Proverbios
Yachayniyoj wawaqa tatanta kusichin.+
Mana yuyayniyoj wawataj mamanta waqachin.
2 Mana allin imasta ruwaspa qhapajyayqa qhasilla kanqa.
Cheqan kajta ruwaytaj wañuymanta runata libran.+
3 Jehová Diosqa cheqan runata mana yarqhasqata purichenqachu.+
Sajra runasmantaj mana qonqachu imastachus munasqankuta.
4 Qhella runaqa wajchayanqa.+
Sumajta llankʼaj runataj qhapajyanqa.+
5 Qʼoñi tiempopi cosechata oqharej qhari wawaqa yachayniyoj.
Cosecha tiempopi miskʼita puñoj qhari wawataj pʼenqay.+
6 Cheqan runaqa bendicionesta japʼenqa.+
Sajra runataj siminwan pakan sonqonpi sajra wakichikusqanta.
7 Cheqan runamantaqa allinta parlaspa yuyarikonqanku.+
Sajra runaj sutintaj chinkaponqa.+
8 Yachayniyoj runaqa yuyaychasqankuta tukuy sonqo japʼikonqa.+
Wampu jina parlaj runatataj mana allin imas qhatirenqa.+
9 Tukuy sonqo kasukoj runaqa* allinta kausakonqa.+
Ñanninta wistʼuyachej runarí, juchanta mana pakayta atenqachu.+
10 Sajra imasta ruwayta munaspa ñawinta chʼirmirej runaqa llakiyta apamun.+
Wampu jina parlaj runatarí mana allin imas qhatirenqa.+
11 Cheqan runaj simenqa kausay juturi.+
Sajra runataj siminwan pakan sonqonpi sajra wakichikusqanta.+
12 Chejnikoyqa phiñanakuyta rikhurichin.
Munakuytaj tukuy pantaykunata pʼampan.+
13 Allinta tanteayta yachaj runaqa yachaywan parlan.+
Varataj mana yuyayniyojta wasanpi seqʼonapaj.+
14 Yachayniyoj runasqa yachakusqankuta sumajta waqaychanku.+
Wampu runaj simintaj llakiyta apamun.+
15 Qhapaj runaj kapuynenqa sumaj perqasniyoj llajtaman rijchʼakun.
Wajcha runaj wajcha kaynintaj llakiyman chayachin.+
16 Cheqan runaj ruwasqanqa kausayman apan.
Sajra runaj ruwasqantaj juchaman apan.+
17 Kʼamisqata japʼikojqa kausay ñanta runasta pusan.
Kʼamisqata mana valechejtaj pantasqa ñanta runasta pusan.
18 Runa masinta chejnikusqanta pakajqa llulleriosta parlan.+
Wajkunamanta llullakuspa parlaj runataj mana yuyayniyoj.
19 Ashkha parlaypeqa kanpuni pantay.+
Parlasqanta midirikoj runataj mana imatapis parlarpallanchu.+
20 Cheqan runaj parlasqanqa rijchʼakun aswan sumajnin qolqe metalman.+
Sajra runaj sonqontaj ni imapaj valenchu.
21 Cheqan runaqa parlasqanwan ashkha runasta cheqan ñanman pusan.+
Wampu runataj mana yuyayniyoj kasqanrayku wañun.+
22 Jehová Diospa bendicionnenqa runata allin kausayman churan,*+
manataj bendicionninwan khuskataqa ima ñakʼariytapis apachimunchu.
23 Wampu runaqa pujllakuyta jinalla qhawan pʼenqay juchaspi puriyta.
Allinta tanteayta yachaj runataj yachayniyoj.+
24 Imatachá sajra runaqa manchachikun chaypuni payta qhatirenqa.
Cheqan runamantaj imatachus munasqanta jaywanqanku.+
25 Imaynatachus sinchʼi wayraqa tukuy imata apaspa chinkarichin, ajinallatataj sajra runaqa chinkachisqa kanqa.+
Cheqan runatajrí, wiñaypaj ruwasqa cimiento jina kanqa.+
26 Vinagreqa kirusta ras nichin, qʼoshñitaj ñawista kʼararichin,
ajinatamin qhella runaqa patronninpa umanta nanachin.
27 Jehová Diosta manchachikoyqa runata aswan unayta kausachin.+
Sajra runaj kausaynintaj pisiyachisqa kanqa.+
28 Cheqan runaj suyakusqanqa payman kusiyta apamun.+
Sajra runaj suyakusqantaj qhasilla kanqa.+
29 Jehová Diospa ruwasqasnenqa* mana juchayoj runapaj jarkʼachasqa lugarman rijchʼakun,+
mana allin kajta ruwajkunapajtaj tukuchisqa kaywan ninakun.+
30 Cheqan runataqa ni jaykʼaj urmachenqankuchu.+
Sajra runatajrí manaña jallpʼapi tiyakonqachu.+
31 Cheqan runaj siminmantaqa allin yachay llojsimun.
Millay imasta parlaj simitaj wiñaypaj chʼinyachisqa kanqa.
32 Cheqan runaj simenqa miskʼita parlan.
Sajra runaj siminrí millayta parlan.