2 Crónicas
32 Ezequías ajinata kasukuspa chay imasta ruwasqantawan,+ Asiriaj reynin Senaqueribqa jamorqa Judaman yaykuykuyta munaspa. Sumaj jarkʼasqa llajtasta muyuykorqa, a la fuerzalla yaykuspa japʼikapunanpaj.+
2 Senaquerib Jerusalenman maqanakoj jamushasqanta yachaspa, Ezequiasqa 3 kuraj kamachisninwan parlarqa, maqanakoj soldadosninwanpis, llajtaj jawanpi karqa chay yaku juturista pʼampanankupaj,+ paykunataj yanapanankuta nerqanku. 4 Ashkha runasta tantaspataj chay yaku juturista pʼampaj sayaykorqanku, chayninta jamoj yakutapis pʼamparqanku. Nerqankutaj: “Asiriamanta reyesqa kayman chayamuspa mana ashkha yakutachu tarinanku tiyan”, nispa.
5 Chantapis tukuy sonqo chay urmasqa perqata ruwachillarqataj, chaypitaj torresta ruwacherqa. Llajtaj perqanpa jawanpitaj waj perqata ruwacherqa. Chantapis Davidpa Llajtanpi karqa chay Lomata*+ allinchaykorqa, ruwachillarqataj may chhika maqanakuna armasta, escudostawan. 6 Chantá soldadosta kamachejkunata churarqa tukuy runas ukhupi. Runastataj tantarqa llajtaman yaykuna plazapi, kayta nispataj paykunata kallpacharqa: 7 “Kallpachakuychej, waputaj kaychej. Ama Asiriaj reyninta, nitaj paywan kashanku chay ashkha runastapis manchachikuychejchu, nitaj kharkatiychejchu.+ Noqanchejwan kajkunaqa aswan ashkha kanku, paywan kajkunamanta nisqaqa.+ 8 Payqa runaspa kallpallanpi atienekushan, noqanchejwantaj Jehová Diosninchej kashan yanapanawanchejpaj, noqanchejwan kashan guerrasninchejpi maqanakunanpaj”,+ nispa. Judamanta rey Ezequiaspa parlasqantaj runasta kallpacharqa.+
9 Asiriaj reynin Senaqueribtaj Lakispi+ kasharqa tukuynin soldadosninwan, chantá payqa kamachisninta Jerusalenman kachamorqa, Judaj reynin Ezequiasman, Jerusalenpi kasharqanku chay tukuy Judamanta runasmanpis,+ kayta ninankupaj:
10 “Asiriaj reynin Senaqueribqa kayta nisunkichej: ‘¿Imapitaj atienekushankichej Jerusalén muyurisqaña kashajtin chayllapipuni kanaykichejpajri?+ 11 Ezequiasqa nishasunkichej: “Jehová Diosninchejqa salvawasun Asiriaj reyninpa makinmanta”,+ nispalla. ¿Nichu reparankichej? Payqa llullakushasunkichej, yarqhaywantaj, yaku chʼakiywantaj wañuchisonqachej. 12 ¿Nichu Ezequiasllataj Diosniykichejpa pata lugaresninta,+ altaresnintapis urmacherqa?+ Chanta, ¿nichu payllataj Judatapis Jerusalentapis nerqa: “Uj altarpa ñaupaqellanpi kʼumuykukunkichej, chaypitaj jaywanasniykichejta qʼoshñichinkichej”,+ nispa? 13 ¿Nichu qankunaqa yachankichej imastachus ñaupa tatasniy, jinallataj noqapis waj nacionesta ruwaykusqaykuta?+ Chay nacionespa diosesninkoqa mana makisniymanta jallpʼasninkuta librayta aterqankuchu.+ 14 Ñaupa tatasniy chinkacherqanku chay nacionesmantarí, ¿mayqen diosninkutaj makiymanta llajtanta librasqari? ¿Diosniykichejpunichu makiymantaqa librasunkichejman kasqa?+ 15 Ama Ezequiaswan chʼaukiyachikuychejchu,* ama paypa nisqanwan sonqoykichejta suwachikuychejchu.+ Ama payta creeychejchu. Ni mayqen nacionpa diosninpis, ni mayqen gobiernoj diosninpis llajtanta makiymanta librayta aterqachu, ni ñaupa tatasniypa makinkumantapis. Qankunaj Diosniykichejqa astawanrajchá makiymanta mana librayta atisonqachejchu’,+ nispa”.
16 Senaqueribpa kamachisnenqa astawanraj cheqa Dios* Jehovaj contranta parlasharqanku, kamachin Ezequiaspa contrantapis. 17 Chantapis Senaqueribqa cartasta qhelqarqa+ Israelpa Diosnin Jehovata insultananpaj,+ contrantataj rimananpaj. Kay jinata: “Imaynatachus waj nacionespa diosesninku llajtasninkuta mana makiymanta librayta aterqankuchu,+ ajinallatataj Ezequiaspa Diosninpis mana llajtanta makiymanta librayta atenqachu”, nispa. 18 Senaqueribpa kamachisnenqa judiospa parlayninkupi qhaparishallarqankupuni, Jerusalenpa perqa patasninpi kasharqanku chay runasta mancharichinankupaj, kharkatichinankupajtaj, ajinamanta chay llajtata atipanankupaj.+ 19 Paykunaqa Jerusalenpa Diosninpa contranta parlarqanku, kay jallpʼapi runaspa diosesninkumanta jinalla, mayqenkunachus runaspa ruwasqallan kanku chaykunaj contranta jinalla. 20 Jinapis rey Ezequiaswan, Amozpa wawan profeta Isaiaswanqa+ cieloman qhaparikorqanku Diosmanta yanapata mañakuspa.+
21 Jehová Diostaj uj angelta kachamuspa wañuracherqa Asiriaj reyninpa tukuynin wapu soldadosninta,+ kuraj kamachisninta, campamentonmanta* kamachejkunatawan. Rey Senaqueribtaj llajtanman kʼumuykachachisqa kutiporqa. Aswan qhepamantaj diosninpa templonman yaykorqa, chaypitaj wakin wawasnillantaj espadawan wañucherqanku.+ 22 Ajinata Jehová Diosqa Ezequiastawan, Jerusalenpi tiyakoj runastawan salvarqa Asiriaj reynin Senaqueribpa makinmanta, wajkunaj makinkumantapis. Tukuynejpitaj paykunaman allin kausayta qorqa.* 23 Chantá ashkha runas Jerusalenman Jehová Diospaj regalosta apamorqanku, Judaj reynin Ezequiaspajpis sumaj imasta apamorqanku.+ Chay qhepata rey Ezequiasqa nacionespaj may respetasqa karqa.
24 Chay pʼunchaykunapi rey Ezequiasqa sinchʼita onqoykorqa, wañuy patallapiña kasharqa. Chantá Jehová Diosmanta mañakorqa,+ Diostaj payta uyarerqa, uj señaltataj qorqa.+ 25 Ezequiastaj mana jatunpajchu qhawarqa chay allin kajta paypaj ruwapusqanta. Payqa umata oqharerqa, chaywantaj Diosta phiñacherqa paypa contranta, Judaj contranta, Jerusalenpa contrantapis. 26 Ezequiastaj umata oqharisqanmanta kʼumuykukorqa.+ Ajinata paypis, Jerusalenmanta runaspis kʼumuykukorqanku. Jehová Diostaj Ezequías+ kausashajtin mana paykunaman phiñakuyninta kachaykamorqachu.
27 Chantá Ezequiasqa manchayta qhapajyarqa, allinpaj qhawasqataj karqa.+ Ruwachikorqataj jallchʼana wasista+ qolqe metalpaj, qoripaj, kʼachitu rumispaj, bálsamo aceitepaj, escudospaj, valorniyoj imaspajpis. 28 Chantá ruwachillarqataj jallchʼana wasista chʼaki mikhuykunapaj, mosoj vinopaj, aceitepajpis. Chantá ruwachillarqataj tukuy laya* uywasninpaj wasista, tropa uywasninpajpis corralesta.* 29 Chantá ruwachillarqataj llajtasta, uywasnintaj ashkha karqa, ovejaspis wakaspis. Diospuni paymanqa ashkha imasta qorqa. 30 Ezequiasqa Guihon+ pata juturi yakusta pʼamparqa,+ ura ladomantaj cheqanta kachaykorqa, inti yaykuy ladoman, Davidpa Llajtanman.+ Ezequiastaqa tukuy ima ruwasqanpi allin rerqa. 31 Babiloniamanta kuraj kamachejkunaj kachasqasnenqa jamusqanku Ezequiasta tapukoj nacionpi karqa chay señalmanta.+ Chaypacha cheqa Diosqa sapanta saqerparerqa pruebaman churananpaj,+ ajinamanta yachananpaj imachus sonqonpi kasqanta.+
32 Ezequiaspa tukuy kausayninmanta, Diosta munakuspa imastachus ruwasqanmantapis+ qhelqasqa kashan Amozpa wawan profeta Isaías mosqoypi jina rikusqanmanta qhelqasqapi,+ Judajpa, Israelpa Reyesninmanta Libropi.+ 33 Chantá Ezequiasqa ñaupa tatasnin jina wañuporqa, pʼamparqankutaj Davidpa wawasninpa sepulturasninkuman wicharinapi.+ Wañupojtintaj Judamanta, Jerusalenmantawan tukuy runas jatunpaj qhawaspa pʼamparqanku. Cuentanmantataj wawan Manasés rey jina kamachiyta qallarerqa.