RUT

1 Israelpi jueces+ juzgaj kanku* chay tiempopeqa, Israelpi yarqhay karqa. Chayrayku Judapi kaj Belén llajtamanta uj runaqa+ Moab jallpʼaman+ tiyakoj riporqa, warminwan iskay qhari wawasninwan khuska. 2 Chay runajta sutin karqa Elimélec,* warminpatataj Noemí,* ujnin wawanpata sutin karqa Mahlón,* ujninpatataj Kilión.* Paykunaqa karqanku Efrata llajtamanta, Judapi kaj Belenmanta. Moabman chayaspataj, chaypi tiyakorqanku.

3 Chaymanta qhepaman, Noemij qosan Elimelecqa wañuporqa. Noemitaj iskaynin wawasnillanwanña qhepakorqa. 4 Aswan qhepamantaj wawasnenqa Moab llajtayoj warmiswan casarakorqanku, ujninpata sutin karqa Orpá, ujninpatataj Rut.+ Moabpitaj chunka watasta jina tiyakorqanku. 5 Chantá Mahlonwan Kilionwanpis wañupullarqankutaj. Noemitaj mana qosayoj, mana wawasniyojtaj qhepakorqa. 6 Ajinapi payqa Moabmanta llajtanman kutiporqa ñojchʼasninwan* khuska. Payqa Moabpi kashaspa uyarisqa Jehová Diosqa nacionninta ujtawan bendecisqanta, yarqhay watastapis tukuchipusqanta.

7 Noemiqa maypichus tiyakusharqa chaymanta riporqa iskaynin ñojchʼasninwan. Judá jallpʼaman ñanta rishajtinkutaj, 8 ñojchʼasninta nerqa: “Wawasníy, kutipuychej mamaykichejpa wasinman. Jehová Diostaj qankunata khuyakusonqachejpuni,*+ imaynatachus qankunapis qosaykichejta khuyakorqankichej, noqatapis khuyakuwarqankichej ajinata. 9 Noqaqa munani Jehová Dios yanapasunaykichejta, casarakuspa allin kausayta tarinaykichejpaj”,+ nispa. Chantá Noemiqa paykunata muchʼaykorqa. Paykunataj sonqo nanayta waqarikorqanku. 10 Kutin kutitataj nerqanku: “Mana kutipuykumanchu. Qanwan llajtaykiman ripuyta munayku”, nispa. 11 Noemitajrí paykunata nerqa: “Kutipuychej wawasníy. ¿Imapajñataj noqawan riwajchejri? Noqaqa manaña wawasniyoj kayta atiymanchu paykunawan casarakunaykichejpajqa.+ 12 Kutipuychej wawasníy, kutipuychej. Noqaqa viejaña kani, ¿imatañá casarakuymanri? Sichus kay chʼisi casarakuyman chaypis, wawasniyojtaj kayman chaypis, 13 ¿paykunata suyawajchejchu wiñanankukama? ¿Paykunata suyaspachu mana casarakuwajchej? Mana wawasníy. Jehová Dios contraypi kashasqanrayku qankunapis kay jina llakiypi kashankichej. Chaytaj mayta llakichiwan”,+ nispa.

14 Paykunataj ujtawan sonqo nanayta waqarikullarqankutaj. Chantá Orpaqa suegranta muchʼaykuspa kutiporqa. Ruttajrí mana suegranta saqerparerqachu. 15 Chayrayku Noemiqa Rutta nerqa: “Ñojchʼa masiykeqa kutipun llajtanman, diosesninman ima. Qanpis paywan kutipuy wawáy”, nispa.

16 Ruttajrí nerqa: “Ama niwaychu saqesunayta, qanmantataj tʼaqakunayta. Noqaqa risaj maymanchá rinki chayman, kausamusajtaj maypichá kausamunki chaypi. Llajtaykeqa llajtay kanqa, Diosniykipis Diosnillaytaj kanqa.+ 17 Maypichá wañunki chaypi wañusaj, chayllapitaj munani pʼampanawankutapis. Wañuyllamin tʼaqawasun. Mana jina kanman chayrí, Jehová Dios mayta castigawachun”, nispa.

18 Noemiqa Rut paywanpuni riyta munasqanta reparaspa manaña imatapis nerqachu. 19 Ajinamanta iskayninku rillarqankupuni Belenman chayanankukama.+ Belenman chayasqankutawantaj, llajtapi runasqa mayta tʼukorqanku. Warmistaj ninakusharqanku: “¿Manachu kayqa Noemí?”, nispa. 20 Noemitaj chay warmista nerqa: “Amaña Noemí* niwaychejchu, manachayqa Mara* niwaychej, imajtinchus Tukuy Atiyniyoj Diosqa may llakiypi rikhurichiwan.*+ 21 Kaymantaqa tukuy imayoj riporqani. Jehová Diostajrí, chʼusaj makillata kutichimuwan. ¿Imaraykutaj Noemí niwankichejman kasqari? Tukuy Atiyniyoj Jehová Diosqa contraypi kashan, kay jina llakiypitaj rikhurichiwan”, nispa.+

22 Ajinata Noemiqa Moab jallpʼamanta kutiporqa+ ñojchʼan Rutwan. Paykunaqa grano* ruthuy qallarikushajtin Belenman chayarqanku.+

2 Noemijpa qosan Elimelecpataqa uj familian tiyaporqa. Chay familianqa Boaz sutikorqa,+ may qhapaj runataj karqa.

2 Uj kuti moabita Rutqa Noemita nerqa: “Chajrasman riyman grano* umasta chajmakamoj,*+ pi kʼacha runallapis chajmakojta saqewanqapunichari”, nispa. Noemitaj nerqa: “Rillay wawáy”, nispa. 3 Chaymanta Rutqa chajrasman rispa, ruthojkunaj tʼakasqanku cebada* umasta chajmakusharqa. Jinallapi Rutqa Boazpa chajranman chayarqa,+ pichus Elimelecpata familian karqa chaypaman.+ 4 Boaztaj chay ratopuni Belenmanta chayamorqa. Ruthojkunatataj napaykorqa: “Jehová Dios qankunawan kachun”, nispa. Paykunataj kuticherqanku: “Jehová Dios bendecisuchun”, nispa.

5 Chantá Boazqa ruthojkunamanta cargoyojta tapurerqa: “¿Pejpa familianmantataj jaqay sipasri?”, nispa. 6 Chay runataj kuticherqa: “Payqa uj moabita,+ Noemiwan Moabmanta jampoj sipas.+ 7 Payqa mañakuwarqa: ‘¿Chajmarikuymanchu ruthojkunaj tʼakasqanku grano umasta?’,+ nispa. Chayrayku paqarinmantaña chajmakushan. Kunitallanraj chʼujllapi tiyaykukun uj rato samarikunanpaj”, nispa.

8 Chaypi Boazqa Rutta nerqa: “Uyariway wawáy, kayllapi chajmakuy, ama waj chajrasmanqa rinkichu. Noqapaj llankʼanku chay sipaskunaj qayllallanpi kanki.+ 9 Allinta qhawariy maypichus ruthushasqankuta, chayman paykunawan rinki. Peonesniyta niniña ama toreasunankuta. Chʼakisojtenqa pʼuñus chayman rispa peonesniy orqhosqanku yakuta tomarikullanki”, nispa.

10 Ruttajrí qonqoriykukuspa pampakama kʼumuykukorqa, nerqataj: “¿Imaraykutaj noqawan may kʼacha kanki, noqatataj khuyawanki forastera kashajtiypisri?”,+ nispa. 11 Boaztaj nerqa: “Tukuy imataña qanmanta willawanku. Yachani qosayki wañupusqanmantapacha imatachus suegraykirayku ruwasqaykita. Yachallanitaj tataykita, mamaykita, llajtaykita saqespa, mana rejsisqayki llajtaman jampusqaykita.+ 12 Jehová Dios bendecisuchun imatachus ruwasqaykimanta.+ Israelpa Diosnin Jehová pagapusuchun chay ruwasqaykimanta. Qanqa paypa lijrasnin* urapi pakakoj jamorqanki”,+ nispa. 13 Ruttajrí nerqa: “Wiraqochíy, may kʼacha noqawan kanki. Qanqa mayta sonqochariwanki, kʼacha palabraswantaj parlapayariwanki, mana ujnin kamachiykichu kashajtiypis”, nispa.

14 Chantá Boazqa mikhuna horaña kajtin, Rutta wajyaspa nerqa: “Jamuy wawáy, kay tʼantata vinagreman chhapuykurispa mikhurikunki”, nispa. Chayta nejtin Rutqa, ruthojkunaj ladonkupi tiyaykukorqa. Boaztaj jankʼata jaywarerqa. Ruttaj sajsakunankama mikhorqa, puchorqaraj chaypis. 15 Chantá Rut jatarikuspa chajmakoj risqantawan,+ Boazqa peonesninta nerqa: “Gavillas* kashan chaynejmantapis* pallakojta saqellankichej, ama jarkʼankichejchu.+ 16 Maki qʼapisniykichejmantapis wakinta tʼakakojta saqellaychej pay oqharikunanpaj, amataj imatapis ninkichejchu”, nispa.

17 Ajinapi Rutqa tardeyaykunankama chajmakorqa.+ Chajmakusqan granota wajtarqospataj,* arrobata jina* oqharerqa. 18 Chayta qʼepiriykukuspataj wasinman kutiporqa. Chayaspataj chay chajmakusqanta suegranman rikucherqa. Chantapis suegranman jaywarerqa mikhusqanmanta puchupusqan jankʼata.+

19 Chantá suegranqa taporqa: “¿Maypitaj kunan chajmakamorqankiri? ¿Maypitaj pallakamorqankiri? Pichus qanta khuyakusojqa bendecisqa kachun”,+ nispa. Ruttaj suegranman willarqa pejpa chajranpichus chajmakamusqanta. Pay nerqa: “Boaz sutiyoj runaj chajranpi chajmakamorqani”, nispa. 20 Noemitaj Rutta nerqa: “Jehová Dios payta bendecichun. Diosqa kausajkunatapis wañojkunatapis khuyakunpuni”,+ nispa. Chantá Noemí nillarqataj: “Chay runaqa qosaypa familian,+ pay kay llakiyninchejmanta orqhoyta atiwanchej”,+ nispa. 21 Moabita Ruttaj nerqa: “Boazqa nillawarqataj: ‘Noqapaj llankʼajkunallawan qhepakuy ruthuyta tukunankukama’,+ nispa”. 22 Noemitaj ñojchʼanta* nerqa: “Wawáy, allin kanman paypaj llankʼanku chay sipaskunallawan kanayki, waj chajrasman rispa ama rimachikunaykipaj”, nispa.

23 Ajinamanta Rutqa chajmakullarqapuni Boazpaj llankʼaj kanku chay sipaskunaj qayllanpi, granotawan trigotawan ruthuyta tukunankukama.+ Chaykamataj suegranwan khuskallapuni tiyakorqa.+

3 Chaymanta qhepaman Noemiqa Rutman nerqa: “Wawáy, uj qosata maskʼapusunay tiyan+ sumajta kausakunaykipaj. 2 Boazqa qosaypa familian.+ Pikunawanchus llankʼarqanki chay sipaskunaqa paypaj llankʼanku. Kunan chʼisitaj Boazqa erapi* granota* wayrachenqa. 3 Qantajrí kayta ruway wawáy, mayllarqokuytawan perfumasqa aceitewan jawiykukuy. Chantá sumajta visterqokuspa eraman uraykuy. Boazwanqa amapuni rikuchikunkichu mikhuyta ujyayta tukunankama. 4 Allinta qhawanki maynejpichus puñonqa chayta. Chantaqa chakisnin chayta qhataraspa, chayman siriykunki.* Pay nisonqa imatachus ruwanaykita”, nispa.

5 Ruttaj nerqa: “Tukuy ima niwasqaykita ruwasaj”, nispa. 6 Ajinamanta Rutqa eraman uraykuspa, suegranpa tukuy ima nisqanta ruwarqa. 7 Boazqa mikhuspa, ujyaspataj sonqonpi mayta kusikorqa. Chaymantataj cebada* montón kantupi puñuykukorqa. Chay qhepatataj Rutqa chʼinsitullamanta rispa, Boazpa chakisnin chayta qhataraspa, chayman siriykukorqa. 8 Chaupi tutata jinataj, Boazqa kharkatitispa ujllata rijchʼarerqa. Tiyaykukuspataj jaytʼananpi uj warmita sirisqata rikorqa. 9 Nerqataj: “¿Pitaj kankiri?”, nispa. Paytaj nerqa: “Kamachiyki Rut kani. Suegroypa familian kasqaykirayku kay llakiyniykumanta orqhoyta atiwayku.+ Chayrayku qhatanaykiwan* qhataykuriway ari”, nispa. 10 Boaztaj nerqa: “Wawáy, Jehová Dios bendecisuchun. Qanqa rikucherqankiña mayta munakusqaykita, kunantaj aswan sutʼitaraj chayta rikuchishanki.+ Munaspaqa qosata maskʼakuwaj karqa aswan joventa, wajchatapis chayri qhapajtapis, jinapis mana chayta ruwarqankichu. 11 Wawáy, ama manchachikuychu. Kay llajtapi tukuy runas yachanku qanqa sumaj warmi kasqaykita. Chayrayku imatachus niwasqaykita ruwasaj.+ 12 Arí, noqaqa suegroykej familian kani,+ jinapis aswan qaylla familian kanraj.+ 13 Kunan tuta kayllapi qhepakuy. Qʼayataj sichus pay munanqa qaylla familia kaspa ruwananta juntʼayta chayqa, ruwachun.+ Manachus ruwayta munanman chayrí, kausaj Jehová Diospa sutinpi jurani noqapuni chayta ruwanayta. Kunanqa kaypi puñukullay sutʼiyamunankama”, nispa.

14 Ajinamanta Rutqa chay tuta Boazpa jaytʼananpi puñukorqa. Qʼayantintaj ni pi rikunanpaj niraj sutʼiyamushajtin jatarikorqa. Imajtinchus Boazqa nisqa: “Ama pipis yachachunchu uj warmi era pataman jamusqanta”, nispa. 15 Chantá Boazqa Rutta nerqa: “Mantaykita orqhokuy, sumajtataj japʼinki”, nispa. Rut mantanta japʼishajtintaj Boazqa granota jichʼaykorqa iskay arrobata jina,* oqharispataj Rutman jaywarqa apakunanpaj. Chaymanta Boazqa llajtaman kutiporqa.

16 Rut wasinman chayajtin suegranqa taporqa: “¿Ima nisunkitaj wawáy?”, nispa. Ruttaj willarqa imatachus Boaz nisqanta. 17 Chantá Rut nillarqataj: “Pay kay granota qoriwan iskay arrobata jina,* ‘ama chʼusaj makillaqa suegraykiman kutipuychu’ nispa”. 18 Chaymanta Noemiqa Rutta nerqa: “Kayllapi kay wawáy, imachus kananta yachanaykikama. Chay runaqa mana samarikonqachu kunan chayta allinchanankama”, nispa.

4 Chantá Boazqa llajta punkuman rispa,+ chaypi chukurikorqa. Chayllapitaj Elimelecpata qaylla familian pasasharqa, pimantachus Boazqa Rutman parlarqa chay.+ Boaztaj payta nerqa: “Don na, jamuy kayman, kaypi chukurikuy”, nispa. Chay runataj chimpaspa chaypi chukurikorqa. 2 Chantá Boazqa wajyallarqataj chay llajtamanta chunka kurajkunata.+ Paykunatapis nerqa: “Kaypi chukurikuychej”, nispa. Chayta nejtintaj paykunapis chukurikullarqankutaj.

3 Chaypitaj Boazqa Elimelecpa qaylla familianta nerqa:+ “Moabmanta kutinpoj Noemiqa+ jallpʼanta vendenan tiyan, familianchej Elimelecpata karqa chay jallpʼata.+ 4 Chayta yachanaykita munarqani. Chay jallpʼanta rantikapuyta munaspaqa rantikapuy kay runaspa ñaupaqenkupi, jinallataj llajtamanta kurajkunaj ñaupaqenkupipis.+ Qan rantikapuyta atinki aswan qaylla familian kasqaykirayku. Mana rantikapuyta munaspaqa willaway, qhepaykitaqa noqa rantikapuyta atini”, nispa. Chay runataj nerqa: “Rantisaj”,+ nispa. 5 Boaztajrí nerqa: “Kaytapis yachanallaykitaj tiyan. Noemij jallpʼanqa mana paypallatachu, manachayqa wañupoj wawanpa warminpatawan, moabita Rutpata. Chayrayku chay jallpʼataqa iskayninkumanta rantikapunayki tiyan. Ajinamanta wañupojpa herencianqa sutillanpipuni kanqa”,+ nispa. 6 Chayta uyarispa Elimelecpa qaylla familianqa nerqa: “Jina kajtenqa mana rantiymanchu, ama herenciay pierdekunanpaj. Qan cuentaymanta rantikapuy, noqaqa mana atiymanchu”, nispa.

7 Ñaupa tiempopeqa kay costumbre kaj Israelpi: Sichus uj runa qaylla familia kasqanrayku uj jallpʼata rantinanpaj derechoyoj kashaspa mana rantiyta munajchu chayri waj imasta rantej chayqa, uj runawan acuerdota ruwasqan sutʼi kananpajqa jukʼutanta* orqhokuspa jaywaj.+ Israelpeqa chayta ruwaspa uj acuerdoman chayaj kanku. 8 Chayrayku Elimelecpa qaylla familianqa Boazta “qan rantikapuy” niytawan, jukʼutanta orqhokuspa payman jaywarqa. 9 Chantá Boazqa kurajkunaman, chaypi kaj runasmanwan nerqa: “Qankuna testigos kankichej+ Elimelecpa, Kilionpa, Mahlonpa jallpʼasninkuta Noemimanta rantishasqaymanta. 10 Testigosllataj kankichej+ moabita Rutta warmiypaj japʼikapushasqaymanta. Ajinamanta qosan Mahlonpa herencianqa sutillanpipuni kanqa.+ Chantapis Mahlonpa sutenqa familian ukhupi, llajtan ukhupipis mana chinkanqachu”, nispa.

11 Tukuy chay llajta punkupi kajkuna, jinallataj kurajkunapis nerqanku: “Arí, testigos kayku. Wasiykiman yaykonqa chay warmita Jehová Dios bendecichun. Paytaj kachun Raquel jina, Lea jinataj, pikunamantachus israelitas ashkhayarqanku chaykuna jina.+ Efrata llajtapi sumaj risuchun,+ Belenpitaj sumaj rejsisqa runa kay.+ 12 Jehová Diosqa kay warmipi wawasta qosuchun.+ Chantá familiaykeqa may chhika kachun,* Tamarpata Judajpatawan wawanku Perezpa familian jina”,+ nispa.

13 Chaymanta Boazqa Rutwan casarakaporqa. Khuskaña kajtinkutaj Rutqa Jehová Diospa bendicionninwan onqoj rikhurerqa, qhari wawitatataj nacechikorqa. 14 Chayrayku warmisqa Noemita nerqanku: “Jehová Dios jatunchasqa kachun, payqa qosaykej familianwan yanapachisunki. Allchhiykej sutenqa Israelpi rejsisqa kachun. 15 Allchhiykeqa mayta kallpachashasunki, viejitaña kajtiykipis qhawasonqa. Payqa ñojchʼaykej* wawan, pichus mayta munakusunki chaypata.+ Chayrayku Rutqa qanchis wawasmantapis aswan sumaj qanpajqa”, nispa. 16 Noemitaj allchhinta marqʼarikorqa.* Chantá pay chay wawata uywayserqa. 17 Vecinasnintaj nerqanku: “Noemijpata wawitan tiyapun”, nispa. Chay wawitamantaj Obed sutita churarqanku.+ Obedqa Jesejpa tatan karqa.+ Jesetaj Davidpa tatan karqa.

18 Kaykuna karqanku Perezpa miraynin:+ Perezqa Hezronpa tatan karqa.+ 19 Hezrontaj Rampa tatan karqa. Ramtaj Aminadabpa tatan karqa.+ 20 Aminadabqa+ Nahsonpa tatan karqa. Nahsontaj Salmonpa tatan karqa. 21 Salmontaj Boazpa tatan karqa. Boaztaj Obedpa tatan karqa. 22 Obedqa Jesejpa tatan karqa.+ Jesetaj Davidpa tatan karqa.+