Uj judía willariwanchej imajtinchus Jesuspi creesqanta

Kausayniykimanta willariwayku.

1979 watapi nacekorqani, Estados Unidospi. Kinsa watitasniyoj kashajtiytaj tatasniy divorciakorqanku. Mamayqa judiospa costumbresninkuman jina uywawarqa. Chayrayku judiospa escuelasninkuman rej kani. Chay escuelasqa yeshivás nisqa karqa. Chantá qanchis watasniyoj kashajtiy Israelman riporqayku. Jaqaypitaj kibutz nisqapi kaj escuelaman rerqani, kibutz nispa sutichayku chajrasniyoj ranchitosta. Chaymanta watanmantaj Mexicoman riporqayku.

Wasiy qayllapi mana uj sinagoga kajtinpis, judiospa costumbresninta ruwallajpuni kani. Sapa sábado velasta japʼichej kani, Torá nisqa librota leej kani, chay libroqa judiospaj jatunpaj qhawasqa. Chantá orakunapaj sidur librowan orakoj kani. Escuelamanta compañerosniymanqa nejpuni kani religionniy cheqa kasqanta. Noqaqa mana jaykʼajpis Mosoj Testamentota leerqanichu, mayqenpichus Jesús willasqanmanta, yachachisqanmanta parlashan chayta. Mamayqa niwarqa ama leenayta, ama umata muyuchikunaypaj.

Chanta, ¿imaynapitaj Mosoj Testamentota leerqanki?

17 watayoj kashaspa Estados Unidosman kuterqani, chaypi estudiayta tukunaypaj. Chaypitaj uj amigoy niwarqa cristiano kasqanta, Jesusmantataj yachanaypuni kasqanta.

Noqataj nerqani: “Jesuspi creejkunaqa engañasqas kashanku”, nispa.

Paytaj niwarqa: “¿Maykʼajllapis Mosoj Testamentota leerqankichu?”, nispa.

Noqataj “mana” nerqani.

Chantá pay niwarqa: “¿Imaynatá engañasqas kasqankuta niwaj mana allinta yachaspallari? Mana allinta yachaspalla imamantapis parlayqa mana allinchu. Chaytaqa mana yuyayniyojkunalla ruwanku”, nispa.

Chay niwasqanqa ukhuyta ras nichiwarqa. Noqapis yuyaj kani mana allinta yachaspallaqa mana imatapis ninallachu kasqanta. Chayrayku manchay pʼenqaywan Bibliata japʼikorqani, wasiymantaj aparqani Mosoj Testamentota leenaypaj.

¿Imayná rijchʼasorqa chay leesqayki?

Tʼukulla kasharqani Mosoj Testamentota judíos qhelqasqankuta yachaspa. Astawan leesqayman jinataj repararqani Jesusqa kʼacha kasqanta, llampʼu sonqo kasqanta, runasta yanapayta munasqanta, nitaj paykunamanta aprovechakuytachu munasqanta. Chantapis Bibliotecaman rerqani Jesusmanta parlaj librosta maskʼaj. Jinapis chay librosqa mana yanapawarqachu Jesuspuni Mesías kasqanpi creenaypaj. Wakin librosqa nej kanku Jesusqa Diosllataj kasqanta. Chaytaj mana sutʼichu karqa. Noqa tapukoj kani: “Chanta Jesús mañakuspa, ¿pimantataj mañakusharqa? ¿Pay kikillanmantatajchu?”, nispa. Chantapis Jesusqa wañorqa, Bibliatajrí Diosmanta parlaspa nin: “Diosníy, qanqa mana wañunkichu”, nispa.a

Chanta, ¿imatá ruwarqanki?

Cheqa kajqa sutʼisitu, entiendenapaj jina. Noqataj cheqa kajta yachayta munarqani. Chayrayku waqarikuspa tukuy sonqo Diosmanta mañakorqani. Chay kutipi, por primera vez manaña sidur libroywanchu mañakorqani. Mañakuyta tukusqaytawantaj iskay testigos punkuyta takaykamorqanku. Chantá paykunawan parlarerqani, paykunataj uj folletota saqewarqanku. Chay folletopis, aswan qhepata paykunawan parlarisqaypis. Sutʼita reparachiwarqa paykunaqa Bibliaj nisqanpipuni creesqankuta. Jehovaj testigosnenqa mana creenkuchu Jesús Diosllataj kasqanta, manaqa paykuna creenku Jesusqa “Diospa Wawanpuni”b kasqanta, Diostaj ‘payta ñaupajta ruwasqanta’.c

Chaymanta pisi tiemponman Mexicoman kutiporqani. Chaypitaj Jehovaj testigosninwan Mesiasmanta profeciasta estudiallarqanipuni. Mesiasmanta ashkha profecías tiyan. Jinapis siga iskayrayasharqani. Tapukoj kani: “¿Jesusllachu chay profeciasta juntʼarqa? Chayri, ¿pay Mesías kasqanta creechinallanpajchu chay profeciasta juntʼaj churakorqa?”, nispa.

¿Imataj manaña iskayrayanaykipaj yanapasorqa?

Jehovaj testigosnenqa rikuchiwarqanku Mesiasmanta profeciasta ni pi juntʼayta atisqanta, manaqa Jesuslla. 700 watas faltashajtin profeta Miqueas nerqa, Mesiasqa Belenpi nacekunanta.d Nitaj pipis ajllayta atinmanchu maypichus nacekunantaqa. Profeta Isaiastaj nerqa, Mesiasqa suwa runa jina wañuchisqa kananta, jinapis qhapaj runaswan khuska pʼampasqa kananta.e Tukuy chay profeciastaj Jesuspi juntʼakorqa.

Jesuspi creenaypajqa yanapawarqa ima familiamantachus jamusqanta yachay. Bibliaqa nin Mesías rey Davidpa mirayninmanta jamunanta.f Judiosqa ima familiamantachus jamusqankuta sumajta anotaj kanku. Sichus Jesús mana Davidpa familianmantachu jamunman karqa chayqa, enemigosnenqa tukuyman chayta willankuman karqa. Jinapis mana ajinachu karqa, sutʼita yachakorqa Jesusqa Davidpa mirayninmanta kasqanta. Runaspis Jesusta nej kanku ‘Davidpa Wawan’ nispa.g

70 watapitaj, Jesús wañupusqanmanta 37 watasninman Romamanta soldadosqa Jerusalenman juntʼaykorqanku, chaypitaj ima familiamantachus judíos jamusqankumanta anotasqas chinkachisqa karqanku. Chayrayku ima familiamantachus Mesías jamusqanta yachanapajqa, Mesiasqa 70 watamanta ñaupajta jamunan karqa.

¿Imataj yanapasorqa Jesuspi creenaykipaj?

Deuteronomio 18:18, 19 versiculospi Diosqa nerqa Israelpi uj profetata sayarichinanta Moisesta jina. Kaytataj nerqa: “Pichus sutiypi parlaj profetata mana uyarejmantaqa, cuentata mañasaj”, nispa. Bibliata tukuyninta sumajta estudiaytawan, yacharqani Nazaretmanta Jesuspuni chay profeta kasqanta.