2 Reyes
10 Achabpataqa*+ 70 wawasnin Samariapi karqa. Chayrayku Jehuqa cartasta qhelqaspa Samariaman apacherqa, Jezreelmanta kuraj kamachejkunaman, kurajkunaman,+ Achabpa wawasninta qhawajkunamanpis.* Chay cartaspeqa ajinata nisharqa: 2 “Kay carta qankunaman chayamojtin qankunawan khuskha kashanqanku señorniykichejpa wawasnin, chantapis qankunajta tiyapusunkichej guerraman rinapaj carretasniykichej, caballosniykichej, guerrapaj armasniykichej, sumaj perqasniyoj llajtapis. 3 Señorniykichejpa wawasninmanta aswan allin kajta, aswan cheqan kajta ajllakuychej, tatanpa cuentanmantataj rey kananpaj churaychej. Chantá señorniykichej familianrayku maqanakuychej”, nispa.
4 Paykunataj sinchʼita mancharikuspa nerqanku: “Paytaqa ni iskay reyespis atipayta aterqankuchu,+ ¿imaynatá noqanchej atipayta atisunmanri?”, nispa. 5 Chayrayku reypa kamachina wasinmanta encargado, llajtata kamachejpis, kurajkunapis, guardiaspis Jehuman kay jinata willacherqanku: “Noqaykoqa kamachisniyki kayku, imatachá niwasqayku* chayta ruwasqayku. Noqaykoqa mana pitapis rey kananpaj churasqaykuchu. Imachus allin rijchʼasunki chayta ruwallay”, nispa.
6 Jehutaj waj cartatañataj qhelqaspa paykunaman apacherqa: “Sichus noqaman sayasqa kashankichej chayqa, sichus ima nisqaytapis kasuyta munankichej chayqa, señorniykichejpa wawasninpa umasninta apamuspa noqawan tinkoj jamuychej Jezreelman, qʼaya kay horasta”, nispa.
Reypa 70 wawasnenqa llajtamanta sumaj respetasqa runaswan kasharqanku, chay runasqa paykunata qhawaj kanku. 7 Paykunataj chay cartata leeytawankama reypa wawasninta japʼispa umasninkuta qholurarqanku, 70 qharistapuni.+ Chay umasninkutaqa canastasman churaykuspa Jehuman apacherqanku Jezreelkama. 8 Uj runataj yaykumuspa Jehuman willarqa: “Reypa wawasninpa umasninkuta apamusqanku”, nispa. Jehutaj nerqa: “Chay umasta churamuychej llajta punku chaynejman iskay montonesta, chaypi qʼayakama kachunku”, nispa. 9 Tutamanta llojsispataj tukuy runaspa ñaupaqenpi sayaykuspa nerqa: “Qankunaqa mana juchayojchu kankichej. Noqa señorniypa contranta oqharikuspa payta wañuchini.+ Kay tukuynin runastarí, ¿pitaj wañuchin? 10 Kunanqa kayta yachaychej, Jehová Diosqa Achabpa familianpa contranpi parlarqaña, Jehová Diospa chay parlasqantaj juntʼakonqapuni.+ Jehová Diosqa imatachus parlarqa kamachin Eliasnejta chayta juntʼashan”,+ nispa. 11 Chantapis Jehuqa Achabpa familianmanta Jezreelpi puchojkunata tukuyninkuta wañuracherqa, wañurachillarqataj tukuynin respetasqa runasninta, rejsisqasninta, sacerdotesnintapis,+ nipuni ujllatapis kausashajta saqerqachu.+
12 Chantá Jehuqa sayariytawan Samariaman rerqa. Chay ñanpitaj ovejerospa millma ruthuna wasinku karqa. 13 Chaynejpitaj Jehuqa Judamanta rey Ocoziaspa+ hermanosninwan tinkorqa, paykunatataj taporqa: “¿Pikunataj kankichej?”, nispa. Paykunataj kuticherqanku: “Ocoziaspa hermanosnin kayku. Waturikoj rishayku reypa wawasninta, reypa mamanpa wawasnintawan allillanchus manachus kashanku chayta”, nispa. 14 Jehutaj chay ratopacha soldadosninta nerqa: “Paykunata kausashajta japʼiychej”, nispa. Soldadostaj kausashajta japʼispa paykunata wañuracherqanku chay millma ruthuna wasej estanquen chaypi, 42 qharista wañucherqanku. Jehuqa ni ujtapis kausashajta saqerqachu.+
15 Chaymanta Jehú ripushajtintaj Recabpa+ wawan Jehonadabwan+ tinkorqa, Jehonadabqa Jehuwan tinkoj jamushasqa. Napaykojtintaj Jehuqa taporqa: “¿Tukuy sonqochu noqaman sayasqa kashanki imaynatachus noqapis tukuy sonqo qanman sayasqa kashani ajinata?”, nispa.
Jehonadabtaj kuticherqa: “Arí”, nispa.
Jehutaj nerqa: “Jina kajtenqa makiykita jaywariway”, nispa.
Jehonadabtaj makinta jaywarqa, Jehutaj makinmanta aysaspa carretanman wichariykucherqa. 16 Chantá Jehonadabta nerqa: “Jaku rinachej, rikumunkitaj Jehová Diospa contranpi kajkunataqa manapuni rikullaytapis atisqayta”,+ nispa. Ajinata Jehuqa Jehonadabta maqanakuna carretanpi pusarqa. 17 Chantá Jehuqa Samariaman chayaspa Achabpa familianmanta puchojkunata tukuysitunta wañuracherqa.+ Chaytaj karqa Jehová Dios Eliasman nisqanman jina.+
18 Chantapis Jehuqa tukuynin runasta tantaykuchiytawan nerqa: “Achabqa pisillata Baalta yupaycharqa,+ Jehutajrí Baaltaqa astawanraj yupaychanqa. 19 Chayrayku Baalta tukuy yupaychajkunata tantachinpuwaychej, Baalpa tukuy profetasninta,+ tukuy sacerdotesnintawan.+ Amapuni ni ujpis faltachunchu, tukuyninkupuni jamuchunku, Baalpaj ashkha uywasta ruphachisaj. Pichus mana jamojqa wañuchisqa kanqa”, nispa. Jehuqa nispalla chayta nisharqa Baalta yupaychajkunata tukuchinanrayku.
20 Jehuqa nillarqataj: “Baalpaj uj sumaj tantakuy ruwakushasqanta willaramuychej”, nispa. Runastaj willaramorqanku. 21 Jehutaj tukuynin Israel nacionpi willaracherqa. Baalta yupaychajkunataj tukuyninkupuni jamorqanku, nipuni ujpis faltakorqachu. Paykunaqa Baalpa templonman yaykorqanku,+ Baalpa templonmantaj kʼuchuy kʼuchupuni juntʼaykurerqanku. 22 Jehutaj ropa jallchʼana wasimanta encargadota nerqa: “Baalta yupaychajkunapaj tukuyninkupaj ropasta orqhomuy”, nispa. Paytaj tukuyninkupaj ropasta orqhomorqa. 23 Chantá Jehuqa Recabpa wawan Jehonadabwan+ khuska Baalpa templonman yaykorqa. Jehutaj Baalta yupaychajkunata nerqa: “Kay wasipi allinta qhawarispa maskʼaychej: amapuni Jehová Diosta yupaychajkuna kaypi kachunkuchu, Baalta yupaychajkunalla kaypi kachunku”, nispa. 24 Chantá Baalta yupaychajkunaqa qarakusta ruwayta* qallarerqanku, uywastapis qʼolachiyta* qallarerqanku. Jehuqa 80 soldadosta jawaman sayaykucherqa. Chantá nerqa: “Kay runastaqa makisniykichejman churashani, pichus uj runata ayqechejqa chay ayqekojpa cuentanmanta wañuchisqa kanqa”, nispa.
25 Chay jaywanasta qʼolachiyta tukusqankutawan, Jehuqa guardiasta,* soldadostawan nerqa: “Yaykumuspa paykunata wañurachiychej, amapuni ujpis ayqechunchu”,+ nispa. Guardiaswan soldadoswantaj espadasninkuwan chay runasta wañuchiyta qallarerqanku, wañuchispataj jawaman wijchʼuramusharqanku, ajinata paykunaqa wañurachispa yaykorqanku Baalpa templonpa ukhu kaj yupaychana cuartonkama. 26 Chantá Baalpa templonmanta tukuynin yupaychana postesta*+ orqhomuspa ruphaykucherqanku.+ 27 Chantá Baalta yupaychana rumi pilarta thuñerqanku.+ Baalpa templontapis urmachillarqankutaj,+ chantá chay lugarta bañoman tukucherqanku, kunankamataj jinallapuni kashan.
28 Chay jinamanta Jehuqa Israel nacionmanta Baalta chinkacherqa. 29 Jinapis Jehuqa Nebatpa wawan Jeroboanpa juchasninta ruwallarqapuni, mayqenwanchus israelitasta juchaman urmacherqa chay juchasta. Payqa chay qorimanta ruwasqa waka uñasta yupaychallarqapuni mayqenkunachus Betelpi, jinallataj Danpi kasharqanku chaykunata.+ 30 Jehová Diostaj Jehuta nerqa: “Qhawayniypeqa allin kajtapuni ruwanki, cheqan kajta ruwanki, Achabpa familiantapis+ imatachus ruwayta munasqayta ruwanki, chayrayku mirayniykimanta tawa reyes Israelpa kamachina tiyananman tiyaykonqanku”,+ nispa. 31 Jinapis Jehuqa Israelpa Diosnin Jehovaj Leyninta mana tukuy sonqochu kasukorqa.+ Payqa Jeroboanpa juchasninta ruwallarqapuni mayqenwanchus israelitasta juchaman urmacherqa chay juchasta.+
32 Chay tiempopi Jehová Diosqa Israel nacionta pisimanta pisi juchʼuyyachiyta qallarerqa. Hazaelqa maqanakuspa tukuy ladomanta Israel nacionpa jallpʼasninta japʼikapusharqa.+ 33 Payqa Jordanmantapacha inti llojsimuy ladopi kaj tukuynin Galaad jallpʼasta japʼikaporqa, nisunman Arnón mayoj* ladonpi Aroer llajtamantapacha, tukuynin Galaad jallpʼasta, Basán jallpʼastapis.+ Chay jallpʼaspi tiyakoj kanku Gad ayllu,* Rubén ayllu, Manasés ayllupis.+
34 Jehujpa tukuy kausayninmanta, tukuy ima ruwasqanmanta, sumaj atiyniyoj kasqanmantapis qhelqasqa kashan Israelpa reyesninmanta parlaj libropi. 35 Chantá Jehuqa ñaupa tatasnin jina wañuporqa, paytaqa Samariapi pʼamparqanku. Wawan Jehoacaztaj+ paypa cuentanmanta rey jina kamachiyta qallarerqa. 36 Jehuqa Samariapi Israelta kamacherqa 28 watasta.