuy runasman kausayta qoj Dios, uj runata churay ari, israelitasmanta cuentayoj kananpaj. 17 Pay kamachejninku kanqa tukuy imapi, paykunata pusanqataj pusamonqataj. Ajinamanta Jehová Diosníy, israelita wawasniyki ama mana michejniyoj ovejas jina kanankupaj”, nispa. 18 Jehová Diostaj Moisesman nerqa: “Nunpa wawan Josueta pusamuy. Payqa kamachinanpaj wakichisqaña. Paypa umanman makiykita churay.+ 19 Chantá sayaykuchiy sacerdote Eleazarpa ñaupaqenman, tukuynin israelitaspa ñaupaqenkumanwan. Paykuna rikushajtinku kamachej kananpaj churay.+ 20 Payman autoridadniykimanta* uj chhikanta qoy.+ Ajinamanta tukuynin israelitas payta uyarinankupaj.+ 21 Josueqa renqa sacerdote Eleazarman, paytaj Urimta*+ orqhospa Jehová Diosta tapuponqa, ajinamanta imatachus Dios nisqanta yachananpaj. Josuewan tukuy israelitaswanqa paypa kamachisqanta ruwanqanku”, nispa.
22 Chantá Moisesqa Jehová Dios kamachisqanman jina ruwarqa. Josueta pusarqa sacerdote Eleazarpa ñaupaqenman, tukuy israelitaspa ñaupaqenkumanwan. 23 Chaypitaj makisninta umanman churaspa kamachej kananpaj churarqa,+ Jehová Dios Moisesman nisqanman jina.+