Jeremías
16 Watejmanta Jehová Diosqa parlamuwaspa niwarqa: 2 “Ama warmichakuychu, amataj wawasniyki kachunchu, ni qhari wawasniyki, ni warmi wawasniykipis. 3 Kaytamin Jehová Diosqa nin kay nacionpi nacekoj qhari wawasmanta, warmi wawasmantapis, chay wawaspa mamasninkumanta, tatasninkumantapis. Diosqa nin: 4 ‘Paykunataqa wañuchej onqoykuna wañurachenqa,+ nitaj pipis paykunamanta waqanqachu, nitaj pipis pʼampanqachu. Wanu jina pampapi wijchʼurayanqanku.+ Paykunataqa espadataj yarqhaytaj wañurachenqa.+ Paykunaj cuerposninkutaqa pʼisqostaj monte animalestaj mikhukaponqanku’, nispa.
5 Jehová Diosqa kayta nin:
‘Ama yaykunkichu wañusqayojpa wasinkuman,
amataj chaypi waqankichu, nitaj paykunata sonqochankichu’,+ nispa.
Imaraykuchus Jehová Diosqa nin: ‘Noqa kay nacionmanta allin kausayta chinkachini.
Niña paykunataqa munakusajchu, nitaj khuyakusajchu.+
6 Tukuyninku kay jallpʼapi wañonqanku, qhapajpis wajchapis kachunku.
Paykunataqa mana ni pi pʼampanqachu,
paykunamantaqa ni pi waqanqachu,
nitaj pipis paykunamanta llakikuspa cuerponta khuchurakonqachu, nitaj umantapis pʼajlakonqachu.*
7 Waqajkunamanqa mana ni pi mikhunata jaywarej kanqachu
wañusqasninkumanta sonqochakunankupaj,
nillataj pipis uj copa vinota jaywarej kanqachu sonqochakunankupaj
tatanku, mamanku wañupusqanmanta tomarispa sonqochakunankupaj.
8 Ama yaykunkichu fiestata ruwashanku chay wasimanqa,
chaypi runaswan tiyaykukuspa mikhunaykipaj, tomanaykipajqa’, nispa.
9 ”Angelesta kamachej Israelpa Diosnin Jehovaqa kayta nin: ‘Kay lugarpeqa manaña uyarikonqachu kusiymanta qhaparisqanku, mayta kusikusqankupis, nillataj novioj parlasqan, ni noviaj parlasqanpis. Noqamin chayta ruwasaj qankuna kausashajtiykichej, qankuna rikushajtiykichej’,+ nispa.
10 ”Chay tukuy imasta kay nacionmanta runasman willajtiyki, paykunaqa tapusonqanku: ‘¿Imaraykutaj Jehová Dios nin chay tukuy ñakʼariykunata apachimunawaykutari? ¿Imapitaj pantasqaykuri? ¿Ima juchatataj Jehová Diosniykoj contranpi ruwasqaykuri?’,+ nispa. 11 Qantaj paykunaman kutichinki: ‘Jehová Diosqa nin: “Kayqa ajina pasashan tatasniykichej saqerpariwasqankurayku.+ Paykunaqa chay waj diosesta yupaychallarqankupuni, sirvillarqankupuni, paykunamantaj kʼumuykukullarqankupuni.+ Noqatataj saqerpariwarqanku, leyniytapis mana kasukorqankuchu.+ 12 Qankunaqa chay ñaupa tatasniykichejmantapis aswan manakajtaraj ruwankichej.+ Noqata kasunawaykichejmantaqa sapa ujniykichej kʼullukuspa* sajra sonqoykichejta kasunkichej.+ 13 Chayrayku qankunataqa kay nacionmanta waj nacionman wijchʼusqaykichej. Chay naciontaqa ni qankunapis, ni ñaupa tatasniykichejpis rejserqankichejchu.+ Chaypitaj waj diosesta tuta pʼunchay sirvinkichej.+ Mana qankunataqa khuyakusqaykichejchu”, nispa’.
14 ”Jehová Diosqa nin: ‘Uj pʼunchay qayllamushan, chaypachataj runasqa niña nenqankuchu: “Kausaj Jehová Diospa sutinpi jurani, paymin Egipto jallpʼamanta Israel nacionta orqhomorqa”,+ nispa. 15 Chayta ninankumantaqa kayta nenqanku: “Kausaj Jehová Diospa sutinpi jurani, paymin Israel nacionta pusamorqa norte jallpʼasmanta,* jinallataj may jallpʼasmanchus chʼeqeracherqa* chay jallpʼasmantapis”, nispa. Noqaqa paykunata watejmanta jallpʼankuman pusamusaj, ñaupa tatasninkuman qorqani chay jallpʼasman’,+ nispa.
16 Jehová Diosqa nin: ‘Ashkha pescadoresta wajyachimusaj,
paykunataj nacionniymanta kajkunata pescadosta jina japʼenqanku.
Chantá monte animalesta japʼejkunata ashkhata wajyachimusaj,
paykunataj nacionniymanta kajkunata japʼiranqanku orqospi, lomaspi,
qaqa kʼajlluspipis.*
17 Ñawisneyqa tukuy ima ruwasqankuta rikushan.
Mana noqamanta pakakuyta atinkumanchu,
nitaj juchankutapis noqamanta pakayta atinkumanchu.
18 Noqa paykunataqa castigasqata castigasaj mana kasukusqankumanta, jinallataj juchankumantapis.+
Paykunaqa jallpʼayta chʼichichanku chay mana kausayniyoj millay santosninkuwan,
chay millachikuna imaswan herenciayta juntʼaykuchinku’,+ nispa”.
19 Jehová Diosníy, qanmin kallpay kanki, sumaj jarkʼachasqa lugarniytaj.
Llakiy tiempopeqa qanman ayqekamuni pakakunaypaj.+
Waj nacionesmanta runasqa jallpʼaj kʼuchusninmantapacha qanman jamuspa
nenqanku: “Ñaupa tatasniykoqa herenciata jina japʼikorqanku llulla diosesta yupaychayta.
Chay imasqa qhasi manakajlla kanku, nitaj imapajpis valenkuchu”,+ nispa.
20 Runaqa diosesta ruwakuyta atin chaypis,
chay ruwakusqan diosesqa mana Dioschu kanku.+
21 “Kunanqa paykunaman rejsichisaj,
kunanqa paykunaman kallpayta, atiyniytawan rejsichisaj.
Paykunataj yachanqanku suteyqa Jehová kasqanta”.