Jueces
15 Chaymanta qhepaman trigo oqhariy tiempopi, Sansonqa rerqa warminta watukoj uj chivito aparisqa. Nerqataj: “Warmiypa puñuna cuartonman yaykuyta munani”, nispa. Chaywanpis warminpa tatanqa mana yaykojta saqerqachu. 2 Payqa Sansonman nerqa: “Yuyarqani payta chejnikapusqaykita.+ Chayrayku wajwan casaracherqani, fiestata ruwashajtiyki pusamorqanku chay jovenesmanta ujninwan.+ Chaywanpis sullkʼa hermananqa aswan kʼachita. Kurajninpa cuentanmantaqa paywan casaray ari”, nispa. 3 Sansontajrí nerqa: “Kunanqa mana juchayojchu kasaj ima llakiytachus filisteosta ruwasaj chaymantaqa”, nispa.
4 Chantá Sansonqa 300 atojkunata japʼimorqa. Chupasninkuta iskaymanta iskay wataykuspataj, chupasninku chaupiman nina kʼanchachinata wataykorqa. 5 Chaymantaqa chay kʼanchachinasman ninata japʼichispa, chay atojkunata kachaykorqa filisteospa trigo chajrasninkuman. Sansonqa qʼalata ruphaykucherqa trigo gavillasta,* trigo chajrasta, uva huertasta, olivo sachʼasta ima.
6 Chaymanta filisteosqa tapunakorqanku: “¿Pitaj kayta ruwanri?”, nispa. Kuticherqankutaj: “Timná llajtayojpa tolqan Sansón kaytaqa ruwan, warminta waj qhariwan casarachisqanrayku, fiestata ruwashajtin pusarqanku chay jovenesmanta ujninwan”,+ nispa. Jinamanta filisteosqa chay warmita tatantawan ruphaykuchimorqanku.+ 7 Sansonqa paykunaman nerqa: “Chayta ruwawasqaykichejrayku qankunawan pagachikusaj, kayqa mana jinallachu kanqa”,+ nispa. 8 Ajinamanta paykunata mayta maqaykuspa may chhikata wañuracherqa. Chaymanta uraykuspataj Etam chhankapi uj cueva* karqa chayman tiyakoj riporqa.
9 Chaypacha filisteosqa Judaman wicharispa chaypi jarakamorqanku, Lehí+ jallpʼamantaj juntʼaykorqanku. 10 Jinapitaj Judamanta runasqa taporqanku: “¿Ima nispataj jamunkichejri? ¿Imataj contraykupi tiyanri?”, nispa. Filisteostaj kuticherqanku: “Sansonta japʼej* jamuyku, chay ruwawasqaykumanta pagachikunaykupaj”, nispa. 11 Chayta uyarispa Judamanta 3.000 qharis uraykorqanku Etam chhankapi cuevaman. Chaypitaj Sansonta nerqanku: “¿Manachu yachanki filisteospa makisninkupi kashasqanchejta?+ ¿Imatataj kayta ruwawaykuri?”, nispa. Sansontaj paykunaman kuticherqa: “Aynillata kutichiporqani”, nispa. 12 Paykunataj nerqanku: “Qanta japʼisoj* uraykamuyku, filisteosman jaywaykusunaykupaj”, nispa. Sansontaj paykunata nerqa: “Jurawaychej mana imananawaykichejta”, nispa. 13 Paykunataj nerqanku: “Noqaykoqa mana imanasqaykuchu.* Qantaqa wataykuspalla filisteosman entregasqayku. Mana wañuchisqaykuchu”, nispa.
Chantá paykunaqa iskay mosoj waskhaswan wataykuspa, chay chhankamanta orqhomorqanku. 14 Sansonta Lehiman chayachejtinku, filisteosqa kusiywan qhaparerqanku. Jehová Diospa espirituntaj Sansonman atiyta qorqa.+ Sansonqa makisninpi watasqa kasharqa chay waskhasta pʼitirarqa,* ruphasqa lino hilopis kanman jinata, jinamanta cadenasnenqa unuyarpankumanpis jina urmaraporqanku.+ 15 Chantá Sansonqa manaraj allin chʼakisqa burro quijadata tarispa, chaywan wañuracherqa 1.000 qharista.+ 16 Chaymantataj Sansonqa nerqa:
“Uj burro quijadawan enemigosniyta wañurachispa montón montonta tantaykuni.
Uj burro quijadawan 1.000 qharista wañurachini”,+ nispa.
17 Chayta niytawan Sansonqa chay burro quijadata choqaporqa, chay lugartataj Ramat-Lehí*+ nispa suticharqa. 18 Chaymanta Sansonqa yakumanta chʼakichikuspa Jehová Diosman qhaparikorqa: “Qan kay kamachiykita yanapawarqanki atipanaypaj. Kunanqa, ¿yaku chʼakiywanchu wañusaj mana circuncidasqa* runaspa makinkupi?”, nispa. 19 Diostaj Lehipi uj tʼoqo karqa chayta kicharispa yakuta phullchichimorqa.+ Sansontaj chay yakuta tomaspa watejmanta kallpata japʼerqa, kutirikorqataj. Chayrayku chay yaku juturitaqa En-Hacore* nispa suticharqa, chayqa kunankama Lehipi kashan.
20 Sansonqa 20 watasta Israelpi juez karqa, filisteos chay jallpʼaspi kamachishajtinku.+