Jueces
10 Abimelecpa qhepantaqa, Tolañataj sayarerqa israelitasta salvananpaj.+ Tolaqa karqa Puaj wawan, Dodoj allchhin. Payqa Isacar ayllumanta* karqa, tiyakorqataj Efraín orqospi, Samir llajtapi. 2 Tolaqa Israelpi 23 watasta juez karqa. Wañupojtintaj Samirpi pʼamparqanku.
3 Tolaj qhepantaqa, Galaadmanta Jairñataj sayarerqa. Payqa 22 watasta Israelpi juez karqa. 4 Jairpataqa tiyaporqa 30 qhari wawasnin. Paykunaqa 30 burrospi lloqʼasqa purej kanku, 30 llajtasniyojtaj karqanku. Chay llajtasqa kunankama sutikun Havot-Jaír,+ Galaad jallpʼapitaj kashan. 5 Jaír wañupojtintaj, Camón nisqa cheqapi payta pʼamparqanku.
6 Israelitasqa watejmanta sajra imasta Jehová Diospa qhawayninpi ruwarqanku.+ Yupaychaytataj qallarerqanku Baal santosta,+ Astoret santosta, Arammanta* dioskunata, Sidonmanta dioskunata, Moabmanta dioskunata,+ ammonitaspa diosesninkuta,+ filisteospa diosesninkuta+ ima. Ajinata israelitasqa Jehová Diosmanta karunchakuspa manaña payta sirverqankuchu. 7 Chayrayku Jehová Diosqa mayta israelitaspaj phiñakorqa. Diosqa paykunata jaywaykorqa filisteospa makisninkuman, ammonitaspa makisninkuman ima.+ 8 Chay watamantapacha filisteoswan ammonitaswanqa 18 watasta mayta ñakʼaricherqanku, sarorqankutaj Galaad jallpʼapi tiyakoj israelitasta. Chayqa karqa Jordán mayu chimpapi, mayqenchus ñaupajta amorreospa jallpʼanku karqa chaypi. 9 Chantapis ammonitasqa Jordán mayuta chimpaj kanku maqanakunankupaj Judá aylluwan, Benjamín aylluwan, Efraín aylluwanpis. Ajinapi israelitasqa may llakiypi rikhurerqanku. 10 Chantá israelitasqa Jehová Diosmanta yanapata mañakorqanku:+ “Diosníy, contraykipi juchallikuyku. Qanmanta karunchakuspa Baal santosta sirviyku”,+ nispa.
11 Jehová Diostaj israelitasta nerqa: “Noqa kacharicherqaykichej egipciospa makisninkumanta,+ jinallataj amorreosmanta,+ ammonitasmanta, filisteosmanta,+ 12 sidoniosmanta, amalequitasmanta, madianitasmanta ima. Paykunaqa mayta ñakʼarichisorqachej. Yanapata mañakuspa qhaparikamuwajtiykichejtaj, noqaqa makisninkumanta kacharicherqaykichej. 13 Chaywanpis qankunaqa noqamanta karunchakuspa waj dioskunata sirverqankichej.+ Chayrayku noqaqa manaña ujtawan salvasqaykichejñachu.+ 14 Riychej, yanapata mañakamuychej chay ajllakusqaykichej dioskunamanta.+ Paykunawan chay llakiyniykichejmanta salvachikuychej”,+ nispa. 15 Israelitastaj Jehová Diosta nerqanku: “Noqaykoqa juchallikuyku. Kunanqa imatachá qan munanki chayta ruwawayku. Chaywanpis ama jina kaspa salvallawayku ari”, nispa. 16 Chantá israelitasqa chay waj llajtayoj diosesninkuta chinkacherqanku, Jehová Diostataj watejmanta sirviyta qallarerqanku.+ Diostaj manaña munarqachu israelitas sufrinallankutapuni, imaraykuchus sonqon nanarqa.+
17 Chay qhepata ammonitasqa+ tantakuspa Galaadpi jarakorqanku. Israelitastaj tantakuspa Mizpapi jarakorqanku. 18 Galaadpi tiyakoj israelitaswan kuraj kamachejkunasninkuwanqa ninakorqanku: “¿Pitaj ammonitaswan maqanakunanchejpaj ñaupaqenchejta renqari?+ Pichus ñaupaqenchejta renqa chaymin kamachejninchej kachun Galaadpi tukuy tiyakojkunajta”, nispa.