Job
8 Súah+ nisqa jallpʼamanta Bildadtaj+ kayta nerqa:
2 “¿Maykʼajkamataj kay jinata parlankiri?+
Parlasqaykeqa sinchʼi wayra jinallaqa.
3 ¿Diosqa qʼewenqachu justiciataqa?
¿Tukuy Atiyniyoj Diosqa qʼewenqachu cheqan kajtaqa?
4 Wawasniykeqa Diospa contrantachá juchallikorqanku,
chaypuni Diosqa paykunata castigarqa contranta oqharikusqankumanta.
5 Sichus Diosta maskʼawaj,+
Tukuy Atiyniyoj Diosmantaj qhaparikuwaj,
6 sitajchus llimphu sonqoyoj kawaj, cheqan runataj+ kawaj chayqa,
Diosqa allin ñawiwan qhawarimusunkiman,
imaynachus ñaupajta karqanki ajinaman kutichisunkiman.
7 Kunan kay jina llakiypi kashanki chaypis,
qhepamanqa allinpuni risunkiman.+
8 Ñaupa tatasta tapuriy ari,
paykunaj tatasninku imatachus yachasqankutapis reparay ari.+
9 Noqanchejqa mana imatapis yachanchejchu qaynallapis nacekusunman jinalla kanchej,
kay jallpʼapi kausayninchejqa llanthu jinalla pasapun.
10 ¿Nichu ñaupa tatasqa yachachisunkuman?
¿Nichu yachasqankutapis willarisunkuman?
11 ¿Papiro nisqa totoraqa jatuntachu wiñan mana qochapi kaspaqa?
¿Caña huecapis jatuntachu wiñan mana yakuyojqa?
12 Mana yaku kajtenqa tʼikanankupajña kashajtinkupis, mana tʼirasqalla chʼakipunku,
waj plantasmantapis aswan usqhayta chʼakipunku.
13 Ajinaman chayanqanku Diosta qonqajkunaqa.
Sajra runaspa* ima suyakusqankupis ni jaykʼaj juntʼakonqachu.
14 Payqa imaschus kapun chaykunallapi atienekun.
Chay kapuynintaj kusi kusej llikhan* jinalla, mana unaypajchu kanqa.
15 Chay sajra runaqa kusi kusej llikhanman* atiykukonqa, chay llikhataj llikʼirparikonqa.
Chay kusi kusej llikhanmanta japʼiykukuyta munanqa, chay llikhataj mana aguantanqachu.
16 Sajra runaqa inti rupharimushajtin qarpasqa planta jina,
wiñaspataj huertaman juntʼaykun.+
17 Qotu rumispi saphichakun,
chay qotu rumistataj wasinpaj qhawan.
18 Chay lugarmanta tʼirasqa kajtintaj,
chay lugarqa payta neganqa: ‘Mana rejsiykichu’, nispa.+
19 Ajinapi chinkasqata chinkanqa,+
chaypitaj waj plantasñataj wiñanqanku.
20 Diosqa mana juchayoj runastaqa manapuni saqerparenqachu,
sajra runastataj mana yanapanqachu.
21 Diosqa ujtawan asirichisonqa,
watejmanta kusiywan qhaparirinki.
22 Chejnisojkunaqa pʼenqaypi rikhurenqanku.
Sajra runaspa toldo wasinkoqa* niña kanqachu”.