2 Crónicas
33 Manasesqa+ 12 watasniyoj kashaspa rey jina kamachiyta qallarerqa. Jerusalenpitaj 55 watasta kamacherqa.+
2 Manasesqa Jehová Diospa qhawayninpi sajra kajta ruwarqa, chay waj naciones jinallataj millay imasta ruwarqa. Chay nacionesta Jehová Diosqa qharqorqañapis Israel nacionpa ñaupaqenmanta.+ 3 Manasesqa tatan Ezequías urmacherqa chay pata lugarestapis watejmanta ruwachillarqataj.+ Chantapis Baal santospaj altaresta ruwacherqa, yupaychana kʼullu postestapis.* Manasesqa kʼumuykukuspa imaschus cielopi kan chay tukuy imasta yupaycharqa.+ 4 Chantá Jehová Diospa wasinpi ruwachillarqataj altaresta waj diosesta yupaychananpaj.+ Jehová Diosqa chay wasinmanta nerqañapis: “Jerusalén llajtapeqa sutiy wiñaypaj kanqa”,+ nispa. 5 Manasestaj Jehová Diospa wasinpa iskaynin patiosninpi altaresta ruwachillarqataj,+ imaschus cielopi kan chay tukuy imasta yupaychananpaj. 6 Qhari wawasnintapis Hinón wayqʼopi*+ ninawan ruphaykucherqa.*+ Layqeriosta ruwacherqa,+ jampirista watukorqa, adivinoswan yanapachikorqa. Aysirista, adivinostawan churarqa.+ Manasesqa Jehová Diosta phiñachinanpaj may chhika millay imasta ruwarqa.
7 Manasesqa llajllaspa ruwarqa chay santota cheqa Diospa* wasinman apaykorqa.+ Chay wasinmanta Diosqa Davidman, wawan Salomonmanpis nerqaña: “Kay wasipi, jinallataj Jerusalén llajtapipis sutiyta churasaj chaypi kananpaj. Noqamin Jerusalén llajtata ajllakuni Israelpa tukuy ayllusninmanta.*+ 8 Sichus israelitasqa tukuy kamachisqayta sumajta kasukonqanku, Moisesnejta qosqay Leyta, kamachiykunata, juiciopi nisqasniytapis kasukonqanku chayqa, ñaupa tatasninkuman qorqani chay nacionmanta manaña jaykʼajpis paykunata qharqosajchu”, nispa. 9 Manasesqa Judapi tiyakojkunata, Jerusalenpi tiyakojkunatapis juchaman urmachillarqapuni. Paykunataqa millay imastapuni ruwacherqa, Jehová Dios israelitaspa ñaupaqenkumanta chinkacherqa chay nacionesmantapis aswan millay imastaraj.+
10 Jehová Diosqa Manasesmanpis llajtanmanpis parlamoj, paykunataj mana kasukojchu kanku.+ 11 Chayrayku Jehová Diosqa paykunaj contrankuta kachamorqa Asiriaj reyninpa soldadosninpa capitanesninta. Manasestataj fierro ganchoswan* japʼerqanku, iskay cobre cadenaswan wataykuspataj Babiloniaman aparqanku. 12 Manasestaj manchay llakiy phutiypi kashaspa Jehová Diosninmanta rogakorqa, sonqomantapachataj mayta kʼumuykukorqa ñaupa tatasninpa Diosninkoj ñaupaqenpi. 13 Manasesqa Diosmanta mañakushallarqapuni, Diostaj mañakusqanta uyarerqa, chay rogakusqanqa Diospa sonqonman chayarqa, chayrayku Jerusalenman kutichiporqa rey kanallanpajpuni.+ Chaypacharaj Manasesqa repararqa Jehovalla cheqa Dios kasqanta.+
14 Chay qhepata Manasesqa mayunta* perqata ruwacherqa, Davidpa Llajtanpa+ jawanpi, Guihonpa+ inti yaykuy ladonpi. Chay perqataqa Pescado Punkukama+ ruwacherqa, Ofelkamataj+ muyuykoj, manchay altotaj karqa. Chantapis Judajpa sumaj jarkʼachasqa llajtasninpi soldadospaj capitanesta churarqa. 15 Chantá chay waj llajtayoj diosesta, ruwachisqan santotapis Jehová Diospa wasinmanta wijchʼorqa.+ Wijchʼullarqataj Jehová Diospa wasin kasharqa chay orqo patapi ruwachisqan tukuynin altaresta,+ jinallataj Jerusalenpi ruwachisqan altarestapis. Chantá kamacherqa llajtaj jawanman wijchʼunankuta. 16 Chantapis Jehová Diospa altarninta wakicherqa,+ chaypitaj khuska mikhurikuy ofrendasta+ jaywarqa, agradecekuna ofrendastawan.+ Judá naciontapis nerqa Israelpa Diosnin Jehovata sirvinankuta. 17 Runastaj chay pata lugarespi jaywanasta jaywashallarqankupuni, chay jaywanastatajrí Jehová Diosnillankuman jaywasharqanku.
18 Manasespa tukuy kausayninmanta, Diosninmanta mañakusqanpis, Israelpa Diosnin Jehovaj sutinpi paywan parlarqanku chay profetaspa* parlasqankupis, qhelqasqa kashan Israelpa reyesninmanta parlaj libropi. 19 Qhelqasqallataj kashan Diosmanta mañakusqanpis,+ rogakusqanta Dios uyarisqanpis, tukuy juchasninpis, Diosta wasanchasqanpis,+ niraj Diosman kʼumuykushajtin maykunaspichus pata lugaresta ruwacherqa, maykunaspichus yupaychana kʼullu postesta+ churarqa, llajllasqa santostapis, chay tukuy imas qhelqasqa kashan profetaspa* qhelqasqasninkupi. 20 Chantá Manasesqa ñaupa tatasnin jina wañuporqa, pʼamparqankutaj wasinpa ladonpi. Wawan Amontaj paypa cuentanmanta rey jina kamachiyta qallarerqa.+
21 Amonqa+ 22 watasniyoj kashaspa rey jina kamachiyta qallarerqa, Jerusalenpitaj iskay watata kamacherqa.+ 22 Amonqa tatan Manasés jinallataj Jehová Diospa qhawayninpi sajra imasta ruwarqa.+ Tatan Manasés ruwachisqan chay tukuynin santosman jaywanasta jaywaj, chaykunatataj yupaychaj.+ 23 Nitaj Jehová Diospa ñaupaqenpi sonqonta llampʼuyacherqachu+ tatan Manasés jinaqa,+ astawanpis Amonqa juchanta astawan yapaykorqa. 24 Chantá kamachisnillantaj Amonta wañuchinankupaj yachachinakorqanku,+ kikin wasinpitaj wañucherqanku. 25 Judá nacionmanta runastaj chay runasta wañucherqanku, pikunachus rey Amonta wañuchinankupaj yachachinakorqanku chaykunata.+ Chantá Amonpa wawan Josiasta+ churarqanku rey jina kamachinanpaj.