Proverbios
27 Ama alabakuychu qʼaya imatachus ruwanaykimanta.
Qanqa mana yachankichu imachus qʼaya día kananta.+
2 Waj runa alabasuchun, ama qan alabakuychu.
Wajkuna alabasuchunku, ama simiyki alabasuchunchu.+
3 Rumeqa llasa, tʼiyupis llasallataj,
mana yuyayniyoj runaj rabiachikusqantaj chay imasmanta nisqaqa aswan mana aguantay atina.+
4 Rabiakoyqa mana khuyakuyniyoj, phiñakuypis pʼampaj yakus jina.
Celostataj* ni pi ñitʼiykukuyta atinchu.+
5 Aswan allin sutʼinta kʼameyqa, munakuyniyoj kashaspa ni imata ninamantaqa.+
7 Sajsasqa kajqa mana munanchu panalmanta abeja miskʼita.
Yarqhasqapajtaj millay jaya mikhunapis miskʼi.
8 Imaynatachus uj pʼisqo thapanmanta karunchakun,
ajinallataj wasinpi mana sayaj runapis.
9 Aceitewan inciensowanqa sonqota kusirichin,
ajinallataj uj amigopis maychus kajta yuyaychasojtenqa.+
10 Ama amigoykita saqerpaychu, ni tataykej amigontapis.
Llakiypi kashaspaqa ama hermanoykej wasinman riychu.
Karupi tiyakoj hermanoykimanta nisqaqa, aswan allinraj qayllaykipi tiyakoj runa masiyki.+
11 Yachayniyoj kay wawáy, sonqoytataj kusichiy,+
ajinamanta kutichiyta atisaj pichus noqamanta manakajta parlashan chayman.*+
12 Allin yuyayniyoj runaqa sajra kajta rikuspa pakakun.+
Manaraj allinta yachaj runarí cheqanta chayman thaskiykun, chantaqa ñakʼarin.
13 Sichus uj runa mana rejsisqa runapaj garanten sayapun chayqa, ropanta qhechuy.
Mana rejsisqa warmirayku* chayta ruwan chayqa, uj prendata qochikuy.+
14 Sichus pipis tutamanta runa masinta jatunmanta napaykun* chayqa,
runa masenqa chayta qhawanqa uj maldicionta jina.
15 Casada warmi simisapa* kajtenqa rijchʼakun juskʼu techoman, parajtin mana sayayta sutʼumoj* techoman.+
16 Pichus chay warmita aguantajqa wayratapis jarkʼayta atinman,
aceitetapis paña makinpi japʼiyta atinman.
17 Imaynatachus fierroqa fierrollawantaj afilakun,*
ajinallatataj runapis amigonta aswan allin runaman tukuchin.+
18 Higo sachʼata cuidajqa poqoyninta mikhonqa.+
Patronninta allinta atiendejtaj allinpaj qhawasqa kanqa.+
19 Imaynatachus runaqa yakupi uyanta rikukuyta atin,
ajinallatataj wajta qhawarispa reparakuyta atinman imayna runachus kasqanta.
20 Sepulturapis* wañusqas ismushanku chay lugarpis* mana ni jaykʼaj sajsayta atinkuchu,+
ajinallataj runaj ñawisninpis mana contentakunchu.
21 Imaynatachus qolqe metalta pʼuku platopi unuyachispa chʼuwachakun, qoritapis hornopi chʼuwachakun,+
ajinallatataj uj runata alabajtinku sutʼi yachakun imayna runachus kasqan.
22 Trigotaqa takaspa takaspa ñutʼunchej,
ajinata wampu runata morqʼo rumiwan takajtinchejpis
wampu kaynintaqa mana qonqanqachu.
23 Tropa ovejasniykita allinta rejsinayki tiyan.
Ovejasniykita allinta cuiday.*+
24 Qhapaj imasqa manamin wiñaypajchu,+
reypa coronanpis mana tukuy tiempopajchu.
25 Pastoqa chʼakipun chantá mosoj pastoñataj llojsimun.
Uywaspajpis orqo patasmanta pastota tantamunku.
26 Maltón carnerosniyki* pʼachallichisunku,
chivosniykitaj jallpʼaykej precion kanku.
27 Ashkha cabra lecheyki kanqa,
qanpaj, familiaykipaj, warmi kamachisniykipajpis.*