2 Crónicas
36 Judamanta runastaj Josiaspa wawan Jehoacazta+ Jerusalenpi rey kananpaj churarqanku tatanpa cuentanmanta.+ 2 Jehoacazqa 23 watasniyoj karqa rey jina kamachiyta qallarishajtin, Jerusalenpitaj kinsa killata kamacherqa. 3 Egiptoj reynintaj Jehoacazta orqhorparerqa amaña Jerusalenpi rey jina kamachinanpaj, nacionmantataj mañarqa 3.420 kilos* qolqe metalta, 34 kilos* qoritawan.+ 4 Chantá Egiptoj reynenqa Jehoacazpa hermanon Eliaquimta churarqa Judapi, Jerusalenpipis rey jina kamachinanpaj. Eliaquimpa sutintataj Jehoiaquimman cambiarqa. Chantá Nekoqa+ Eliaquimpa hermanon Jehoacazta Egiptoman aparqa.+
5 Jehoiaquimqa+ 25 watasniyoj karqa rey jina kamachiyta qallarishajtin. Jerusalenpitaj 11 watasta kamacherqa. Jehoiaquimqa Jehová Diosninpa qhawayninpi sajra imasta ruwarqa.+ 6 Babiloniaj reynin Nabucodonosortaj+ Jehoiaquimpa contranta jamorqa, iskay cobre cadenaswan wataykuspataj Babiloniaman apakaporqa.+ 7 Chantapis Nabucodonosorqa Jehová Diospa wasinmanta wakin imasta apakaporqa, chay imastataj churarqa Babiloniapi kamachina wasinman.+ 8 Jehoiaquimpa tukuy kausayninmanta, millay imasta ruwasqanpis, paymanta millay imas yachakusqanpis qhelqasqa kashan Israelpa, Judajpa Reyesninmanta Libropi. Wawan Joaquintaj paypa cuentanmanta rey jina kamachiyta qallarerqa.+
9 Joaquinqa+ 18 watasniyoj karqa rey jina kamachiyta qallarishajtin. Jerusalenpitaj kinsa killata chunka diastawan kamacherqa, Jehová Diospa qhawayninpitaj sajra imasta ruwallarqapuni.+ 10 Wata qallariytataj* rey Nabucodonosorqa kamacherqa Babiloniaman apanankuta Joaquinta,+ Jehová Diospa wasinmanta valorniyoj imastawan.+ Chantá Sedequiasta rey jina kamachinanpaj churarqa Judapi, Jerusalenpipis. Sedequiasqa Joaquinpa tion karqa.+
11 Sedequiasqa+ kamachiyta qallarishajtin 21 watasniyoj karqa, Jerusalenpitaj 11 watasta kamacherqa.+ 12 Sedequiasqa Jehová Diospa qhawayninpi sajra imasta ruwallarqapuni. Payqa mana profeta Jeremiaspa+ ñaupaqenpi sonqonta llampʼuyacherqachu, Jehová Dios kamachisqanrayku Jeremías parlashajtinpis. 13 Nabucodonosorqa Sedequiasta Diospa sutinpi juracherqa payta kasukunanta. Jinapis Sedequiasqa rey Nabucodonosorpa contranta oqharikorqa.+ Sedequiasqa sonqonta rumiyachispa kʼullukorqa, nitaj munarqachu Israelpa Diosnin Jehovaman kutirikuyta. 14 Sacerdotespa tukuy kamachejkunankupis runaspis astawan juchallikorqanku waj nacionespa millay ruwasqasninkuta ruwaspa. Jehová Diospa wasintapis chʼichicharqanku,+ mayqentachus Jerusalenpi paypaj tʼaqakorqa chay wasita.
15 Ñaupa tatasninkoj Diosnin Jehovaqa kamachisninwan paykunata kʼamichillarqapuni. Diosqa nacionninta, tiyakusqan lugartapis khuyakusqanrayku kutin kutinta paykunata kʼamerqa. 16 Paykunatajrí cheqa Diospa* kachasqan kamachisninmanta burlakorqanku.+ Diospa parlasqasnintapis pisipaj qhawarqanku,+ profetasninmantapis asikorqanku.+ Paykunaqa niña yanapanapaj jinachu karqanku. Chayrayku Jehová Diosqa paykunapaj sinchʼita phiñakorqa.+
17 Chayrayku Diosqa paykunaman kacharqa caldeospa+ reyninkuta, chay reytaj templopi+ jovenesta espadawan wañuracherqa.+ Payqa ni pita khuyakorqachu, ni jovenesta, ni doncellasta, ni machitusta, ni onqosqastapis.+ Diosqa chay reypa makinman tukuy imata jaywaykorqa.+ 18 Chay reytaj cheqa Diospa wasinmanta tukuynin jatuchaj imasta, juchʼuy imastapis apakaporqa, Jehová Diospa wasinpi jallchʼasqa karqa chay valorniyoj imasta. Apakapullarqataj reypa jinallataj kuraj kamachisninpa valorniyoj imasninkuta, tukuynintapuni Babiloniaman apakaporqa.+ 19 Cheqa Diospa wasinta ruphaykucherqa,+ Jerusalenpa perqasninta urmacherqa,+ sumaj ruwasqa torresninmanpis ninata japʼiykucherqa, tukuynin valorniyoj imastapis phirerqa.+ 20 Espadawan mana wañojkunatataj presosta Babiloniaman apakaporqa,+ paypa kamachisnintaj karqanku,+ jinallataj wawasninpata, Persiaj gobiernon sayarinankama.+ 21 Ajinamanta imatachus Jehová Dios Jeremiasnejta parlasqan juntʼakunanpaj.+ Chay jallpʼasqa chʼinpacha karqa samarikuna watasnin juntʼakunankama.+ Chay jallpʼasqa chʼin kashaspa samarerqa, 70 watas juntʼakunankama.+
22 Persiaj reynin Ciro+ ñaupaj kaj watata kamachishajtin, Jehová Diosqa Persiaj reynin Ciroj sonqonta kuyuricherqa, uj kamachiyta tukuynin nacionnintinman willachinanpaj, ajinamanta juntʼakunanpaj imatachus Jehová Dios Jeremiasnejta parlasqan.+ Chay kamachiytaqa qhelqaykullarqataj,+ nisharqataj: 23 “Persiaj reynin Ciroqa kayta nin: ‘Cielopi kaj Jehová Diosqa kay jallpʼamanta tukuynin nacionesta qopuwan.+ Payqa Jerusalenpi uj wasita ruwapunayta kamachiwan, Judá jallpʼapi.+ Qankuna ukhupi pillapis Diospa nacionninmanta tiyan chayqa, paykunawan Jehová Diosninku kachun, jaqaymantaj kutipuchunku’,+ nispa”.