Josué
2 Chantá Nunpa wawan Josueqa, Sitimmantapacha+ iskay wateqajkunata pakayllamanta kacharqa. Paykunamanqa nerqa: “Rispa chay jallpʼata qhawamuychej, astawanqa Jericó llajtata”, nispa. Paykunataj rispa uj khuchi warmej* wasinman chayakorqanku, chaypitaj qhepakorqanku. Chay warmeqa sutikorqa Rahab.+ 2 Jericó llajtaj reyninmanqa pichus willamusqa: “Kay chʼisi israelita runas jallpʼanchejta wateqaj jamunku”, nispa. 3 Chantá Jericó llajtaj reynenqa Rahabman kay jinata nichimorqa: “Wasiykiman chayamunku chay qharista orqhomuy. Paykunaqa tukuynin jallpʼata wateqaj jamunku”, nispa.
4 Chay warmitajrí chay iskay qharista pakaykuytawan nerqa: “Arí, iskay qharis jamorqanku. Chaywanpis mana yachanichu maymantachus kasqankuta. 5 Laqhayaykushajtinña ripunku, llajta punku wisqʼakunanpajña kashajtin. Maymanchus rinkupis, mana yachanichu. Pero usqhayllata qhatiykuspaqa taripankichejraj”, nispa. 6 Chaywanpis payqa chay qharista terrazaman* wicharichisqa. Chaypitaj paykunata pakaykusqa linaza marqʼas kasharqa chay ukhuman. 7 Chantá reypa kachasqan runasqa chay qharista maskʼaj rerqanku, Jordán mayu ladoman, mayu chimpanas chayman.+ Maskʼaj llojsisqankutawantaj, llajta punkoqa wisqʼakorqapacha.
8 Chay wateqajkuna manaraj puñukapushajtinkutaj Rahabqa terrazaman wicharerqa, paykuna kasharqanku chayman. 9 Nerqataj: “Noqaqa yachani Jehová Diosqa kay jallpʼasta qankunaman qosunaykichejta.+ Noqaykoqa sinchʼi mancharisqas kashayku.+ Tukuy kay jallpʼaspi tiyakojkunaqa jamusqaykichejmanta may mancharisqas kashanku.+ 10 Uyariyku Egiptomanta llojsimushajtiykichej imaynatachus Jehová Diosqa Puka mar qochata chʼakichisqanta, chaynintataj pasachimususqaykichejta.+ Uyarillaykutaj amorreospa iskaynin reyesninkuta Jordán mayu chimpapi* wañuchisqaykichejta, Sehonta,+ Ogtawan.+ 11 Chayta uyarispa mayta kharkatiterqayku. Chayrayku mana ni mayqenniykojtapis kallpa kanchu qankunawan maqanakunaykupajqa. Jehová Diosniykichejmin Diosqa cielopipis kay jallpʼapipis.+ 12 Kunanqa ama jina kaspa Jehová Diospa sutinpi jurawaychej ari, tataypa wasinmanta kajkunata khuyanaykichejta,* imaynatachus noqapis qankunata khuyakorqaykichej ajinata. Chaypajtaj uj señalta qowaychej ari, nisqaykichejta juntʼanaykichejtapuni yachanaypaj. 13 Ama wañuchinkichejchu ari tatayta, mamayta, hermanosniyta, hermanasniyta, paykunajta kajkunatapis. Wañuymanta salvawasqayku ari”,+ nispa.
14 Chay wateqajkunataj kuticherqanku: “Noqaykoqa kausayniykuta qankunarayku qosqayku. Imamanchus jamusqaykuta mana willankichu chayqa, qanta khuyakusqayku, nisqaykutataj juntʼasqayku, maypachachus Jehová Dios kay jallpʼasta qowasqayku chaypacha”, nispa. 15 Chantá Rahabqa uj waskhata paykunaman jaywarqa. Paykunataj chay waskhawan ventananta uraykorqanku. Rahabpa wasenqa llajta perqa patapi karqa.+ 16 Manaraj ripushajtinku Rahabqa paykunaman nerqa: “Riychej orqos chaynejman, maskʼashasunkichej chay runas ama taripasunaykichejpaj. Chaypi pakakuychej kinsa diasta. Paykuna kutimojtinkuraj ñanniykichejta ripunkichej”, nispa.
17 Paykunataj nerqanku: “Noqaykoqa juramentota ruwachiwasqaykuta juntʼasqaykupuni.+ 18 Maypachachus kay jallpʼasman jamusqayku chaypachaqa, kay puka waskhata ventanaykiman wataykunki, maynintachus uraykusqayku chayman. Kay wasiykimantaj pusamunki tataykita, mamaykita, hermanosniykita, tataykej wasinpi tukuy kajkunatawan.+ 19 Sichus mayqellanpis wasiykimanta llojsenqa chayqa, paylla juchayoj kanqa wañusqanmanta, noqaykoqa mana juchayojchu kasqayku. Pero sichus pipis wañunman wasiyki ukhupi kashaspa chayqa, noqayku juchayoj kasqayku pay wañusqanmanta. 20 Sichus kayman jamusqaykuta pimanpis willanki chayqa,+ mana juntʼanaykuchu kanqa kay juramentota ruwachiwasqaykutaqa”, nispa. 21 Rahabtaj kuticherqa: “Chay niwasqaykichejman jina ruwasaj”, nispa.
Chaymantataj paykunata kachaporqa, paykunataj riporqanku. Chantá Rahabqa puka waskhata ventananman wataykorqa. 22 Chay wateqajkunaqa orqosman rispa, chaypi kinsa diasta pakakamorqanku, paykunata maskʼasharqanku chay runas kutimunankukama. Chay maskʼajkunaqa paykunata tukuynin ñankunaspi maskʼamorqanku, nitaj tarerqankuchu. 23 Chaymanta chay iskay qharisqa orqosmanta uraykamuspa, mayuta pasarqanku, kutiporqankutaj Nunpa wawan Josueman. Chantá Josueman willarqanku imaynatachus purimusqankuta. 24 Paykunaqa nillarqankutaj: “Jehová Diosqa tukuy chay jallpʼasta qopuwanchejña.+ Tukuy chaypi tiyakojkunaqa allin mancharisqas kashanku rishasqanchejmanta”,+ nispa.